Zomi leh Gamdang, Summaw Pilna ~ DK Khup

Zomi leh Gamdang, Summaw Pilna ~ DK Khup

“Zomi leh Gamdang/Summaw Pilna” cih thulu tawh kikupna te avek in kasim a, a hoih vive hi sa ingh. Hauhna (Wealth) leh pilna (Wisdom) pen khat zawzaw (Either…or) cih sangin anih ciang in kicinna (Complement) in ngaihsun ingh. Kumpi Solomon in Pasian kiangh Pilna a nget ciangin, Pasian lungdam aa Pilna banah Hauhna zong na piakthuah hi.

“Kham sangin pilna hoihzaw a, ngun sangin thutheihna deihhuai zaw hi.” Paunak 16:16 “Gibeon-ah zanin mang sungah Solomon’ tungah Topa kilang hi. Pasian in, “Nang kong piak ding hong gen in,” a ci hi. 6Solomon in, “Na nasem ka pa David’ tungah a lian itna kip na lak hi. Bang hang hiam cih leh cihtakna, thumanna tawh nangma mai-ah gamta-in, nangma tungah lungsim thutang hi. Nangmah in ama-a’ dingin hih a lian itna kip koihsakin, tuni-in ama tokhom tungah a tu ding tapa khat na pia hi.

7Tu-in, Topa ka Pasian aw, kei pen naupangno khat hinapi-in ka pa David’ munah kumpi-in na nasempa nong koih hi. Bangci gamtatin bangci nasep ding cih ka theih khat zong omlo hi. 8A lian, a phazah a kisim zolo, a tamna a kiseh theilo, nangmah in na teelsa na mite lakah na nasempa om hi. 9Tua ahih ciangin keimah in a sia leh a pha ka theihtheihna dingin na mite ukna ding thu theihtelna lungsim na nasempa hong pia in. Bang hang hiam cih leh hih a lian a tam na mite kua in ukzo ding ahi hiam?” a ci hi.

10Solomon’ thungetna in Topa lungkimsak hi. 11Pasian in ama kiangah, “Nangmah in hih thu hong ngenin, nangma-a’ dingin khan’sauna ahi a, hauhna ahi a, na galte thahzawhna ding ahi zongin hong ngenloin, a man thu na theihna dingin nang-a’ dingin thu theihtelna hong ngen na hih manin, 12en in, nangma hong ngetna bangin kong pia ding hi. En in, nangma hun ma-in nang tawh a kibang a omlohna ding leh nangma khitah zong nang tawh a kibang hong khan’lohna dingin pilna leh theihna lungsim kong pia ding hi.

13Nangma hunsung tawntung kumpi dang nang tawh a kiteh theihlohna dingin nangma hong ngetloh hauhna leh pahtawina zong nang kong pia ding hi. 14Na pa David in a tot bangin nangmah in ka lampite tawnin, ka thukhamte leh ka thupiaknate na zuih nak leh na khan’ ka sausak ding hi,” a ci hi.” – Kumpi Masate 3:5-14

“Solomon’ thungetna in Topa lungkimsak hi. 11Pasian in ama kiangah, “Nangmah in hih thu hong ngenin, nangma-a’ dingin khan’sauna ahi a, hauhna ahi a, na galte thahzawhna ding ahi zongin hong ngenloin, a man thu na theihna dingin nang-a’ dingin thu theihtelna hong ngen na hih manin, 12en in, nangma hong ngetna bangin kong pia ding hi. En in, nangma hun ma-in nang tawh a kibang a omlohna ding leh nangma khitah zong nang tawh a kibang hong khan’lohna dingin pilna leh theihna lungsim kong pia ding hi. 13Nangma hunsung tawntung kumpi dang nang tawh a kiteh theihlohna dingin nangma hong ngetloh hauhna leh pahtawina zong nang kong pia ding hi.” – Kumpi Masate 4:10-13

“Tua ciangin Pasian in ama lungsim sunga a koih ama pilna a ngai dingin leitung mi buppi in Solomon’ omna zong uh hi. 25Amaute khempeuh in letsong, ngun leh kham tawh kibawl nate, puante, myrrh paknamtui, a namtui nate, sakolte, leh la-sakolte, a kumkumin tampi tak hong puak uh hi.” – Kumpi Masate 10:24-25

“Pasian in Solomon’ tungah tehzawh lohin a thuk mahmah pilna leh theihna, leh genzawhloh lungsim zaina pia a, 30Solomon’ pilna in nisuahna lam mi khempeuh leh Egypt pilna khempeuh khumlet hi. 31Bang hang hiam cih leh midang khempeuh sangin amah pilzaw a, Ezrah mi Ethan, leh Mahol’ tapa Heman, Kalkol, leh Darda sangin pilzaw lai a, a kiima minam khempeuh lakah ama minthan’na kizel hi.

32Amah in paunak tul thum zong genkhia a, ama laphuah dawng tul leh dawng nga ahi hi. 4:32 Pau 1:1; 10:1; 25:l; Sol 1:1. 33Amah in Lebanon-a om taamtak-a kipan phungmai-a po puknahte dongin singkung thu a gen hi. Amah in khe li nei ganhingte, vasate, a bokvak ganhingte, leh ngasate’ thu a gen hi. 34Mi khempeuh leh leitung kumpi khempeuh sung panin Solomon’ pilna thu a ngai dingin ama pilna thu a zasate hong pai uh hi.” – Kumpi Masate 4:29-34

“Keimah in ka phawkkhiat thu in: Pasian in tomkha nuntak hih leitungah hong piak sungin, i sep thaman ne-in dawnin i om ding a hoihpen ahi hi. Hih pen mihingte’ thumong ahi hi. Pasian in mi khat neihlelam guan’in, a hauhna nuamtakin a neksak leh, amah lungdamin a sepna thaman ne-in a om ding hi. Tua nopsakna pen Pasian’ kiang pan ahi hi. Pasian in lungdamin omsak ahih manin a nuntak tomlam phawkin nei khalo ding hi.” -Thuhilhna 5:18-20

“Pasian in mi khatpeuh tungah neihlelam, hauhna, leh pahtawina pia-in, a deih khempeuh neisak napi-in, tua nate nuamtakin zangsak loin, midang khat in nopsaklawh laizang hi. Hih pen a mawknapi, a thuman hetlo khat ahi hi.” -Thuhilhna 6:2

“An in lung damsak a, zu in lung nuamsak hi. Sum in ahih leh na khempeuh a kicingsak hi.” -Thuhilhna 10:19

“Pasian in amah a lungdamsakte tungah pilna, theihna, leh lungdamna pia a, ahi zongin a hehpihhuai mimawhte ahih leh a sep bek sisakin, amau’ thalawhsa khempeuh amah a lungdamsakte tungah a piaksak hi. Hih pen a mawknapi taktak, huihpi nungdelh bang bek ahi hi.” – Thuhilhna 2:26

“Hih thute khempeuh banah gen ding thu khat bek om hi. Mihing hong kipian’sakna a thu bulpi pen in: Pasian zahtakna leh a thupiakte man’na ahi hi. A pha hita leh a sia hita leh a simthamin i hih simte nangawn i hihna khempeuhah Pasian in thu hong khen ding hi.” – Thuhilhna 12:13-14

“ZOMI, ZOGAM mailam nuntak khuasak na sungah, ei a MIMAL mahmah a kipan GAM leh NAM a’ ding mainawt a i khantoh semsem theihnading in SUM le PAAI leh (or) PILNA SIAMNA, koizaw thupisak masa zawleng a hoihtam?”

Hih tawh kisai in thupi masak zawk ding pen mimal, innkuan dinmun zui in ngaihsut huai kha dinghi. Gentehna in, Sia Hang Khan Lian leh Siapi/Pastor Dongbawi tate aa dingin sangkah na ah haksatna tam khol lo kha ding aa, ahi zongin gamdang tung thak laitaan sang a tung lo nulehpa i tate aa ding in sangkah na ah haksakna tuamtuam hong ki pan pah kha dinghi. Gamdang tuamtuam te sin dan tam theih kei ingh , a hi zong US elementary, middle sangte bangah sang naupangte Homework/assignment te nulehpa in buaipih makaih ding ki sam mahmah hi.

Library ah laibu simpih, kawmpih, Internet ah assignment bawlpih cih bangin nulehpa tungah tate pilna ding tampi ki nga mawk sa ingh. Van leina, zato paina cih bang thu tuamtuam te ah zong tawmbeek English thei kei leng hamsa mahmah pah dinghi. Tua a hih man in hih bang aa makaih na ah haksat na a nei ding nulehpa, mailamnulehpa a hi dingte, mimal khat peuhpeuh te a ding in a diakdiak in Basic English (English as a Second Langauage), computer literature beek hong sin thei pah uh leh thupi mahmah ding in ka ngaihsun hi.

GED , Adult Education classes tuamtuam zong a kah zo te a ding in thupi dinghi. Innlam banga khawhsa ngak aa ki om lo in, i nisim nuntak na ding i buai pah hong kul hi mah ta leh utna a nei taktak te aa dingin lampi om veve dinghi (If there is a will, there is a way). Refugee agency, Public library, pawlpi pawlkhat, human resource zum te cih bangah a tam zaw man gen lo ( free of charge), hun tuamtuam mah in ki kah thei aa, laibu, dictionary, internet pan in zong sintheih na tuamtuam a hoih tam mahmah lel a hih man in lampi a om cih ding in ngaihsun ingh.

“SUM zongpahte lah PILNA zongmanlo, PILNA zongpahte lah leiba tha’ngba tawh bekthamlo in, INNlam khakloh phamawh hizel, SUM leh PILNA lah hunkhat sungin kizongkhawm luanluan zoden samlo, ei pilna puakcianglah kuaman ong deihgawhlo.. .thatang bekmah hizawpian in tualah sawtvei kikhom loding hizelsi.”

A tunga pen thu kim mahmah ingh. Hih thei leh mikhat pen thum ki pha thei in, khat in Pilna sinsin, khat in innlam sum khak ding thalawhlawh, a dang khat in mailam aa ding sum thalawhlawh thei leng. “Nisim na semsem, sum lah ki khol zo mahmah lo,sal tawh kibang phial hang” a cici zong ki tawm lo hi. Pilna sinna sum tam bei mahmah aa, Pell Grant , scholarship , sponsor nei in sum bei lo, a hih kei leh sum tam bei khol lo in sang na kah thei hangin, na sang kah na hangin opportunity cost tawm lo veve mawk hi.

Lampi Hoih Na Muh Leh Zui Pah In:

Sushi sai hoih na ngah khak leh hoihtak sem suak pah in. La lam, kimawlna lam, computer lam cih bang tuamtuam kivak na lam te (talent) ah na ki vak, mitampi sang na siam zawk (Extraordinary) mahmah leh tua lam zui suak pah in. High school zo lo, college degree na zawh man kei leh lungkia kei in, leitungah enterpreneurs lawhcing Bill Gates, Michael Dell, Walt Disney, Henry Ford, Mary Kay Ash, Richard Branson cih te high school man lo, ahih kei leh college man lo aa khol ( college drop out ) te a hi uh hi. Richest self-made American Billionaires te zong college degree ngah leh ngah lo te ahi uh hi. Golfer minthang Tiget Woods zong hunbit ki mawl ding in a sang kah na pan na khol phot hi.

A hi zong in abeisa kum (13) sung leitung aa mihaupenpa a hi Bill Gates inzong kum (30) val khit teh a college kah na lui Harvard University pan in honourary degree khat na ngah aa, “I’ve been waiting for more than 30 years to say this: Dad, I always told you I’d come back and get my degree… I ‘ll be changing my job next year, and it will be nice to finally have a college degree on my resume” na ci hi. Yahoo! founders Jerry Yang leh David Filo , Google founder Sergey Brin leh Larry Page te uh zong nikhat ni teh Stanford University aa a PhD sin uh zop theih dingin a khun la uh hi. Sumhau in, na sepna ah i lawhcing mahmah zong ni khat ni teh degree mah lunggulh na ciang khat om veve leh kilawm hi.

Sangkah Zo Ding Dinmun Na Hih Leh Kah Pah In:
High school diploma, college degree te nasep na khempeuh ah ki sam lo aa, a hi zongin professional Job pawl khat te hoihtak kiciantak in na sep theih na ding leh kimuanna na neih na ding in degree na neih kei leh hong ki sem sak lo kha dinghi – Doctors, lawyers, teachers, cih bang lamte.

US Census Bureau of Labor Statistics in (kal khat sum sanna) Real Weekly Earnings of full-time wage and salary workers, High School Diploma (or equivalent) $280-$966, Bachelor’s Degree $423-$1,720, Master’s Degree $520-$1,893, Professional Degree $552-$2,881, Doctoral Degree $635-$2,313 ci hi.

Bible college degree, seminary degree lo tawh Pastor, evangelist cih bang ki sem thei aa, degree ngah lo aa Pasian mizat mahmah ei Zomi sungah zong ki tawm lo ding hi. A hi zong in Laisiangtho sang aa laihilh ding cih bang nasep na te ah degree lo tawh hong phamawh kha dinghi.

Evangelist minthang mahmah Billy Graham, America’s Pastor , Pastor to Presidents in, “All I had was a college degree, and I didn’t go any further. I wish I had. But I wish — one of my great wishes is that I had gotten more education” na ci lai hi. Laisiangtho sinna lam ahi zong, leitung lam a hi zong a hi thei bangbang in a sang penpen dong mah sin suak zo leng kisik a om lo zaw ding dan in mu ingh.

Sin thu (Program of Study), sang khat leh khat, mimal khat leh khat sum ngah dan, uk dan ki banglo ding hi. U.S Department of Labor , in Fastest growing occupations, 2006-16 , Occupations with the largest job growth, 2006-16 , Carreer Guidance , cih bang Frequently Asked Questions ah hoihtak koih aa sang zom thak ding te a ding in ngaihsun huai thu hi. Hih zo leh Best High Schools, Best Colleges and universities te ah zom zo leng a hoih pen dinghi. Ivy League sangte ah kah zo ding hanciam huai sa ingh.

A sum in a tam bei pawl sang hi tuan lo in Admission Tests te ah sang ang leh merit-based scholarship tawh a kah zo pawlkhat om hih tuak hi. Graduate sang undergraduate admission haksat tuak zaw hi. A huampi in sang man teh nasep muh ol zaw, sum tam sang zaw leh ki lawm hi. College kipan tung te aa ding in Community colleges ah kah leh inn tawh ki nai leh sum bei tawm hamtang thei hi. State Universities te ah in-state tuition tawh ngah leh sum phatuam ding hi.

Laisiangtho lam sang te ah Independent Baptist Schools, Theological schools of North America, Southern Baptist Schools, Evangelical seminaries and Theological Colleges, cih te ah i kah nop tawh ki tuak in om ding lamen ingh. Sang ah i kah ma in tua sang i accreditation status thei huai kha dinghi. Laisiangtho sang pawlkhat accreditation agency tawh ki zop lo hoih a sa zaw pawlkhat om aa, tua lo secular sangte a hih leh regional, national accredited sang a hih kei leh nasep zon na haksat na om thei ki ci hi. Sang pawlkhat te leuleu accredited lo hang sang minthang, sang hoih mahmah leh nasep zon na ah zong lem mahmah sang zong om tuak veve hi.

Na Hih Theih Bangbang Lamin Pilna Ngah Sawm In:

Internet users ( 1.7 % of the total population ) a hi Cuba gam Communist makaipipa Fidel Castro in, ” Whoever has a computer has all published knowledge at their disposal and the privileged memory of the machine belongs to them too” na ci sam hi.

Sang minthang Massachusetts Institute of Technology (MIT) in free Online Courses (1800) nei aa, Yale University in zong Online Video Lectures and courses pawl khat nei hi. Open Culture in Free Online Courses and Lectures from great universities link hoih tak khat nei hi. Wikipedia in zong Wikiversity cih nei in university aa ki sin subject tampi tak courses nei hi. Apple Company in zong iTunes U cih nei hi. ( over 50,000 educational audio and video files from top universities, museums and public media organizations from around the world )

Half Price Book Store, Amazon.com , ebay.com cih bang te leh University Book store cih te ah laibu lui ki man mahmah in kingah thei hi. University textbooks te bukhat teh US$ 100 kim bang man thei aa, a hi zong new edition om in sangkah kik ah ki laih leh old edition pen $ 5 bang in ki ngah thei hi. Kum sim phial in text book new edition om sak aa, a taktak in tam lua ki laih peuhmah lo hi. Nasep pawlkhat te ah college degree neih ding phamawh ding aa, a hi zong pawlkhat te ah thei peuh leng hong ki cial dinghi. Pilna zongnuam taktak te ading in lampi tuamtuam om cih ding hi sa ingh.

Internet, Web portal, Zomicenter, Zomi, Blessed Zomi, Zomi Innkuan kipawlna khat peuhpeuh cih te i Yahoo groups, cih te tuamtuam pan ki zom in haksatna te ki kum, thu leh la tuamtuam ki hawm sawn den ding thupi sa ingh. A hi thei peuhmah in Broadband Internet service lak huai hi. A diakdiak in US gam pen internet zang a tampen na gam hi na pi, ei Zomi te internet service inn aa nei lo ki tam lai kha dinghi. Pawlkhat ten Internet, email zat dan sin ding in zong a tuat lo ki om lai hi. Thu theih nop leh lawmte phone set ziauziau thei zaw uh hi. A hi zong in Computer hunsung ah hihte hih thei lo in nei kei mawk leng tampi khantot na ah ziakai tuam mahmah ding hi hang. A diakdiak in khangthak naupang te a ding in ngaihsut sak huai mahmah hi.

Top 10 Solution For Educating Our Children (By Bill Gates)

Zomite khantotna ding in:

Laisim minam, lai gelh minam hih sawm ni. Oral Relational Society pan in Analytical Culture ah ki laih sawm ni. Thuman, thu leh la a hoih zaw i muh, i theih zawk na ding in kiseelna ( Debate) tha pia ni. Minamneu Zominam te i picin, midang ten hong theih, hong pi muh zawh na dingin, midangte sang kidawk veva mah leng…

Sum zong te zong hau veva in, Pilna zong te zong pil veva mah leng…. Ngelh khialh na om leh ki mai sak ni. Deihsakna bek tawh ka muh dan kong at hi. Kei zong bangmah ka hi zo nai kei aa, kei leh kei a ding in zong tha ki piak kawmkawm mah in ka at a hihi. Zomi sungah, D.K. Khup (New York)