Zomi khangno te aa ding Computer Programming

Zomi khangno te aa ding Computer Programming

Zomi khangthak sungah, set-khuak pilna lam tawh kisai a sin-nuam khat le nih a om zeuhzeuh dingin ka lamen hi. Pawlkhat bang pen, a lamhilh ding omlo ahih manin, a tun’ zah ding tan uh, a tunglo kitam mahmah hi. Adiak-in, tua bang dan khangno-te ka vei phadiak hi. Tuhun teh, Smart Phone hun ahih tawh kituak-in Computer lam akhoih ngeilo kitam nawn samlo i hih manin, hih Computer Programming akci set-khuak kampau-te telzawhlo’ ding ahi nawnkei hi.

Computer Programming i cih ciangin, computer hardware-te i ut bang aa sawltheih na ahi, set-khuak kampau cih ding ahi hi. Mihing-te khat le khat i kizop nading-in, paukam aki sap zah khat in, Computer-te zong, paukam kisam uh hi. Computer paukam-te pen, programming language kici hi. Computer & Smart Phone tuamtuam-te i zat sial in, computer paukam ten, i khoih nana khempeuh amau paukam tawh ong na let(interpret) sak ahi hi. Computer tawh i zat khempeuh lai i khet sial, i email zat sial, facebook zat sial a vekpi in, programming tawh a kigelh ahi hi.

Computer Programming Language-te theih ding le siam ding pen, a baihlua bel nahi sam’ lo hi. Ahi zongin, mihing-te pau namdang khat sin ding sang’in baihzaw hi kici hi. Software Engineer khat in, programming sin pen, mikang lai (English) sin sang’ baih kasa zaw hi ong ci ngei hi. Programming Language paukam-te pen a nam-in a tam mahmah hi.

Low-level le High-level in zong kikhen toto lai hi. Low-level te pen, system language zong kici hi. Low-level programming language te pen, scientist te zat hi phadeuh hi. High-level programming te leuleu pen rocket science hisam lo in, a kitheizo ding thu nahi hi. Tua-te lak pan, pawlkhat a gen ding hileng, C, C++, Java, VB, C#, Ruby, Pascal, COBOL, FORTRAN, ASP, HTML, XML, JavaScript, Vb-Scripts, Python, PHP, JQuery, le a dang tampi a om lai hi.

Kammal zatzia in ah, programming paukam-te zangh-aa a at thei-te pen Programmer kici hi. Coding cih ciang in Program at cihna ahi hi. English language ah Vowels le Consonants te tawh aki at sentence laigual-te a om mah bangin, programming-te ah zong, code cih-te a om hi. VB program at/code siam-te pen, VB programmer kici in, C# program code/at siam-te pen C# programmer kici hi.

Programmer-te in bel ahih leh, programming language khat sang’ a tamzaw a thei hamtang uh hi. Khasum lam pan en leng, Programmer-te khasum pen koikoi ah tam mahmah mawk hi. Programmer khat in bel, U.S. bang hi leh, atawm pen Upper Middle Class ciang ah a innkuanpih-te a nuntakpih zo uh hi.

Ahi zongin, hih dinmun tun nang abaih pak bel ahi khol kei hi. Programmer tampi takin, sum tampi bei-in, programming-te a sin uh aa, kum tampi mah hun apiak uh akul hi. Programmer suah theih nading a thupi mahmah nam (2) om kasa hi. Tua-te (2) pen, Programming code -te sinsawm ngiat ding, Programming Code tawh hunzat nuamsa ngiat ding cih thu-te ahi hi.

Azen zen in, nang zong, set-khuak pilna paukam ahi Programming a uk khat nahih leh, hih ka thului pen manpha nasa kha ding hi. Tua hilo-aa, bang hi peuh mah ahiam ci-aa, a ommai pihnuam khat bang nahih zenzen leh zong, CodeAcademy pen nang aa dingin a manpha mahmah ding hi.

CodeAcademy ah aval khong takin, Programming paukam-te nasin thei ding hi. CodeAcademy ah, hih anuai-aa set-khuak Computer paukam-te nasin thei hi.

• Website bawlzia
• HTML & CSS
• Ruby Programming
• SQL
• Java Programming
• jQuery
• PHP
• Python
• Command Line
• Adang tuamtuam

Khaileh.. a lungluut-ten hiah https://www.codecademy.com/ napai un. Nicholas Pau