Zomite kiamlam maw khantohlam ~ Thang Khan Dal

Zomite kiamlam maw khantohlam ~ Thang Khan Dal

Leitungah minam tampi a om mah bang in kam pau zong tampi mah om hi. Minam thupi ten a kam pau uh zun in puah uh a thupi sak uh hi. A puah zolo te’ kampau damdam in bei in mangthang hi. Nidangin kawl gamsung aa tung masa mite sungah “Pyu” a ki ci mi nam pen kim leh pam lak ah mang thang uh a tu hun in “Pyu” cih ding mi nam ki mu zo non lo hi.

Mi nam it ing ih cih dan bel ki bang lo kha ding hi. Mun khat ah tu lel in a lu sing ngeuh ngeuh pa khat zongmi nam it hing ci kha ding hi. Nainganzi party makai khat in mi nam it ing ci in a awt ciang’athu pi diak in ki ngaih sun kha hi. Teh theih na taktak a om hi leh inn lam a lo kuan ngeu ngeu te aa a sang pen hi thei kha zaw ding hi. Mi pi in a awng zo party makai khat peuh a thu pi diak ki sa kha hi.

Mi nam it taktak te awt na bek tawh hi lo in sep na tawh ton khop ding kisam hi. Tua ban ah mi nam ih tawi san zawh na dingin mi muan makai din mun ah ih om ding zong thu pi hi. Mahsahlah party hun lai in Pyine ah u lian makai teng Tedim mi a tam zaw hi a Haka sum bukte bangin Tedim pau hong zang uh hi. Ahi zongin Nahwahtah hong kah ciangin sumbuk te a ki khel hi tuan lo na pi’n Tedim pau zang non lo lel uh hi. Hih thu a ngaih sut huai mah mah a hihi.

Khan toh na ih cih ciang in mi khat le nih hauh na liat na tawh khang ki ci lo ami nam bup huam a khang to ding ki sam hi. Tua bang khan toh na ding thu tam pi om mah ta leh ki thu tuah na a thu pi pen a hihi. Ki thu tuah theih na ding lam pi thum om a dik tat na -thu man na-ki deih sak na lam pi-ih zuih nak leh ki thu tuah na hong piang ding hi. Ang sung thei lua makai khat vaihawm na tawh ki thu tuah na om ngei lo hi. Thu man zong lo in deih kaih luat na hangin zong ki pawl khop na om thei lo hi.

Sia U Myochit in no zomi te mi guk na om uh leh pawl sagih phuan hong cih pen a ciam nui ki sa in ki nui ngei ngai hi. Nak nuih zak huai peuh mah lo hi. Sia En No a gen ngei khat ei zomi te pasal a hih nak leh khua sat ding hausa sem ding cih ih pu ih pate lung sim puak zia hi a,pawlpi sung tun kha mawk hi hang ci ngei hi. Tu lai tak in I buai pih pen Chin leh Zomi cih min vai peuh,party min peuh hi lel a,mi dang ten buai pih lo uh hi. Ih theih siam loh man a buai hi thei kha ding hi hang.

Min a tam huam thei thei in a vai hawm lai tak ih pu ih pa lung sim pua lai in a toi thei thei a sek suk nuam ih hi tam ka ci ci hi. Penglam suang tat sat ngam ,ak ek tui cik lawng ngam peuh ih hih lel khak ding dah huai hi. Mi pil vai tak a kal suan pen a hioh pen hi. A tawp na ah pil vai mah tung nung veve hi. Minam vai leh party min vai peuh gawm khawm gawp a mipi te buai sak huai peuh mah lo hi. Democracy gamte ah party phuan ciat uh a ;tua party te in atup angim na policy (muwadah) pulak ciat uh hi. Tua tung tawnin gam khang to sak zo ding hi ci in amuan pen uh apan pih uh hi lel hi.

A piang khollo ding ngaih sut sun mang peuh pulak in tangko na hoih tase leh mipin khen thei lel in panpih tuan lo uhhi. Hih lai at papen Zomi hi a khamtung gambup Zogam kici in Zopau bek ki zang zen leh ut lua hi. Tua lung sim puak tawh Falam; Haka ah thu va gen in ei Zomite va ci leng za nuam hetlo ding uhhi. Tua bang mahin Falam;Haka te’ n zong Tedim ah thu hong genin ei Laimite hong ci leh tangtel sih tan ki bang ding hi. Ahi zongin akoi akoi ah ei Chinte ci leng ki sang thei lel ding hi. A hangin Khamtung gam ah amun amun ah ei leh ei ih ki lawh na ki bang lo a Chin cih pen anei tang ihhihi.

Japante khat Shunsuke tawh kaki thei a;amah hong hawh thei zel hi. Hun ka ngah sial in thu tuam tuam ka dong a;amau zong asmau leh amau Japan kici loin Nipon ki ci uh hi. Japan min pen midang te hong min piak hi ci hi. Ahi zongin Japan min buai pih lo uhhi. Ei zong Chin min pen midang te hong cih na hi in Khamtung gambup ah ei leh ei Chin a kici khat bek ih om kei hi.Ahi zongin Kawlgam bek hi loin Leitung gamdang te’n Chin in hong ciap teh uh ahihi. Karen te’n zong a min uh khel nuam mahmah uh a;tawl khat sung bang Karen pyine pen Kawtule pyine in hon g at ngei uh hi. Ahi zongin khel zolo veve uh hi.

Ahangin amau zong amun amun ah kilawh na ki bang lo banah Karen min tawh mun tam ah ki ciam teh khin lua hi. Ki thutuak kei leng damdam in ki mang thang khawm ding hi. Ki thutuah na lam pi zuih huai zaw hi. Midang te’n ih awt na bek tawh hong thupi sim ding hi lo hi’Ih sep khiat na thupi mahmah ban ah ki panpih mahmah leng zong tawm mahmah lai ih hih man midang ten teisam aw hong ci lai ding hi. Malaysia UNHCR ah lai ki hawm te Chin lai ci in Haka kam vive tawh ki at hi.

Tua pen ei Zomi te’n ki za dah pong hi. Keizong amau mun ah omin Chin pau tawh lekkhia in cin Manglai hong ki pia leh ken zong Zolai tawh lek pah lel ding hing. Kua ma heh nading omlo hi. Ahangin en zat tang kam pau neilo ih hih man in asem penpen kam pau zat pen a khial hi lo hi. Zat tang om napin azang lo hi leh Chin kam pau hilo cin ki kawk thei bek ding hi. Hih thu ih et ciangin a ki sap na mun a ih om zawh ding a thupi lam hong mu sak hi.

Zomi leh zolai vei mahmah ka hih man in dictionary picing khat neih zawh nading kallung gulh mahmah a;kei khan gual Manglai siam tampi om in kaki kuppih koikoi hi. 2003 kum bei kuanin Haka ah zum vai in ka zin a;ka ciah ciangin Kawlpi ah bangin Joseph Khanno kiang kahawh a kalung tup dictionary vai ka kup pih hi. Ka khan gual lak ah Manglai siam thamlo in U.S ah pil na vasin a;hong ciah ciang Mandalay University ah lecturer semin tua pan tawp a;Singapore ah na vasem in tua pan hong ciah Kawlpi a om laitak ahihi.

Amah muang pen in Manglai siam tham loin computer neih leh siam thuah ahih man aki sam khempeuh aman nei -in hong sem leh a ut ka hihi. Sun tha pai in ka kikum uh a asawt na ciangin nang a vei lua hi cin ken tua zahin vei keng nang sem lecin zo bek niteh hong cih ciang kalung sim hong sukha lian in kei vei kim lai mi suat niloh ding hi kei ci in 2004 kum kipat cilpan kaki pan pah hi. Ka dictionary bawl pen English-English-Zolai-Kawllai tawh hi in midang te’n zong hong zatpih theih nang ngim na tawh ka bawl a hihi.

Ka zawh masaksak Richard Suanpi tawh ki zom in kakhak pahpah a pa PumLamMang in computer hong khet sak hi. Ken ka lek khiat pen 2006 kum lai zang pawl in ka man siang a;kum nih leh alang sau vei hi. Computer khet na pen kum sagih hong sau vei lawmlawm zen hi. Ka lam et hun in a khet man hi leh kei ma neihsa mah tawh bawl zawh a sawm ka hihi. A hun hong sau vei lua in a tuampi khatin thu kawng hong ki hei hi.

2006 kum sungin Rev. Dr. Do Sian Thang visiting professor in US va zin aa Rev. Dr. Cin Do Kham tawh a kimuh uh ciangin Sia,Dosian kiangah Sia Dokham in Oxford Dictionary na lekkhia unla Committee dingin Rev. Dr. Pau Khan En, Rev. Dr. Do Suan Mung, Dr. Thang Za Tuan leh a mau te gel tawh mi nga in sep khiat ding in kivai khak uh hi. Sia Dosian US pan a ciah ciangin Yangon ah Sia Dokham vaikhak teng gending in Sia Tuanno kiangah nahawh hi.

Tua hunlaitak in Tonzang leh Yangon vaihawm khawp na a hak sak manin Computer khet sate hong et sak ding in Sia Tuanno ka cial leh manlah pi mah in Zolai a thupi sak na hangin kilam en ngamlopi in hongmang a Alphabet ‘F’ a na edit laitak tawh kituak hi. Sia Tuano honggen na ah ei tengin semman peuh mah kei ni-in Dalno aa edit sakin lungkim pihna pialeng ci-in Sia.Dosian kiangah kagen hong ci hi. Sia Dosian zong kasang kah pih kalawm taktak hi aa a mah Falam ZTC sangah Siapi a sem a hihi.

Falam atuntoh ciangin tualaitak kei Haka Tamah pyine zum ah senior officer kasep laitakhi in phone tawh hong hopih in Dictionary vai hongdong hi, A tawp na ah ko Committee in hongthoh le ung na phal ding hiam hong ci-in a taangzai tak aa thoh zawhna ding a hih leh phal mah ing ka ci pah hi.

Sia Dokham pen US pan in kawlpi ah GZA khawmpi kah dingin Yangonhong tun leh ka Dictionary khet sak zong a man kithuak bilbel a hih manin 7/12/2011 ni in a zintun na Hotel ah Sia. Dosian hong vaikhak bangin ka nupa un Sia. Dokham khut sungah bukhat ka ap pah uh hi.

Tua banah Committee dangte zong bukhat ciat ka pia uh hi. Hih laibu kabawl na tawh kisai ka gim ka tawl na thaman leh laidal laikung man ki hello a sumtang aa kabei lian a khet man Kyats 847500 leh Yangon vial 4 kapai na Kyats 250000 valbang tawh gawm a vekpi in Kyats 1097500 kabei hi. Hi tawh kisai in Pyia khat zong huhna ngahna kanei kei hi.

Zuakding abu in kibawl zonailo ahih man hih tawh kasai sum ngahna om nailo hi. Zolai kep cingna leh Zolai kizelh nang kalunggulh luat nahang hi aa supthuak aa sem ka hihi. Zomi it ing kici ciatna pi’n Zolai sim nuamlo mawk hi hang.

Tua pen kiamlam manawh, manthanlam manawh ih hihlam phawk ciathuai mahmah hi. Tua banah kipanpih nuamhetlo mawk hihang. Laibu kizuak ih leipen pilna ngah nadingtham loin abawl te ii panpih na zong a hihi. Zolai tawh kibawl laibu a hih nak leh kikhawng khollo hi. A hangpen Zolai kithupi simloh man a hihi. Zolai thupi ngaihsutlo ih hih manin Zomi nam a thupi saklo ii suak hi.

Minam khantoh nading, Zomite khantoh nalam ih manawh nading thulian pawl khat lakah ih Zoalai zuun aa ih puahding amadawnk pen hiding hi. Hih amadawnkpen nusiadapleng bangciang tungding cih ngaihsun theiciatding hihang. Zomite sungah mihauzong Pasian hepihna tawh ki om sam a hih man Sia Dokham a hih zongin Yangon aa om Sia Khoilam a hizongin kizom in a pangkhawm dingin kongzawn hi. Khatguak tha tawh nalian kisem zolo aa kipawlkhawmleng kisem zo hi. Khanglui te’n puakhawmleng zangna cibuang hi.

Minam aading puakhawm loding ih hi hiam? Hih ka Dictionary bawl banglian Haka te’n neikhin uh hi. Kei kipat cilin a mau kipan nailo uh hi. A mau kipanpihna lian a hih manin nei baihzawuh aa kizelsak baihzaw uh hi. Haka te aa pen hoih kisaciatin Zomi te’n zong kileisak ziahziah hi. Ei Zomi te’n Haka te lai a vazatpih ii suak hi. Kei lunggulh nazong midang hongzahpih theih dingin ngimna lianpi tawh kabawl a hihi.

Kithutuak in semkhawmleng Zomite khangto ding aa nalian tampi zongkisem zoding hi. Kithutuak keileng ih minam kiamlam manawh in ihsep ihgim pihsa namanpha tampi kisumin kimangthangding hi. Minam leh Kampau a piangsak Pasian hi aa kampau azuun dingpen kampau zangte vaipuak a hihi. Pasian hongpiak kampau azuun apuahnuam ciatdingin Topa’n thupha hongpia ciat hen. Thang Khan Dal