ZCD Ngimna Bulpite (Policy)

ZCD Ngimna Bulpite (Policy)

Zomi Congress for Democracy: Tulai momno ZCD-te, sa Kamkei bang hang leh kilawm ee, Thangvan a leeng Phualva lungtuak bang, ih Zogam kuam khual leh kilawm ee.

ZCD Ngimna Bulpite (Policy)

1. Pu leh pa kilawhna min “Zomi” hihna (Identity & Self Determination);

Tangtawng a kipan ei leh ei “Zomi” kici, Chin kici ngeilo, Chin State sung ahzong Chin minam cihbang omlo, Kawl gam sung ah Zomi pen minam/taiyinta picing khat hi, taiyinta tuamtuamte tawh liangko kikim in minam thuneihna bukim ngahna ding

2. Mipi thuneihna leh mipi teel kumpi (Democracy);

Mipi in a teel makaite bekin kumpi sem ding, mipi Tangmite bekin gam leh ki-ukna khempeuh tawh kisai mawhpuakna la ding, mipi’ teel ahilo peuhmah in kumpi semlo ding

3. Suakta tak in sumlei sumzuakna (Open Market Policy);

Azawng ahau kideidanna omlo a, mi khempeuh in suakta takin sum lei sum zuak thei ding, mi pawl khatbek, mihaute bek in sumlei sumzuakna humcip theilo ding

4. Pinlong thukimna lungsim (Pinglong Spirit);
1947 kum in Zomi, Shan, Kachin leh Kawl minamte in Gam khatin kibelpawl ni ci in Pinlong khua ah thukimna kibawl a, Kawl gam masa kilam hi. Pinlong thukimna siksan in gambup Thukhunpi kigelhlo ahih manin tuni ciangdong Zomi-te in Zogam sung ah thu kineilo hi.

Tua ahih manin Pinlong thukimna lungsim tawh Kawl gam pen a kibelpawl gam (Federal Union) in lamphakik ding, Taiyinta khempeuh in eima gam leh lei tung ah thu neiciat ding, Taiyinta khempeuh in a kibelpawl gam sung ah a kikim thuneihna nei ding, sa-tan hawmna maan ding, Kawl gam suahtakna tawh a kingahkhawm hamphatna leh thuneihna khempeuh a bucing in ngahkik ding ngimna kinei hi.

Kum 5 Term sung sep ding Mabante;

1. Tedim leh Tonzang gam sung ah Myone nih behlap ding, Chin State sung a District gamgi puahpha ding

2. Ohsuh dinmun tawh a kituak khuata khempeuh lamto ding, Myo dinmun tawh kituak khua khempeuh lamto ding

3. Khua khempeuh ah Meitha (Electricity) ngah theihna ding, Zogam khuapi khempeuh ah Myanmar National Electrification Program pan National Grid a tun’ theihna ding

4. Zogam khuapi khempeuh kizopna lampite Kattaya tawh bawl ding, khuata khempeuh kizopna lampi ziik ding

5. Khua khempeuh ah tuinek, tui siangtho kicing takin a kingahna ding vaihawm ding

6. Khua khempeuh ah Naupang kepna sang (Mucu) hong ding, a khawnkhong kahsak ding

7. Khuapi khempeuh ah Tan Sawm sang a kicing hong ding, akhawnkhong in kahsak ding, laibu laidal laikung, Sia/Siama akicing in puak ding

8. Federal Union a kilam zawhna dingin 2nd Panlong Khawmpi (21st Century Pinlong Conference) bawl ding

9. Zogam khantohna dingin Hluttaw teng ah thu sung tawntung ding, NGO/INGO leh gamdang kumpite tung pan huhna ngen ding

10. Taiyinta Party (8) kipawlna UNA pawlpi leh Democratic Force pawlte tawh khut kilen semkhawm ding

Zomite: Tangthu thak piangsak ding, Ngaihsutna thaktawh makaih ding, Zomite vai Hluttaw ah Zomi min mahtawh thu sung ding, Zomite’ vai Zomi Party bekmah in pulak thei ding hi. SA KAMKEI BANG A, A HANG “ZCD” ME PIACIAT NI!