Zomi le MRTV Channel ~ Gin En Cin

Ehei!! mawk aw, lap kei hang ei!!!

Tedim in District i ngah ding hunin don loin i ngah loh teh a kua mahpeuh kingawhin tuate in thudon lo hi ci-in kingawh hi hang. Tua pen ahun lapin thei napi a thudon mel i om loh hang mah hi ding hi.

A nungah kisikin i nung hanciam hangin kingah nai lo hi. Tua pen paunak in “Thu nawtheih le sa nawkap aval” kici hi. Tua mah bangin tu mahmah in i mai- ah Zomite adingin thu lian mahmah khat om a tua pen MRTV channel kibehlap ding vai ahi hi.

Zogam bup ah kamphen kul lo a kampau kithei a tampen ei Tedim Tonzang Tsp le mun tuamtuam a om Zomite in i zat hih ka lai gelhna “Zokam” ahi hi.

Ahunin kinin phu hileeng Zogam bup ah MRTV channel a ngah masapen ding i hi hi. Ahihangin tuni dong ngah nai lo hihang. Hihpen i phut loh man maw i kin loh man hi ding hi. Hih pen Zomite i supna lian mahmah le mi i bat lohna khat hi.

Tua ahimanin a phu thei ding leh a kin ding kipawlna tuamtuam = TA, ZYA. ZCD le GZA-te in thupi ngaihsutin amunmun pan ahizong kikum khawmin ahizong hong phu uh henla Zomi biakna pawl tuamtuamte in i pawl ciat ah tu-a kipan thungetna tawh pangkhawm leeng ci-in i Zomite ading deihsakna tawh kong tangko uh hi.

Tu in i thudon kei lai leh

“Ehei!!! mawk aw lap kei zel hang ei!! ci zel ding hi hang.

H. Gin En Cin
Coordinator
– ZCA