ZIUSA Genvai Thupulakna: Sia Thang Lian Khup’ luangphamna/kivuina

A Thu: Sia Thang Lian Khup (Khupsan) Luangphamna/Kivuina

March 23, 2015 ni in, Florida Gamkee, Jacksonville khuapi a teng, damlohna hangtawh zatopi panin mual hong liapsan, Sia Thang Lian Khup (kum 47) pen Zomi Innkuan USA Genvai Thukhun apom, Jacksonville Zomi Innkuan kipawlna Pawlmi kician khat ahih manin, Thukhun zui in Zomi Innkuan USA kipawlna in a luang kipham/kivui ding hi.

Sia Thang Lian Khup pen acidam khanglai kimlai lam-etlohpi in hong navat in mual hong liapsan hi a, US gam sung a om Zomi-te kihuaina leh luang kiphamna ZIUSA Genvai ah apangkhawm dingin, a innkuan un 2015 kum January kha a kipan ZIUSA Genvai Thukhun ahong pom uh ahi hi.

Sia Thang Lian Khup in mual hong liapsanna thu, ZIUSA Genvai Thukhunpom Pawlmi kician khat ahihna thute Jacksonville Zomi Innkuan kipawlna Makaite in thu hong ko uh a, Genvai Tanupawl in a thu a la limtak in akantel khitciang in ZIUSA EC pawl tung ah kipsakna hong pia uhhi.

Tua ahih manin, Sia Thang Lian Khup’ luang phamna/vuina sum dingin, ZIUSA Genvai Sum sung pan $10,000 (Dollar Tul Sawm), Zomi Innkuan USA kipawlna min tawh kipiakhia ding hi.

Hih Sumte Zomi Innkuan USA kipawlna tang’in Jacksonville Zomi Innkuan kipawlna Makaite in innteek bangkuate tung ah hong piaksak ding uhhi.

ZIUSA Genvai panin luang kiphamna/kivuina sumte pen Life Insurance bang dan a kiginkholhna sum hilo a, US gam sung a om Zomi-te khat leh khat ki-itna tawh kihuaina, luang kiphamna ahi hi. ZIUSA kipawlna min tawh akipuak Genvai Sumte zong tu ni, tu hun laitak a ZIUSA Genvai Thukhunpom Pawlmi khempeuh, numei naupang akua mahpeuh in Sia Thang Lian Khup pen ih laizom sanggam khat hihna tawh ih vuina, a luang ih phamna ahi hi.

Hici bangin US gam sung a om Zomi-te in dahna sung pan itna tawh Sia Thang Lian Khup’ luang phamin ih vuibawl manin adah akap a zi a tate a kipan, meeltheih tanau, khuapih tuipihte, Pawlpi mipihte leh Zomi Innkuan kipawlna Pawlmi pihte in khamlum tuamin, anungta Pasian in ahong hehnemna dingin thu kingen hi.

Executive Committee
Zomi Innkuan USA

Tulsa, OK
March 27, 2015