Zomi te Malaysia ih lutzia hongphawksak Dunki Movie

Zomi te Malaysia ih lutzia hongphawksak Dunki Movie

Hih Dunki akici pen Hindi kamtawh akibawl Movie khat hi a, India gampan in UK gamsung ah leilam tawnin a guklutna leh UK panin India gamah aciahkiknop uhciangin aguklutkik leuleuna tangthu akizaih ahihi. Hih Movie pen abeisa leh tulaitak Zomi te dinmun tawh aki valak mahmah cihtheih hi a, lunglen khiasiat khua ngaihhuai mahmah hi.

Hih Movie sungah Indian Film Star minthang mahmah ahi Shah Rukh Khan leh Taapsee Pannu te kikhel uhhi. Movie azaihkhia avaihawmpi Director pen Rajkumar Hirani hi a, amahpen Zomi te’n ihtheih mahmah Penglam 3 (3 Idiots) leh PK cihte abawlkhiapa zong ahihi.

Hih Dunki movie pen apatlam in gualnopna leh ciamnuih tawh akibatpian hangin, damdam in anunung lamah hong lunglut huai semsem leh khasiat huai semsem hi. India gamah nuntak khuasakzia hamsatluatna hangin, London khuapi zinkhiatding bekbek angaihsunden khangnote thu akizaih hi a, hongkhatlai in gamdang bekbek zinkhiat nopluatna lungno kaveilam hong phawkkiksak mahmah hi.

London zintheih nadingin lampi zongkawikawi uh a, sangkahding Student Visa tawh kisin masa uhhi. Ahi zongin Mangpau leh Manglai hamsatna tawh Visa ngahzo mahmahlo uhhi. Anunung ah bangbang tuakzongin leilam tawh luangkham in zinkhiatding hong khentat uhhi. Leilamtawh India gampan UK gamsung tuntheih nadingpen 100 lakah 25 bangbek 25% lametna om himawk a, lamkal ah sithei mangcipthei cihzong aki gensa, atheihsa mahun luangkham liangin akithawikhia uh ahihi.

Lamkal ah hamsatna tuamtuam, kimat kihen, kibawlsiatna tuamtuam hongthuak uhhi. A guklut uh himawk ahih manin mawtawnuai khawngah kiselsim, atutna Sofa kawm khawngah kibusim, lupna muaiza sungkhawng ah kiguangmai cihbangin mawtaw Container sungkhawng ah zunle ek tawh vokpuak akpuak in akipuak hun uhzong om uhhi. Guahtui daitui vuuklak ah anawk hun uh om, gamsa gulgilo tetawh aki phutkhak hun uhzong om, gamgi acing palik galkap muhding alau manun tuisungah zanthapai kidiahcip in paikawmkawm cihbangteng banah thaumuk ngatna leh aki kaplum pawlkhat omsawnsawn uhhi. Ahi zongin khetawh paizel, mawtaw tuangzel, meileng tuangzel, gunkuang tuangzel cihbangin kha 3, kha 4 sungbang hamsatna tuamtuam athuaktoh dikdekkhit uhciangin lawmta 4 te anunung ah London khuapi hongtungthei liamliamsam uhhi.

London khuapi hongtun uhciang in nakhempeuh alemtang pahding, nasep silbawlhoih ngahpahding akisak uh hangin, lamet nabang hetlo hi. Gammi te utloh zunsiak eksiak nasep silbawlteng sem, innphiat ninluat, lamgei khawngah khutdawhngen cihbangphial in hongom uh a, tua kawmkal ah palik galkap lau in, zankim zankhang in Operasi (amaubel Operasi cisamkei uh) lau in taizaak kawikawi uhhi. Innsaap dingzong hamsa leh gamdangmi Permit neilote kideihlo ahih manin, inndei khanneu sungkhatah mi ahonhon in omngeingai uha, palik te’n adelh uhciangin khatveivei mi omlohna khuapualam hansung khawngah giakzel cihbang in cimawh genthei mahmah uhhi.

Tuabang tengtawh kum 25 sungbang London khuapi sungah hong omkhit uhciang in, hongteek hongguai kuanta uh a, alam kiatna uh ahi India leitangmah hongngai ngetngut leuleu uhhi. Adiakdiak in Actress pen Cancel natna hong ngahsawnsawn ahih manin, Doctor te’n khakhat bek leitung ah nuntak hun neithei laiding cimawk uhhi.

Dunki | Official Trailer | Shah Rukh Khan, Rajkumar Hirani, Taapsee Pannu, Vicky Kaushal

Amahzong migam milei, theihngeiloh lakah gulsih thaamsih in kasih sangin, kapianna kagam kalei ah meltheih tanaute omna mahah sinuamzaw ing ci’n India gamah ciahkiktheih nading bekbek honggeel leuleu hi. Asylum tawh UK gamsung ah aomsuak himawk uh ahih manin, India kumpi in aciah kiktheih nadingin Visa pianuamlo leuleu uhhi. Anunung ah Dubai panin India gamsung ah leilam tawh guklutding in hongkithawi leuleu uhhi.

Hih Movie pen tulai Zomi te Malaysia omzia khuahun tawh kituak mahmah kasa a, ei Zomi te nuntak khuasakzia leh Malaysia gamsung ih guklutzia te hong phawkkiksak phapha hi. Luangkhamliang in Malaysia azinkhia Zomi te nuntak khuasakzia, sumzon paaizonzia zong atheician khalo pawlkhat innlam ah omthei maitak a, tuate muhding mahmahzong lunggulhhuai phial hi.

Malaysia leh gamhoih gamnuam a tungkhinsa te hampha ihsak mahmah hangin, amaute ii ki piakkhiatna, ahamsat athuakna, luangkhamliang in aki thawikhiatna te uh atheihpihkha hileng kuamah in ki eng masa hetlozel dinghi.

Tuaban ah hih Movie pen aomnai keileh ih Zomi sungah apil asiamte’n (adiakdiak in Penglam 3 abawlte bangin) mipihte ettheihding in Zopau Zolai tawh hong bawlkhiathei leuh ihlunggulh mahmah hi. London khuapi sungah aomsung in Actress in innlam ngeilua mahmah a, kanu kapa kakawi lohzawh kum 25 tak phakhinta hi ci’n thuumngetngut hi. Hamsatna tampi kawmkal ah amah apianna India gamah ciahkikthei sam a, asihmadeuh in anu apa tawh kikawi in, tawmvei kithuah khaman laisam uhhi.

Aw… kei kahihleh tulian in Kawlgam khuahun hoihin aciahthei himah lengzong kanu kapa awkhum zakha nawnloding. Kanu kapa tawh ki angpom in ka kawigawpnop hangin amau omnawnlo, aleitung pumpi uh muhtheihding in omnawnlo, Pasian’ hongbawl khiatna leiah ciahkik khinta uh. Lungzuan zatam sialdingin katuun kazua leh it zatamte zaalna hanmual lamah utlo pipi in ka manawh akulding ahihlam ka ngaihsutsim in kakapkap hi. ZD Sawltak #zomidaily