Zogam politics a tom in ~ Pau Khat Suan

Zogam politics a tom in ~ Pau Khat Suan

Ki-ukna khempeuh ah, democracy ahi a, dictatorship ahi a.. bangbang ahi zong in…

• 1) Executive power
• 2) Legislative power
• 3) Judiciary .. hihteng 3 a om den hi a, khat le khat a kikang dimdiam ahi hi.

Judiciary pen professional mun ahihman in mi khempeuh tut pheuphau pong theihna mun hilo ban ah adang nihte’ thu vaihawmna a encik, thuman leh thudik ding a a kem dinmun ahi hi.

Thu vaihawmna ah Legislative thunei pen leh a vaihawm pen hi in, tua vaihawmna a taksuak sak a zeek pen Executive power a len CM leh a cabinet teng ahi hi.

Tua ahihman in CM in septheihna tampi a neih hang Legislative nuai ah justify leh approval kisam veve ahihman in, CM i ngah hang na khempeuh ei’ thu cihbang hikhin pah zenzen lo hi. A cabinet memberte’ thuneihna tua nuai pek ah omlai ahih lam phawkhuai hi.

A beisa USDP hun (2010-2015) ah CM pen Matupi (Hakha huzap nuai) hi a, Speaker pen Tedim (Tonzang) hi.

Tulaitak NLD hun (2015-2020 ) term ah CM pen Falam (Hakha huzap nuai) hi a, Speaker pen Hakha hi.

Term masa ah power balance zawdeuh ahihman in kikhai veva lua cih omlo hi.

Term 2na ah CM leh Speaker (thunei pen tegel) Hakha khutnuai ahihman in tampi kilamdang pah hi.

Tua ahihman in hih panmun tegel anih a i letkhop kei leh i lam-et ong bang zuahzuah khollo ding a, thu theilo eiteng mah kinawksuk kinawkto in, i makaite khasia sak zel lel ding hihang. Hih panmun 2te a nih a i ngimkhop ding kisam hi.

A phawkhuai gige thu khat ah…

Chin State politics ah..

1) Tedim leh Tonzang pumkhat ahih bangmah in Hakha leh Thantlang pumkhat ahi hi.

2) Hakhate lungtup lianpente lak ah Panmun gol, lutung, thunei pen mun la a Tedim nenniam ding cih agenda pi khat hiden hi.

3) Hakha in a ngim uh a tangtunna ding in, mipi’ vaihawm ahih nak leh Falam leh Matupi huai ding hanciam den, angvan den uh hi.

4) Hihna khempeuh ah “open secret” Hakha vs Tedim hiden hi.

5) Khanglam, Mindat, Kanpalet leh Paletwa pen a huaisiam zawzaw ah kinga hi.

Tuabang kawmkal ah Tedim + Tonzang sung pan a khangkhang a “nekding a lah su, paih ding a lah sa” ahi den milom pawlkhat omden sawnsawn hihang. (Hihpen open secret mah hilel ahihman a ong paukhia kahi hi. Kikhel leng deih huai kasak luat man hi.)

Tua ahihman in mipi’ thuneihna tawh vaihawmna ah eiteng kinawk luailuai lel a, “nang pa’ mei sang kei’ pa mei sau zaw” cih kidemna lel tawh i gam keugaw semsem ding a, mite tawh i kal kihal semsem ding hi.

Zogambup thu vaihawmna ah a kilawm bang a sehtan bangci ngah thei ding cih i ngaihsutna ah i etna, scope khan deuh lehang deihhuai mahmah hi. Pau Khat Suan