Zomi te leh Len Nupa (Buannel) ~ Pau Za Mung

Zomi te leh Len Nupa (Buannel) ~ Pau Za Mung

Taanglai in, ih Zogam sungah, dawite khuapi ahi, mun leh gam lamdang tampi tak a omngei hi. Tuate in, Innbuuk, Len Nupa, Thuamvuum, Seeksih, Lunglenkawwl mualdawnte aa bualte, Hrihkhuadar bual(Hrih lii), Tanghcin in Tanghlui leh Meitei gun ki tuahna aa gunliipi cihbang ahi uh hi. Tuabang munte Dawi Ukpite’ te’nna khua hi in, HAUSAPI zong kici hi.

Tuate a vaangliat aphat laitak un, tua munte ah, na lamdangdang(super-natural) tampi tak ki muthei hi. Agal pan in, tuabang munte ah, khuang leh zam kithuah in aging tawngtung, mi gamlum tawntung, nau kaph, ak khuang cihbangte a ki zaktheih baanah, zan in mei taang, sunin siikkaang ni in a lenh bang danaa a tedal dal cihbang khawng zong ki muthei hi. Tuabang munte ah ava pai hamtangte in, gulpi samnei cihbang peuh va muthei hi.

Hihbang thute in, a piangtaktak a hihna, taanglai pek gengenloh, ko neulai mahmah in ka pi ka pute un amau mahmah in zong tuakngei uh ahihna thu ahong genngei uh ahi hi.

Tuabang HAUSAPI te in, tulai hunaa kumpi khat leh khat, gamkhat leh khat a kisim’ mahbangin, ki simhin ki dothei uh hi. Innbuuk mual leh Tanghcinh lii a kisim laiin; Innbuuk mual leh Thuam mual aki simh aki do lai cihte khawng zong a omngei lam zong hong genngei uh hi.

Innbuuk mual leh Tanghcinh lii a ki simhlai bangin, sun leh zan tawntung huihpi nung, guahpi zu, vangingin keekkia in, minhcim(landslide) singkung lopate pukin, hawk in taai aa, lui leh gunte ah, buantui vive luangin, singluang suangtum taai hi, kici hi. Tuabang ciangin, leitung aa om zusa vasa leh gamsate sizih ziah in, tuisung aa ngasa, gul, uiphukte tampi tak si hi, kici hi.

Tuabang dawi khuapite lakaa khat ahi, Len Nupa in, Kaaptel, Tuitawh, Vutbuak, Chawhte, Hmunluah, Heilei, Ticilh leh Suangzaang, gam sagihte ki tuahna, mualdawn kuamkhat ahi hi. A sanna( Altitude)in 6500’(appox:) bang hiding hi. 10 sq. miles thamtham bang zai ding hi.

Nidanglai, Len Nupa ah, Sakhi Sazuk kaang om cihmah; gamkhau gui in aki takvialh ngeina ahi kimlai, tualai aate ki veiheek(veivialh)kici hi. Gulphit, pumpeng, tuuk, gua khawng zong lehpo hi kici hi. Taam thuukpi, gammang tuulak ahih baanah, mual ki lumlet, mual ki pheikham cihte pawl tamin, luituite zong lehluan cihkhawng zong in kigen hi.

Tua munah, gamvak sabeng aa a paite, gammang(stray) pahpah thei uh, ahih manin, apai peuhpeuhte in, khau liimkhat kengin, a paina peuhuh ah, tua khau kai in khung kawikawi leh, a ciahkik lam ciangin tua khau dungzui in ki lehkik peuh leh, ki gammang nawnlo hi, kici hi.

Tuabang mun lamdangte, vaanglianin aphat lai ih cihin, tuagam leh tua kuam huamaa tengte in, dawi um in abiak apaai hunlai ahi hi. Tuhun ciangin, dawi upnawn lohna, biakna tuamtuam akhan ciangin, abia ding om nawnlo ahih manin, amau zong cimawhin agam uh dingzo nawnlo in, kisia in phuukzota( the fall of….) ahih manin, dawi vaangliatna ahi, a lamdan nate zong tuin amang zota hi.

Len Nupa ih cihin, Mizo pau in Buannel aki ci ahih gige ahih lamtak, Rev. Cin Khan Pau in ahong genciangin ih theipan tazen hi. Internet pan Buannel Ramdai cih thulu tawh ahong ki khahkhiat ciangin, a lasa nu pen, Zommi mel mah hi’n, a Bill Board tungah lah Chin Concert, Tahan ci’n ki ataa, amun a mualkuam( landscape ) ih et ciangin, nopcit tuak mahmah in, hia…., Mangkang gam khawngaa cowboyte khawng, aki tangdelh zuakzuak aa a gamtatna munte bangin ahawih mahmah hi. Tua la akhiatna zong Rev. Dr. Gin Khan Nang ka khiat sak hi ven, ka kawihna lam thei nawnlo hing.

Buannel Ramdai a khiatna in, Buannel Gamdai(apau, aging, ahaam, agamlum kheokho cihbang omlo in dai khipkhep, dai hiithiat; bangmah launa leh liinna omlo; kitotna leh kihaut kikam tamna omlo; gal leh sa omlohna ki lemna; lungmuanna, kha muamna leh ngaihsmuanna tawh kidim) cihna hi dingin ka um hi.

A la kisa in, a khiatna ka theihkei hangin, ki lemna ding, ki it ki ngaihna ding tengmah a taamlawh hi dingin ka um hi. Aki sa la aw(tune) in athu tawh kituak, kilem leh kihual mahmah in, a ngaihmah mah hi. Asa nu’ mel leh ama hih hiithiatna tawh aki lawm mahmah hi. Mizo lamte in paakta mahmah uh ahih manin, numei bek hi kei, pasal tuamtuamte in zong asak uh, Youtube aa, Mizo songs ah ki ngaithei hi.
Youtube, Mizo songs, Recbecca Lalnunpuii, Vangsanga leh Mathlena te in a lasak te uh ih zak thei baan ah, Len Nupa( Buannel Ram ) Landscape zong ahi theizah in ki en thei lai hi.

Ih Zogam sungah, hihbang aa mun leh gam lamdangte om napi in, en’ phawk khakin ih nei khakei hi. Hrih lii bang zong, a lamdang mahmah hibek thamlo, a munin nopci in etlawm mualkuam (Landscape) hawih mahmah ahih manin, Ciau-gallam aa Mizo gam khuamite bangin, week-end simphialin khua pha peuh leh, excursion leh picnic pai na cihbangin anei tawntung uh hi. Ei lam kumpite in a limpuah zawh kei uh hangin, Rest house, Camp om niknek tei hi. En ih hihleh, ei gamsung cih bek ding zong hilo, ih innkuun ih phaaitamh cihbang aa a om ahi kimlai, khangkhat in khatvei zong apai zolo zong ih omthei lai ding hi. Pau Za Mung