Zomi, Advertisement leh Feedback

Zomi, Advertisement leh Feedback

Zomi pawlkhatte in a lelh mahmah LST mun khat en dihni e…. Paunak 27:2 “Midangte in hong phat lohbuang nangmah kiphattawm kei in. Khual mite in hong phat lohbuang nangma kamin kiphattawm kei in.”

Sumbawl nasepna ah kiphat tawm gawp a tangkona namkhat mah ahi commercial advertisement pen thupi peuhmah hi. Advertisement ading in companyte in sum tampipi zang uh hi. Thatang tampi seng uh hi. Hun tampi pia uh hi. A hoihthei pen in kiphat uh a, mi tampi in a muhtheihna ding in mun thupi leh mi tampi kikaihkhopna, mi tampi paina, mi tampi omkhopna, mi tampite’ lunglutna munte ah a kilang theithei ding in tangko uh hi.

Tuabang a kiphat tangkona bek thanlo in mipi in amau’ van, amau’ nasepna bangci muh hiam cih zong theinuam mahmah uh a, feedback ngen tangtang in, tua mipi feedback tungtawn in a hoihzaw ding a kiphuah leh thasan ding hancim tangtang uh hi. Tuabang a hihzawh uh ciang in mi tampi in thei in, minthang a metna tampi ngahkik uh hi.

Amet apung lam-en a nasem uh ahihman in ahi ding mah ahi hi.

Zomite in zong i phawkloh kal in advertisement kinakzat mahmah bilbel hi. Ahih hang ei’ a bel atamzaw commercial taktak hilian lo napi indirect a commercial mah asuak veve ahi hi.

Zomite in Zomi mipi tawh kizom a i neih nasep pen “biakna nasep” bek mah ahi hi. Charity nasep tawmtawm om a, commercial nasep bel sole proprietor (တပိုင်တနိုင်) nasep kan cihtak gentak zah in tam nailo hi.

Ahi zong in mipi tawh kizom a nasepna ah i “commercial advertisement” pen limtak etphat huai mahmah hi. I product sang in sales man advertise zaw pahpah hihang. I phat, i tangko ding pen sang a tangko nu/pa kiphat zaw pahpah hi.

Nakpi tak hanciam in tangko ziahziah napi hang, feedback bel ahih leh thuaklah mahmah hihang. Feedback zaknop salo, kipuah sawm vetlo, ei’ cihbang bang a ong kisang ding bek ut lailai hihang. Khialhna khat tung ah khat kithuap sawn in kisuangsawn sawnsawn lailai hi.

More: Kua a khial ngeilo om? Pasian sui kuate? ~ Pau Khat Suan

A phadawm khat ah mipi in bangmah thei khollo, phawk khalo leh ahi ding mah salai i hihman in a thuaknuam zawdeuh ahi hi. I commercial advertisement enpha a, a zumhuai dinmun i tun ma in puahphat huaite puah mengmeng ding ngaihsut huai mahmah hi. Pau Khat Suan