ZIUSA Thupulakna: UN ECOSOC Consultative Status kingah taktakta

ZIUSA Thupulakna: UN ECOSOC Consultative Status kingah taktakta

Dear… Zomi Laizom U leh Nau, Nu leh Pa, Lawm leh Gualte aw, Zomi Innkuan USA kipawlna min tawh hong hopih ingh ei. Akua mahpeuh cidam in vai a ding thei dingin hong lam-en ingh. Kei leh ka mapanpih ZIUSA EC panmunlen tengzong cidam in vai ding thei ungh.

Zomi Innkuan USA kipawlna in United Nations huang sung a Economic and Social Council nuai ah Civil Society kician khat hihna tawh Consultative Status dinmun kingahta hi cih Thupulakna Lai (PDF File Attachment) hong khakkhawm ingh. UN Zumpi panin hih dinmun ngahna Laipi ahong puak uhzong tuni teekteek in ih khut sung hong tungta hi. UN Website ahzong kilawm takin kisuangta hi.

Anungta Pasian hong laptohna, Zomi buppi’ vang, a munmun a om Zomi Innkuan kipawlnate pankhopna, leh ZIUSA kipawlna Makaite hanciamna tawh hih dinmun a kitung ahih manin akua mahpeuh tung ah lungdamna ih ko hi.

UN ECOSOC sung a Consultative Status dinmun panin a masa pen Khawmpi khat, ahong tung ding Aug. 27~29, 2014 ni sung tengin Zomi Innkuan USA kipawlna Tangmite kikahta ding hi. Hih Khawmpi vai a kipan, mailam kalsuan ding maban khempeuh ah lawhcinna ih ngahna dingin kithutuak takin ma pangkhawm in, anungta Pasian tung ah thu ngenkhawm ni. Tutung hizah cining. Lungdam. GSKhup (President, Zomi Innkuan USA, Tulsa, OK.) August 1, 2014