Zogam inntuan hun luata

Zogam inntuan hun luata

Kawlgam ah ih kipawltuung lai in, kum10 khitciang intuanthei kici himah leh, kum75 Diamond Jubilee, khangthum a cindong’ inn kituanzo nailo mawk hi. Ih Pu Thawng Za Khup taangmi-sepna nuai, Pu Kam Hau gambeek inntuankhiat pih zolo ding ih hiam? Kineusek kisakha kei-in, nupa kilungtuak zong khuakhat in zolo ci hilo ih hiam? Nidang laibang in, diahdiah lo-in, eilehei mah kinungkaihkaih nawn kei ni. Hunhoih hong pai kik nawnlo ding hi. Khangno lia leh taang te kawlmangpa gaalkap ding, mite molhtum lel ding in, ih phalngam takpi diam?

Panlong agreement leh 1947 constitution ih et ciang in, Kawlgam suaktaakna ngah nading in, a micin sakna ding aa hong kipawlpih lel a na hihi. Tualo in, hong ki-iplah vungvung lo hiding hi. Mite genna enleeng zong, Kawlgam neihsa muang a kipawl in, hong kingaihsun leltawh kibang hi. Tua hang mah in, State kici lo aa, special division kicise hilo hiam? A hizong in, tua hunlai makaaite piicing lua a hih man-un, midangte bang mah in a kikim in, thuneihna hong pia taleuleu uh hi.

Panglong agreement siksan a ki-at 1947 constitution sang in, a hoihzaw Kawlgam ah om kik nailo hi. Zong omnawnlo kha thei ding a hihi. 1935,1943, 1974 leh 2008 constitutions te pen deihna langleek vive tawh a kibawl a hi mai lel hi. Tua nagawn zong, thunei zawdeuh ten, deihkaih lengleng lai a hihi. Taangpi taangta in, noptuamna bangci ngah thei mawk ding hiam?

1958 kum pan deihkaihna tawh hong kimakaih toto a hih man-in, Kawlgam Zosuan te DNA na ngawn ah teeng in, leitungbup ih paipai na ah zong kitonpih tek hi. Ih tuntunna ah kipawlna kineitek aa, constitution (bylaws) zong neihkim ding kihanciam tek hi. A hizong, Kawllungsim mah pua in, deihkaih a hih kei leh, zuih kisawm phalo mawk hi. Mihing mah ih hih ciang in, a citheideuh khatpeuh in a utut in heitheilai hi. Tua hi aa, thukhun khat peuh pen zuihnang haksa kisa in, pawlsung pawlpua pan in, ki-el ki kosan ziaziah lai hi. Zahtaakbei na bang in, unau sanggam takpi kisuamlup ding haksa kisa nawnlo hi. Dahhuai hi. Zomite omna bit nawnlo hi.

Eimawhna hilo hi. Hong kimakaih khial hizaw hi. A hizong ih theih hunhun in kibawlphat ding khatciat mawhpuak a hihi.

Zomi te zawilui innlui nusia in, lamthak innthak ih zuat kul hi.Nasep khatpeuh a kipatcil in haksa mah hi. A hizong tupna diktak tawh ih kalsuan nak leh kalkhat ih suansim in, lungkimna in hong phungvuh ding hi. Tho in, inntuan khia photphot dih ni. Ih lungsimpuak dungzui in, mual kisuakciat hi.

Mikhempeuh noptuamna leh bitnading angvan nasepna in, iitna diktak tawh kalsuanna a hihi. Mipite khuallo liang aa, kideihsak nasepna a omding uphak aa, a kideihlo Kawlgaalkapte tawh kilamdanna omlo kha ding a hihi. Mihing nuntaakna tung ah thuneihna a ngah kuamah kiomlo a hih man in, ih gamtat luheek, kimakaaihzia etcik ding sang-in, thukhun lianzaw a omnawn kei hi.

A huntun teh a ngeisa mah ngeingeiding cih theihsa gige, kalsuankhia, inntuan vingveng leeng vaisiangzaw tham ding cih thei gegu napi’n, a pelhlo a khen zolo te khialhna a hita hi. A peelngam, inntuan-ngam te mailam limcizaw hi. Inntuanding hong haza nalawm,na vengpa nung zuilai ding na hiam?

Ih kipawlpih leh ih vengte nasep leh ngimna taktak theilo pi-in, zukham-ankham in, omhuailo kha ding hi. Minam iit leh a deihsak taktak te’n pilvang cihtakna tawh kalsuan huai hi. Banghang hiam cihleh na lawm kineih leh hong haza na vengte pen, gaal ih sak taktakte sang in, luahuai zaw thei mawk hi.

Ih taangthu ah Zogam leh minam vai kalsuanna pen a hunhun, a khangkhang in, kikalsuan toto mah hi. Tuhun laitak in zong, Zogam thak phutding a hih keileh inntuanding mitsuan-in, a kalsuan a ommah bang in, a beisa kum75 hunlai a ih luah khak, Kawlte khateh dawh in, a gualnuam leh muinam khenglah pawlzong ki tamsimta hi. Mimal leh mipawlkhat noptuamding deihna leh taangpi noptuamna koilam leeksakzaw ih hiam?

Mi molhtum ciang bek aa, ih mapan zawh kumtampi hita lo hiam? Pu Thual Zen, Pu Tun Khaw Pum cihbang thautawi ih pu masate kuate hang in, mualsuak zolo uh hiam? Minam makaai sem thei ding aa hunhoihnei te’n theihhuai hi. Thankiik in, a meel a kheelkheel theih hang in, thankiik mah hilel cih pen, theih leh ciin ding thu manpha khat a hihi.

Pulehpa gam ih iitna zah tungtawn in, ei dinmuntek a la ih hihi. Hihciang zahliang bangci tun cih gengen a kulnawn kei hi. Pulehpa gam ih cihciang in, a mun koiciang huam leh kuabeh kuaphung cih hipahpah samlo aa, a sung aa khuasa, a neupen pan a lianpen dong suaktatak in, nisim nuntaaktheihna dinguh a thupi masapen in, koihding kisam hi. Zogam ah a teeng nawnlo semsemte aa ding in, iithuai, kephuai leh zuunhuai zawtham a hihi. Singhawm, suanghawn pan piang kuamah ki-om lo-in, zung phungvuhlo, zungkip zungphalo singkung zong a sawtlo in huihlehguah in nawkpaai lel ding a hihi. Midang leh ei, kua khual masa zaw ding ih hiam? A langkhat ah, singhiang a ki satsat aa, a kiveivei hang in, singkungpi nasipah samlo hi.

Tua hi in, ih gammi te’n bitna leh nopsakna bangci ngahding cih gamsung gampua mikhempeuh te’ taanglungtup a hih kul hi. Tuabang gam a pian nading in, sisan luantangtang zong kisam nawnlo khathei ding a hihi. Tu-hun teh nasep silbawl, sumbawl paaibawlna zong, innlehlo nusialo in, innlumsung pan kisem ziahziah ta hi. Thadah in, naseppeelding cihna hilo zaw in, muibun tak-in naseptheihna ( smart working) a hizaw hi.

Mangkaanghun mapek, Kawlte tawh ih kipawl masiahdong, Zomite zong, mikhutnuai uthetlo in, siahkaai a kituhtuh, gualtungtuang nuamte ih hi uh hi. Khantohnopna lungsim a nei minam hi napi hang in, hiciang ih tunna bel, kipawlpih, kithuahpih lawm teelkhial kihi gige hi.

Abeisa bang-in, hong kikhemna zawimah tawntawn laiding ih hiam? Kawlgam sung ah omnawn keileeng a puuksipahding kisa lungsimneu Kawlte mah in, hong guat lungsimnei tampi kiomta mawk hi. Hizah ciang hinapi, Kawlte khenlahna pen thungaihsutna piicing leh thusaumu in a ngaihsunkha mipil kici tampi mah ki omlai hi. Pil eh tei pen kibanglo khading hi. Kipawllo cihciang, gal hipah samlo hi. Innkuansung thu a minciang in,hong kizahtaakzaw in, namdangte tawh kizop vaihawmnazong lemzaw kaanlai a hihi.

Zomivai Zomite khutsung a omsaknuam takpi’te aa ding, 1947 aa kipan Kawlkumpi te a vekin, a gial kikheelbek hi aa, kibang vek uh cih theihding kisam hi.

Kawlkumpi in, keugawgam-aa, a kingaihsun Zogam pen iplah hetloding uh hi napi’ mundang mualdangte a ngaihsutna uh tawh, suaktaakna hong piakding uh lam-et omlo hi. Tua aa, galkaapmangpa a thaltuukphialzong in, Kawlgam sung ah Zogam a omlaiteng in, leitung a kilehpei kei buang leh cihloh bangmah muantheih omlo cileeng, vaisiangzaw hilo hiam? Tuaban ah Kawl khatehdawh sanggam pawlkhat, a gial hongsuak kikkik zeelding cih pen thupiangtampi in, hong lakkhinzo hi. Khanglui te-in, taangthu mawk suutlo in, mawk ciinlo uh hi.

A tawpna ah, Zogam sung aa om, kuabeh kuaphung, kua minam cilo-in, mikhempeuh a suaktaak takpi ding ih deih leh lampizuat ding khatbek omlai hi.

Ih tupna a tunding nakleh, Mangkaang leh Japan tawh a kipawlzialziallthei Kawlngian neizo takpi ih hiam? Ih neihngep keileh Zokhuak mah tawh tangtak in, nawkpheivet zawlo ding maw? Kipil/ Kiteitangsak in (Lule) sepciang bek,mitoknawibek tawh lumgkim takpi ding maw? cih kidothuai phamahmah hi.

Kum 75 sung moltum in ih kipiakna maban behlap in, minam dangte bawlsiat behlaiding uttak pi ih hiam? Lia leh Taang aw, tho inla, khanglo in. Na mipihte hung-in, hunkhia dih in. Inntuan hun luata. Nantal’suan