Zomi le Khangthak te mailam ding ~ Rev. Pau Khan Khai

Zomi le Khangthak te mailam ding ~ Rev. Pau Khan Khai

Thupatna le lungdamkohna
Zomi a hong bawl Pasian tungah lungdamna ko masa ing. Leitungah pau nam tampitak a om hangin ei pau zahin khum ka sak om lo hi, lai tampi a om hangin ei lai zahin khum ka sak om lo hi. Ngeina tampi a om hangin ei ngeina mah thupi ka sa pen hi. Tutungin ZYA kum 10 cin Magazine adingin Makaite’n article gelh dingin hong vaihawm ciangin ka lungdam mahmah a, ka lungsim sunga a omden thulu khat ahi, ‘’Zomi le khangthakte mailam ding’’ cih thulu tawh ngaihsutna gawmkhop ding kong geel hi.

Zomite dinmun lui hoihlo thu (10)

• 1) Tualthat ngei minam hi hang.
• 2) Phu kila minam hi hang.
• 3) Hamsiat a zang minam hi hang.
• 4) Pausia a zang minam hi hang.
• 5) Mailam thu ding a genngam lo minam hi hang.
• 6) Khatlekhat a kimawhsaknuam minam hi hang.
• 7) Khatlekhat a kigensianuam minam hi hang.
• 8) Ei le ei a kimuangngam lo minam hi hang.
• 9) A beisa thu bek buaipih in mailam a kihta minam hi hang.
• 10) Lungdamkoh sangin a thumthum minam hi hang.

Tulaitak Zomite dinmun nam (10)

• 1) Gam tuamtuamah a kithehthang minam hi hang.
• 2) Ei le ei kimuan ding a hanciamte hi hang.
• 3) Minam tuamtuamte lakah a nungtate hi hang.
• 4) Siatna le hoihna tuamtuam a sinte hi hang.
• 5) A nungta Pasian biak ding a hanciam mahmahte hi hang.
• 6) Mawh kimaisak ding a kisinte hi hang.
• 7) Pawlpi lungsim panin Biakna lungsim ah a hanciamte hi hang.
• 8) Ei lai ei pau a manphatna a telte hi hang.
• 9) Khatlekhat kipawlkhop ding a thupisakte hi hang.
• 10) Mi’gam mi’lei ah dinmun kician a neihsawmte hi hang.

Zomite le Pasian thu kikhen theihlohna thu (10)

• 1) Pasian thu in Zomite mit hong vaaksak.
• 2) Pasian thu in Zomite lai hong guan hi.
• 3) Pasian thu in Zomite damna hong pia hi.
• 4) Pasian thu in Zomite gamdang hong tun hi.
• 5) Pasian thu in Zomite hong lamsang hi.
• 6) Pasian thu in Zomite hong kipumkhatsak hi.
• 7) Pasian thu in Zomite vision hoih hong pia hi.
• 8) Pasian thu in Zomite ngaihsutna thak hong pia hi.
• 9) Pasian thu in Zomite anlim hong nesak hi.
• 10) Pasian thu in Zomite lawhcinna hoih nono hong pia hi.

Zomite lelh mahmah thu (10)

• 1) Kipahtawina.
• 2) Kimaisakna.
• 3) Kipumkhatna.
• 4) Kitheisiamna.
• 5) Kizopsiamna.
• 6) Thuakzawhna.
• 7) Midangte ahoih a muhtheihna.
• 8) A gualzote lungdampih siamna.
• 9) Migentheite hehpih siamna.
• 10) Ahun lap-a khentat theihna.

Zomi khangthakte phawkmasak ding thu (10)

• 1) A nungta Pasian zahtak siamna nei-in nu le pate zong zahtak siam ding.
• 2) Kampau zui-in kikhenna piangsak loin ngeina le pau kibang teng lungsim kikhat in kalsuankhawm ding.
• 3) Makai a i koihte muanna tawh a nung zuisiam in, makaite’n zong mipi ading na semsiam ding.
• 4) Gamsung gampua-a om Zomite kizopdan siam in, ei mun tek pan ma pangkhawm ding.
• 5) Pilna lam mahmah ah kipantah in, khatlekhat kipanpih siam ding.
• 6) Nidanglai-a i pi i pute, i nu i pate khasiatnate mangngilh bawl in, thuthak le thuhoih tawh mainawt siam ding.
• 7) Na hoih sem kidem in khatlekhat na hoih sepna tawh kizom ding.
• 8) Papi bangin thu ngaihsun in, khangno bangin nasem siam ding.
• 9) Nunglam en siam in, mailam nawt siam ding.
• 10) Minam dangte hoihna thusimte ei sungah zangsiam ding.

Zomi Khangthakte etteh theih ding Lai Siangtho sunga mi thupi (10)

• 1) Abraham bangin Zomi khangthakte’n up ngamna le sin ngamna nei ding.
• 2) Moses bangin thukhualna le kiniamkhiatna nei ding.
• 3) Joshua bangin hangsan takin mainawt ding.
• 4) David bangin Pasian sathau nilhna ngah sawmciat ding.
• 5) Elisha bangin citak takin mainawt ding.
• 6) Daniel bangin pumpi siangtho takin nungta ding.
• 7) Esther bangin minam adingin palai semngam ding.
• 8) Joseph bangin vision lianpi nei ding.
• 9) Jacob bangin Topa’ inn Bethel tunkim sawm ding.
• 10) Peter bangin Jesu adingin kiphal den ding.

Zomi khangthakte etteh theih ding leitung mi thupi (10)

1) USA President masa George Washington bangin Pasian kammal simin thungetna tawh mainawt ni. (1789-1797)

2) Norway gam Khristian gam a suah nadingin sihna athuak ahi St. Olav bangin Singlamteh masakin namsau nunun ni. (1035 AD in si)

3) Israel-te state ngah 1948 May 14 ni-in Kumpi sem thei ding mi nih pen panmun kikhiat in, nasep kituh uh a cih bangin mainawtsiam ni. (David Ben Gurion leh Albert Eistein)

4) USA gam salte suahtak nadingin Rev. Martin Luther King in “I have a dream”, a cih mah bangin minam adingin vision thak nei ni.

5) Singapore PM masa Lee KuaYua in 1965 August 9 ni-in Singapore gamah tui le an a pianloh hangin vision thak kong piangsak dinga nidang ciangin leitungah minthang mahmah ding hi, a cih bangin vision thak nei ni.

6) Pasian mizat minthang Dr. Billy Graham in 1938 kumin a ki-apna ah “Topa aw nong zatnop bangin hong zangin kei kiphal ing”, a cih mah bangin Pasian le i mite adingin a kizo sa-in omden ni.

7) Pasian mizat minthang Dr. Younggi Cho in 1958 kumin pawlpi mi 4 bek nei pan taleh ni khatni ciangin mi tein 4 bang ka nei ding a cih khitteh kum 1991 in pawlpi mi tein 4 bang a neih bangin den ciangin Pasian in Zomite hong pungsak mahmah ding cih lam-en khol ni.

8) USA President 35 na John F. Kenedy in 1963 kumin nikhat ni ciangin American mite in khapi tungah bu va nei ding hi hang a cih khit kum 1969 July 20 ni-in Amstrong-te mithum khapi tung vatung uh a, cidamin hong ciahkik uh hi. Tuamah bangin ei zong mailam ading muhkholhna tawh thugen ni.

9) USA-te Constitution masa pen kum 1639 January 14 ni-in Rev. Thomas Hooker makaihna tawh Thuhilhkikna 1:13, 15 tungtawnin a kigelh khiat mah bangin Zomi khangthakte’n Pasian nasemte tawh kipawl siam den ni.

10) Zogam le Zomite sunga Siampi sem masa pen ahi Sangmang Dr. East (aminpi- Erik Hjalmar East) bangin Sweden gam pan piangin USA gamah kum 20 aphak in pem uh a, a nu in kum 4 aphak in sihsan a, apa in kum 21 aphak in sihsan taleh Southern Baptist Theological Seminary, USA ah kum 1897 pan 1901 dong Pasian kammal sin in sang nakah in, kum 1901 December 11 ni-in Zogam a Missionary dingin Newyork pan hong dingkhia a, kum 1902 March 10 ni-in Kalaymyo hong tung hi.

Zomite sungah Pasian thu um masa pen ahi Pu Thuam Hang le Pau Suan-te kum 1905 in tui naphum a, kum 1906 in Rev.Vial Nang Zomite sunga Siampi masa pen pa zong tui naphum hi. Zogam ah a khe tawh khua tampi hong zin hi. Ei Khangthak Zomite zong hih Sangmang pa mah bangin i gam le i minam puah in Dr.East-te maban zom ciat ni.

Zomi Khangthakte’n mailam ah i manawh ding thu (10)

• 1) Zomi min tawh kipawlnate in muibun in lawhcing ding.
• 2) Beh kipawlna, khua kipawlnate dam damin hong kiam ding.
• 3) Pawlpi denomination sangin biakpiakkhopna thupi toto ding.
• 4) Thusia lam sangin thuhoih lam vive ah kidem ta ding.
• 5) Makaite le mipite zong kizop dansiam ta ding.
• 6) I gam i lei puah nopna lungsim khang semsem ding.
• 7) Leitungbup ah mihau le miliante sungah Zomite kihel ta ding.
• 8) Minam vai-a kimuhkhopnate ah Lai Siangtho simna le thungetnate zang tawntung ding.
• 9) Zomi ihihna (Identity) pen hangsan takin kalsuanpih ngam ta ding.
• 10) Pasian tungah lungdamkohna thupisakin gualzawhna tampi ngahbeh ding.

Thukhupna le lungdamkohna

Pasian hehpihna tawh a beisa kum 28 sung Lungdamna Gospel thu tang kona le a beisa kum 22 sung Pastor nasepnate ka etkik ciangin Pasian in Zomite hih kum 20 sungin a lamdang takin hong makaihna ka mu a, lamdang ka sa mahmah hi. Zogam adingin kum 2008 October 1 ni-in Jesu hankhuk sung ka lut lai-in Topa in Zosiam Ministry hong pia in tun Zomi cina mi 11,689 (2009-2013) sungin Zomi Siavuan le Siamahte zangin Topa in hong bawlsak khin ta a, Zosiam nasepna sunga a kihel active members khempeuh tungah zong lungdamna ka nei hi.

Kalaymyo ah Agape Education Center ci -in sangnaupang hamsa deuhte adingin a free in tuition sinsakna kum 2012 panin Topa’n hong neisak in tu in mi 60 in itna gah laipilna ngah toto uh hi. A diakin tutung in ZYA (Zomi Youth Association) te in a kipat tunglai-in lungkiathuai le thanemhuai tampitak om taleh tu-in Pasian makaihna tawh kum 10 bang hong cingto ta a, kumpi lampan theihpihna ahi zongin gahhoih tuamtuam tampi om ta ahih manin, Pasian tungah i lungdam mahmah hi.

Khangthak Zomite adingin hih ZYA in khalam le taksa lam adingin lamthak hong lak le lamthak hong musak kipawlna hi dingin ka um hi. Tunung kum 2014 August 26-28 sung Zomi Innkuan USA min tawh UN zumpi Newyork ah Meeting le Conference ka kahna panin ka phawkthak thu khatin kumpi gam kipawlnate pen Civil Society kipawlna tuamtuamte’n nakpi takin a panpihna le a makaihna ka mu ahih ZYA dan a Civil Society-te pen mailam ah hong thupi mahmah ding hi. Topa Pasian in hih laisim khempeuhte tungah a vangliatna hong kilangsak ta hen.

Rev. Pau Khan Khai
International Consultant – ZYA, Myanmar
Church Pastor – Bethel Zomi Baptist Church, Kalaymyo
Church Pastor – Zomi Christian Church, Louisville, KY, USA
Crusader – ZBCM
Vice President – Zomi Baptist Churches of America (ZBCA)