Zomi leh Zogam – 2

Zomi leh Zogam – 2

1. Zomi Azai Ngiahsutlote: Zomi atangzaitakin angaihsunlote in nidang ZBC huamsung Chin State, Kalay- Kabaw – Chindwin valley, Yawgam leh Asho Chinte omna munteng huamsak hi. ZBC hunlaiin Zomi leh China akibangin kizanga, RC leh Laipian losiah pawlpi dangte omma hunin Tuiphum pawlpi bek hiin ZBC huam ah ki’om ciat hi. Ahi zongin 1995 ZBCM leh 2013 ZBC pan CBC kikhel ciangin Zomi deihlote CBC ah, Chin deihlote Zomi minpua kipawlna ah ahih kei keh, Chin deihte CBC ah, Zomi deihte Zomi kipawl na ah om a, akikhensiang sitset hita hi. Chin in Tedim, Tonzang, Cikha, Tamu, Kawlpi leh Zomite tennate biakna lamah huamzo nawn lo a, kiukna ah Chin state huam hi. Zomi in zong Zomi deihlo Falam, Haka leh adangte huamzo nawnlo a, Zomi mimal 240,000 pawl leh Chin mimal 300,000 kim tawh kikhen hita hi.

2. Zomi Atoi Ngaihsutte: Zomi atoi ngaihsutte in Chin nuai ah Zomi, Laimi, Khumi, Mromi, Lusei cihte om a, Chin pen ikikhaina ilukhu hi ci-in gen uhi. Ahi zongin kumpi leh biakna ah Zomi leh Chin akikimin kizanga, Zomi leh Laimi, Khumi, Lusei.. cihte akibangin kizang nailo a, Chin leh Zomi akituhteh leh akikim a kingaihsun hizaw hi. Zomi mipil ulian makai thuthei ding pawlkhat in Chin nuai ah Zomi ake khatin koih bek uh a, dahhuai mahmah hi. Kumpi kiukna leh politics ah zong Zomi leh Chin akikimin kingaihsun a, Chin kicihna ah Zomi, Zomi kicihna ah Chin kici lengzong akisantheihna pen Zomi leh Chin kikim a, Laimi, Khumi, Asho, Lusei leh adangte tawh akikimin kizang ngeilo hi.

3. Zomi Azangkhai Ngaihsut te: Zomi kicici napi Chin sangin akineusekzaw pawlkhat om a, Zomi min kipawlna hinapi Zomi deihlote tawh akipawl leh Zomi min ipuak hangin azo ahau alian peuhpeuh tawh kipawl theih ding hanciam ni aci kipawlna zong om hi. Zomi lutang leh talsuan dingin kizang napi, kampau leh lai ah,”Ei Tedim mite”, acinuam phadeuh leh ulian mipil mihau hileh ama pianken akhuapau azangkik nuamse pawlkhat om hi. Zum Signboard ah Zomi min suang lela napi asung leh asepna ah Zomi anial vinven om hi.

Lang Khan Khai
Zomi Times