Zo vontawite laitual lenna Swe-tui vangkhua – 4

Zo vontawite laitual lenna Swe-tui vangkhua – 4

Thucin thutang – Banghangin Noble Peace Prize pen Olso ah kipia se hiam? Alfred Noble(1833-1896) ih cih pen Dynamite a bawlpa hi a, lampi leh lei bawl nading-aa a ngaihsut ahi hi. Ahi zongin ama deihna sanginkido nading kithah nadingin kizang zawmawk hi. Tua hi a, hih Noble prize pen Physics, Chemistry, Medicine, Literature leh Peace tawh kisai leitungah a madawk pente khatta a kipia ahi hi. 1895 kumin a phuat hi a, 1901 kum ciangin piak kipan hi. A cil lamin Sweden gammite bek piak ding cih hi mah taseleh tu-in leitung khempeuh pankitengkhia in kipia hi.

1968 kum ciangin amah phawk nading deihna tawh Economics lam zong piak dingin kikhensat hi. 2009 kumin Noble prize khat ciangin US§ 1.4 million kipia hi. Stockholm khuapi Concert Hall ah kum sim December 10 (ama sih ni phawkna) ni ta-in minphatnate kipia aa, City Hall ah an kinekpih hi. Minphatna ngahte in amau ngahnathu tungtawnin lecture pia hamtang uh hi.

Noble Peace Prize pen Sweden gamah kipia lo-in Norwayte’ khuapi Oslo ah kipia hi. Bang hang hiam cih leh 1814 pan 1905 dong Sweden gam leh Norway gamte gamkhat-aa aomna uh phawk nading ahi hi. Sweden gammi 29 in Noble prize ngahngei khin hi. Kawlgam panin Aung San Suu Kyi in 1990 kumin ngahngei hi.

Khualum khuavot tehna Celsius ih cihcih zong Swedes gammi ni kha aksi lam pilna nei (astronomer) Anders Celsius( 1701-1744) ii min paulap in a kilo ahi hi. Tui pen 0 degre Celsius ah khal aa, 100 degree Celsius ah so hi.

Uppsala University ih cih pen 1477 kumin kiphut aa, Scandinivian gamte lakah university a masa pen ahi hi. Lei tungah a minthang mahmah sang khat ahi hi. Ei mite lakah Lian Hmung Sakhong in tua panin Religion and Politics cih tawh Ph.D ngah hi.

Kimawlna lamah tu laitakin AC Milan aa sui Zlatan Ibrahimovic (bawling), Charlotte Kalla(skiing), Robin Söderling (tennis) Nicklas Bäckstrom (ice hockey) leh Sarah Sjiötroöm (tui pek) cihte minthang thei mahmah uh hi.

Leitungah UN thuzeekpi semte lakah a minthang mahmah Ghanna gammi Kofi Annan ii zi nihna Nane Marie Annan (a min masa Nane Lagergren) zong Sweden mi hi aa, lawyer khat ahi hi. Ta khat nei uh hi. A zi masa ahih leh Nigerian-te Titi Alakija hi aa, tua nu tawh tapa khat leh tanu khat nei uh hi.

Puan ih silh ciangin a kihong thei a kikhak thei dingin zit kisam hi. Tua bawlpa Gideon Sundbäck hi aa 1900 kim a a bawl ahi hi. 1914 ciangin USA gamah peem hi. 1970s ciangin sik zit kibawlthei ta hi.

Marcus Samuelsson a kicipa pen 1970 kumin Ethiopia gama suak hi a, kum thum a phak in Swedish nupa khat in la hi. Tu laitak an huan siam-in leitung ah minthang aa, President Barack Obama in zum min tawh nitak an a nek masak ni in anhuanpa ahi hi.

Leitungah la lamah a minthang mahmah I cih ABBA i cihte zong Sweden-te hi a, Mangpau pau lo gamte lak pan mangla tawh leitungah a minthang masapente hi aa, 1972 kumin Stockholm khuapi ah kiphuan hi. A phuan lite: Anni Frid “Frida” Lyngstad, Bjorn Lelvaeus, Benny Anderson leh Agnetha Fa Itskog ahi hi. Lyngastad leh Benny a kiteng hi aa, a lawmte gel zong a kiteng ahi hi. Kamsiatna tawh kikhenkik citciat uh hi.

Leitungah a minthang mahmah motor Volvo leh galvanleng lam a bawl Saab cih company-te pen Sweden gam pan ahi hi.

Ih Khristian labu sungah a tulmawh a ngaih vangvang den Nang Na Lian Hi (How great thou art) cih la pen Sweden-te pawlpisia Carl Boberg (1859-1940) in 1886 kumin a phuah ahi hi. Sweden la-in , “ O Store Gud,” kici hi.

Gamdang a pai penna uh Thai gam hi.

Nanthan Soderblom (1866-1931) pen World Council of Churches a pian theih nading aa, a hanciam mahmah khat ahi hi. WCC pen 1948 kum in Amsterdam ah a kiphut hi a, tua a pian nadingin 1910 kuminInternational Missionary Conference pen Edinburgh ah a kibawl ahi hi. Hih IMC pen William Carey in 1810 pek aa Cape Town ah bawl dingaa a pulak hi a, mitampite in zahpih ahih manin kibawl theilo aa, kum 100 a cin khit ciangin kibawl thei panhi.

Tua IMC a kibawlkhit cianginFaith and Order cih leh Life and Work cih Commissions kiphut aa, 1925 kumin hih Nanthan Soderblom in Life and Work a phuankhiapa ahi hi. Tua Faith and Order leh Life and Work kigawmin 1948 kumin World Council of Churches a piang ahi hi. Nathan Soderblom pen Archbishop of Sweden sem ngei hi. Noble peace prize zong ngah hi. Suang Khen Pau