Zomi Foundation Fund Sumdonna leh Committee Theihsakna

Zomi Foundation Fund Sumdonna leh Committee Theihsakna

ZIUSA Ngiimna Bulpi khat ahi “Zomi-te in minam kician, minam picing semsem dinmun khat atun’ zawhna dingin kipawlkhawm in vaihawmkhop theihna ding” cih tawh kizui-in ZIUSA kipawlna in Zomi kipawlna tuamtuamte tawh kipawlkhawm in Zomi minam kician, minam picing semsem dinmun hih zawhna ding in vaihawmna, sepkhopna ki nei zel hi.

November 8, 2015 (Sunday) ni-in akibawl Kawlgambup Kiteelpi ah mipi thuneihna tawh ki-ukna (Democracy) lampi tawn a akalsuan party-pi National League for Democracy (NLD) in gambup huam in gualzawhna lianpi ngahna leh Zomi minpua party ahi Zomi Congress for Democracy (ZCD) in Zogam ah Gambup Thubawlpawl Palai-te (MPs) ding in Zomi makai mi (4) leh Zogam Thubawlpawl Palai-te dingin Zomi makai mi (2) in teelcingna ngahna tungah Zomi akua ma peuh ki lungdam mahmah hi.

Hih kiteelpi kidemna ah Zomi, Chin cih bang minam minpua party (12) te lak ah teelcingna ngahzo ZCD party bek ahih man in atuam in Zomite ki angtang mahmah a, mailam ah Zogam leh Zomi, Chin vai tawh kisai maban lian tampi Zomite` liangko tungah hong om thei ding in lametna lianpi kinei hi.

Zomite mailam ah vai thupi, maban lianpi hong tung ding lametna tawh ZIUSA kipawlna in i hih theihna mun ah mapanna i neih zawhna ding in ZOMI FOUNDATION FUND sumdonna neih ding in, ZIUSA Thukhunpi leh Ngeina Dante tawh kizui-in, ZIUSA Board of Directors in kipsakna nei hi.

Zomi Foundation Fund pan in teelcingna ngah Zomi MP-te pawhtawina piak ding in thukimna kinei-a, Zomi movement (914-Zomi) maban mapang beh nang leh mailam ah, ZIUSA dinmun tawh kituak a, Zomi tawh kisai mapanna-te ah zat theih ding in thukimna kinei hi. Zomi Foundation Fund sumdonna ah tanu hong sem ding in muanna lianpi tawh anuai a bang in sehna kinei hi.

Zomi Foundation Fund Committee:

1) Pa Tual Sawm Lian, Tulsa, Chairman
2) Tg. Thang Mun Mang, San Francisco, Secretary
3) Pa Nang Lam Thang, De Moines, Accountant
4) Pa Thang Do Hang, Miami, Member
5) Pa Thomas On Sian Mung, DC, Member
6) Pa Thomas Piang, Nashville, Member
7) Pa Michael Lian, Houston, Member
8) Pa Do Khan Khup, President – ZIUSA, Ex Officio
9) Pa Go Sawm Khup, General Secretary- ZIUSA, Ex Officio

ZOMI FOUNDATION FUND sumdonna vai mailam ah akicing zaw in hong ki taangko beh ding hi.

Executive Committee
November 29, 2015