Zomi Ngeina Khuado Malaysia ah nopcitak in kibawl

Zomi Ngeina Khuado Malaysia ah nopcitak in kibawl

Zomi Khuado Malaysia ah’
Zomi ngeina KHUADO pawipi Malaysia Khuapi Kualalumpur Chinwoo tualpi ah Phalkha kiam ni 7, 2014 Oct 15 ni in mipi atul tul asim tammpi in nopcitak in bawl thei uhhi.

Zinmang pupi te:
Malaysia ah Zomi Ngeina Khuado ah Zinmang pupi Pu Hang Khan Lian, hi in lengna maitang zahtak te ah Dr Hau Za Cin, Pu Pau Khat Suan, leh India pan Sya Mungbawi te hong kihel thei uhhi.

Hun kipat hun:
Malaysia gambup Zomi kici khempeuh kikai khawm in Khuado bawl ahih man in agam la te ngak na kawm leh vainei te kigin na teng tawh ki vangkim pen ding in sunhun daak 12:00 lian in Zomi ngeina KHUADO hun kipan lian uhhi.

Hun hon lasakna mipi:

Zomi Idol makaihna tawh hun hon lasakna Zolaukha paalluun ding hi’ cih la tawh noptak in mipi dingto zeizai in hun honna la kisa ziahziah hi.

Hunhon thu genna ZAM Innteekpu.

2014 Zomi Ngeina Khuado Malaysia ah Khuado Hun hon thu genna ZAM Lutangpi Pu Hau Suan Khai in hong nei khia hi. Athugen na ah amasa penpen in lungdamna thu pulakna nei hi. Lungdam na thupulak na ah hihbang Khuado pawi bawl zawhna ding in Khua kipawlna, Biakna kipawl na pan in neihsa iksit hetlo in mapan khop na te tung ah lungdam na leh mimal mahmah pan in aituam vilvel in Zomi Khuado hanciamna lungdamna lungdamna pulak khiatna diktel kician limcii tak in mipi tungah lungdamna thu tangko khia ziahziah hi. Khuado icih kumkhat ah khatvei bek hi a, Khuado pawi pi anei ei Zomi te hi in Zomi te neih pawi lian pi min KHUADO ahihi.

Tukum khuado pen Khangno te lampi thum tawh kimakaih in makipang hi. Tua te in Kimawl uk te ading in Zomi League, Kipuah kizeem design leh ngeina van puahnuam te ading in Zolia Zotaang, leh Minam la, Ngeina gamit gam ngaih la, Pasian phatna la, Zawl lawmngaihna la uk te ading in Zomi Idol leh Khangham thuthei khin te ading in Zomi Dramma tawh khuado pawi ibawl khawm ihihi. Malaysia ah Zomi khua 80 val leh Biakna pawlpi 20 val kipawl khawm Zomi Ngeina Khuado pawi abawl khawm thei ihihi. Hih thuteng hong gen khit ciang in K.. Khuado pawi Kumkhen pawi mipi te tawh kiawng khawm ziahziah hallpisung thuumging dammdamm hi. Lungdam mahmah cih tawh hunhon thugen na nei thei hi.

Zomi Khuado ah Thugen kop thuhilh na (Drama) akhatveina

Tutung Zomi Khuado Malaysia ah Thugenkop ( minihsang tamzaw in thulu khat genna) Thuhilhna Drama leitungbup Zomi Khuado pawi pi ah akhatveina bawl khia uh hi. Hih Thugen kop ah kihel na ah Zomi veve kham leh zaang piang te khuasak zia kampau zia leh Theih huai thugil kidotna te tampi kihel ahihi.

Akihel thute pan in. Akiho ziate pawlkhat’

Taang ciing asilh Saiha dial akimm veva Pu Zo pen puandaal pi sungpan hong pusuak khia khian khian in mipi mai munkhat ah tu gige hi. Pu Zo lung ngai in om dide hun laitak Zogam pan piang Mipil khat leh Yangon pan khang khia miciiim khat mun khat tekpan in hong pusuak kia leuleu uh a, Pu Zo tutna tawh kigamla lua lo lampi mun khat ah anih un hong kituak dihdih uhhi. Heih! Lawm Nang koi pan’ Hihihi Kei Zogam pan’ Nang e koi pan Yangung pan hing ei.

Koilai pai ding lawm Khuado pawi simding? Nang e… Kei Khauhthitxsa puai simm ding hi . Bang e Naptolh pawi e… Hilo Kauhthit sxa puai , aw… Kei Khuado pawi hi ven … Nang bang minam Zomi hing e… Nang e.. Kei zong Zomi mah ka ke maw.. Hymmmmm.hhaaa.

Tua bang ahihoho laitak uh Ciim nuai khua pa apilci mahmah talkolh veuvau khat hong tungdih dih hi. Hi tengthum hong kimu petpet uh a, Ni simna kha simna tawh buaisan tak in hong ho limm mahmah hi. Khat in Nisim na Mikang te azui nuam hi. Khat in Zomi nisimna zui nuam hi. Khat in amunmun agamgam tun na te azat bang bang in zang nuam zui nuam in ko kitot lawh phialphial ta uh hi.

Hihbang buai kawmkal ah Minam akidot ciang in Pu Zo pan vive ahih man in Pu Zo kiang ah thu dot ding hong kilungkim tapetpet uh hi. Pua Zo Kiang ah pai in Pu Zo kiang ah Pu aw Khasim na inei cih khat in adot leh nei mah hang ei ci in Pu Zo in dawng hi. Tua leh Khat in bangteng ahihiam acih leh Ziing kha, Gamkha, Tangvuihkha, Taangsih kha, Khuado kha, Tangkha, Phal kha, Noo kha, Kaau kha, Theinosih kha cih ahilh ciang in buaina veng ving hi.

Tuaban ah Pu Zo in la in thu’ thu in la acih mahbang in Kum khen e solkha dang e Zin in vangkhua zong hen lawm aw e..cih latawh mipil micimm kithuah khawm teng thu hilhna nei dikdek hi.

Minam lian cihtawh’ Mipil miciim te hong buai kik ta.

Zogam pan hong pai , Ciim nuai pan hong pai, Yangung pan hongpan mipil miciim te Puzo thuhilh na azak khit ciang in Minam lian hihna tawh hong ki ukpik simsim ta leuleu hi. Minam lian hihna ah Talkolh tawh mipil ahih man in Minam lian kisakna, Sum hau man in Minam lian kisakna , Min leh zaa neih man in minam lian kisakna, hiteng tawh ui meikang bang in hong buai lua mahmah uhhi. Tua hun tak in Thukhen siam Pu penglam hongsuak dihdih a Penglam thu dong uhi. Tua leh Pu Penglam in athu teng ngaihsak kawikawi in atawpna ah No bang minam cih adot Pu Zosuan Zomi hi ung acih kop ciang in Pu Penglam in talkolh pilna tawh minam lian hihlohna, Mithau mihau tawh minam lian hih lohna agen khiat khit ciang Minam thu ah minam lian kipawlna ahihna thu hoihtak hilh kik ciang Mipil Miciim te kipak mahmah uh a, makaih zia ding thei ung ci pah luanlaun tek uhhi.

Makaihzia ding te ah’

Gam leh nam ah namlian suahna ding in talkolh, Mithau, Sumhau te minam lian ahih loh lam hong thei ciang in Ciimnuai, Zogam leh Yangung pan ate in minam makaihna ding in koih zia ding hong theita uh a, ZRO, ZCD, ZIUSA, cih te hong theih teh Thukhen mangpi pa penglam zong WZC hong din khia ta leuleu hi. Tua pan in kipawl namin pen ZRO, ZCD, ZIUSA, WZC hita leuleu ahih man in Minam dialkhai tawh aut tek uh hong bawl khia lamhlamh uh hi.

Minam dialkhai vai buaina.

ZRO, ZCD, ZIUSA, WZC hiteng in zum hong hong tek hi. Adial khai uh hongkhai tek uhhi. Tua leh lam et hetloh kawm kal ah Leitung gam tuamtuam kimuh khopna khawm pi UN pai ding cih hih kipawl te sung pan sapna ngahlian ta hi. UN ah minam dialkhai ding koizaw tawh pai ding cih ZRO, ZCD, ZIUSA, WZC amau teng kei aa, kei aaa, cih thupizaw sak tek uh in hong omlaitak Thukhen Mangputal te nadial khai uh bel pary Dial khai hi in Minamdial khai naneih na ding un noteng khat vei kimuh khopna bawl un cih thu vai khak in apai san hi.

Tua khit leh Thukhun tawh buaina.

Dialkhai vai pen Party min dan tawh amau tum te in aneih dial khai ahih man in Thukhen mangpa vai khak ding in bawl ding thukim khin uh hina pi’n Thukhun bawl ding tawh Mipil talkolh, Miciim giltui, Mitei khuaval te hong buai mahmah leuleu uh hi. Hih thu hang in ZRO, ZCD, ZIUSA, WZC in minam a ding makaih zia kal suan zia ding Kumpi tungah thu lak ding phuttoh ding bangmah gel ngei lo in amau tum tek leh upmawh tek in hong sep leuleu uh a, thukhun kician nei Leitungbup huam Zomi nam kimakaih zia ding leh Amun agam zui kimakaih zia ding ali un khat nei nei lo leuleu tek hih man in amei dawi vive ih uh teh cih Thukhen mangpa in gensia ko nialthal ekh hi.

Tua ciang in Minam lain hihna ding zuih ding Ngeina kician, Thukhun, kampau leh laizat zia ding dong kimuh khopna bawl ding avaikhak khit ciang in K.. Khuado pawi Kumkhen pawi … S.. Sialsawm pawi kumcin pawi cih tawh kipak in lam hawm letlet bek uh hi.

Pu Hang Khan Lian Thu genna.

Zomi khuado Malaysia ah Zinh Mangpu ding in Singapore pan Pu Hang Khan Lian hong kihel thei hi. Pu Hang Khan Lian thugen na ah namdang minam liante bang in Pasian in ei zong hong bawl in Ni simna Kha simna, Ngeina anei minam ihihi. Pasian minthangta hen! acih khit lian te.

Pu Hang Khan Lian leh Mipi misialna ki pan ngeu hi.

Misialna ah Pu Hang Khan Lian in
Zogam Zingvai… Acih khit lian in mipi in.. Zomi’n honghen!..3#
Zogam Zolei… Acih khit lian in mipi in… Zomi’n Luah hen! 3#
Zogam neihsa… Cih khit lian in mipi in.. Zo mi’n zeek hen!..3#
Zogam thupha….Acih khit lian in mipi in … Zomi’n Ngah hen!..3#
Zomi te Leei’ in… Acih khit ciang in mipi in.. Pasian phat tahen! ,…3# ciziahziah in kiawng hi.

Tukum Myanmar Census ah Zogamsung vak kual kawikawi na pan in Ngawn gam Sai mun khua vai tung hi. Saimun Hausa abeh min akidot leh Samte beh na hihi. Tua teh Samte beh cih pen Ngawn sung ah om, GZA pu pi Simon Pau Khan En ahih ban ah Zo kual sungah zong tampi na om ciang in Samte beh veve Ngawn , Zomi, Zo cih Kawl mangpa hong neen suah napan kipawl khop theihna Zomi bup lam hil lamlak hong kipan thak bang in lampi hong vang in nithak hong suak tawh kibang in liang hi.

PU Hang Khan Lian in Mailam kalsuan zia ding gen na:

– Zomi khangthak te ZYA ah muibn tak in mapang semsem ding
-Maikum 2015 April kha ah Zosuan tuai lai khawmpi Zogam ah bawl ding
– Zomi Football Club India, Singapore, Malaysia, Thailand, Myanmar Tedim ah Zomi World Cup dinmun ciang bawl khia ding.
– Music tumsiam Leitumbup Zomi te in asiamna uh Tedim khua pi ah laksak ziahziah ding
-Leitungbup Lasiam khempeuh in Zogam leitang tungmahmah ah Pasian minphatna, Gam itna, Minam itna te ala mahmah in Zogam leitangtung ah sa ziahziah sak ding.
-Khang ham te ading GZA kimu khopna bawl ding.
– Khangno te ading in ZYA kimuh khopna bawl ding..
– Zomi Numei te ading in lampithak hong khia in Zomi numei kipattahna thak lampi kihilh ding
* Zosuan tuai lai khawmpi ih bawl leh Zogam sung hi ding a, aminmahmah paulap in TUNGTUANG ahih kei leh TUNGZANG KHUA ah bawl sese ding . Ahang Tung tuang leh Tungzang cih kam mal in Zomi ading paunak ah ahoih mahmah khua min hi zen hi. Ahihzong vailian te Tedim ah kimuh tuah ziahziah ding..
Zomi kicih ding alau laite kua mah pai kul lo’ Kei Zomi icih ding lau kilkel lo kahih mahbang in Hih lai Malaysia om Zomi khang no te Zomi kicih ding lau kilkel lo in Zomi Khuado ah nong pai na hihi.
Minsial thukhupna:
Zogam Zingvai…. Pasian in hawm hen!
Zogam Zolei…. Pasian in luah hen!
Zogam neihsa… Pasian in zeek hen!
Zomi phatna… Pasian in ngah hen!
Zomi Leeii in… Pasian phat hen!
* Zomi te ading in namsau nih kisamlo in Namsau khat bek kisam hi… Lungdam..
Zomi khuado athu kizomtom lai ding hi. Zoplai ding..

ZD sawltak nasem panpih Hau Thang..