Zogam khuapi 3 pan vanleng Ticket ki leitheita

Zogam (Chin State) khuapi 3 pan vanleng letmat (Air Ticket) ki leitheita

Leitung pian zawh a om ngei nai lo leh a lung dam huai thu khat in Zogam (Chin State) Khuapi 3 a hi Hakha, Falam leh Tedim khuapi te ah, Kumpi Laito (Post Office) pan in , Gam sung Gam pua khual zin nuam te aa ding, MAI Vanleng Letmat (air ticket) ki lei thei ta hi cih Chin State Laito pi pan in June kha ni 7 ni , pulak khia uh hi.

Tua a hih man in, Zogam (Chin State) pan Gam sung gam pua khual zin nuam te in, Laito pi (Post Office) ah , ii pai nop na khuapi leh gam te ii vanleng letmat( air ticket) ki lei thei ziau, bek tham lo hun bei kul lo , Kawlpi (Kalaymyo) ah tuah suk kul se lo cih pen Mipi aa ding a lung damh huai mahmah thu a hihi.

SBS Radio ah Rohingya Program kipan theita

August kha 13 ,2018 ni in Australia gam pan Radio Podcast tawh Rohingya Program ki pan thei ta hi. 2016 Census tawh ki zui in Minam leh Kampau tawh a ki muh khiat na ah Rohingya te zong hong khang mahmah a hih man in, SBS Radio Program ah mun a ngah a hihi.

Radio Program ah pen Rohingya te tawh ki sai thu tuamtuam leh Australia gam sung ah kumpi thu khun te a hi zong, Peem thak te a ding theih huai thu le la te a hi zong gen khia ziah ziah thei ta hi cih, SBS Radio Rohingya Program Manager Yasmeen Ahmed in gen hi.

Kawlgam sung minam tuamtuam te lak pan SBS Radio program ah mun a ngah pen , Burmese, Karen, Hakha – Chin leh Rohingya te a hihi. Ei aa te a hih leh Cik Ciang Vai Bang hong tung diam cih hi phot lai ei!

Leitung ah teennading ahoihpen Melbourne khuapi hinawnlo, Vienna khuapi hita

The Economist te ii 2018 kum Leitung ah teen na ding a hoih pen khuapi (2018 Global Liveability) a muh khiat na ah Austria Gam Vienna Khuapi in a khat na ngah sak uh a hih man in, kum 7 a ki zom a ngah a hi Melbourne Khuapi pen a 2 na ah khia suk hi.

A et bulpi uh pen, daih na, ci dam na, pilsin na, kiim le paam sian tho na, vak suk vak toh na leh ngeina kep cing na cih te pawl nam 30 bang a et na uh pan a muh khiat uh a hihi. A bang khempeuh uh pen Vienna Khuapi leh Melbourne Khuapi pen a et kak uh ciang in Vienna Khuapi in Melbourne Khuapi sang Daih na lam ah amat 0.7% tamzaw a hih man in Vienna Khuapi a ki teel a hihi ci hi.

Australia gam sung Khuapi dang te pan Sydney pen a 5 na, Adeliade Khuapi a 10 na leh Perth Khuapi pen nung kum lam in a 7 na hi mah ta leh tu kum ciang a 14 na ah kia suk ci hi.

Leitung ah teen na ding ahoih lo pen Khuapi ah, LST hun lai Peter te vakvak na , Syria gam Damascus Khuapi , Papua New Guinea gam Port Moresby Khuapi leh Bangladesh Gam Dhaka Khuapi te a hihi.

Teen na ding a hoih pen khuapi te a nambat zui in a nuai ah:

1. Vienna, Austria
2. Melbourne, Australia
3. Osaka, Japan
4. Calgary, Canada
5. Sydney, Australia
6. Vancouver, Canada
7. Toronto, Canada
8. Tokyo, Japan
9. Copenhagen, Denmark
10. Adelaide, Australia

Source: SBS Burmese/ Thupuak Lamhkim Samte (Melbourne)