Zatui sutna phim ~ Dong Mung

Zatui sutna phim ~ Dong Mung

Mihing ganhingte i ci a nat ciang, damlohna khat i neih ciangin zatang ne-in zatui i kisun thei hi. Zatui kisut pen i natna a dam ding lunggulhna ahi hi. Ahi zongin zatui i kisut ciangin na mahmah a, i sa bit sitset mun khat zatui sutna phim tawh i kisun ek ahi hi. Na kisa mahmah in i mel bang kikhel zo hi.

Ahi zongin tua zatui sutna phim’ i pumpi, i ci i sa sunga hong lut a natna sangin i sunglam a natna a dam ding i deihna tawh i thuak teta hi.

Pawlkhatte sut khat in dam ziau thei a, pawlkhatte sut nih sut thum kisut kul thei hi.

Tua bangin zatui sutna phim tawh i kisut ciangin ei hong damlo sak, ei hong cina sak natna lungnote si in damna i ngah a, i maban zomin i kalsuan thei hi. I dam sit ciangin i tha hong hat a, tua thahatna tawh kalsuanin lawhcin gualzawhna i ngah hi.

I nuntakna sungah zong Kha thu lam ah hita leh taksa thu lam ah hita leh khat veivei zatui sutna phim tawh i kidawt zekzek hun a om thei hi.

KHA LAM

Israel mite in Pasian deihna bangin nungta zolo in, amau deihna bangin kalsuan in Topa Pasian a taisan ciangun Pasian in it lua ahih manin ama itna a theihcian theih nadingun kiim le paam a namdang, gamdang mite khutsungah saal in ahi zongin, galmat ahi zongin, gallelhna ahi zongin na thuaksak zelzel hi.

Tua bangin zatui sutna phim tawh dawtna thuakin haksatna a tuahna panun Pasian tungah a kiko uh ciangin Pasian in damna pia in na honkhia a, suahtakna pia hi.

Eite zong i nisim nuntakna sungah Topa in ama zia le tong, ama hong it hong angvanna i tel semsem nadingin khat veivei zatui sutna phim tawh hong dawt kiaukiau thei hi. Tua hun ciangin i siatna ding a deihna hilo zaw a, i dam siang nading a deihna na hizaw hi.

Jeremiah 29:11
Bang hang hiam cih leh Topa in kong cihin-ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi.

TAKSA LAM

I nuntak picing semsem in, muibun semsem a, mi thupi, mi muanhuai, mi manpha i suah theih nadingin haksatna, buaina, cihmawh dongtuahnate i tuak thei hi.

Hihte pen ei adingin zatui sutna phim ahi hi. Hih haksatna, buaina, cihmawh dongtuahna, guallelh maizumnate in i nuntakna hong puah toto uh-a, lawhcinna, matutna, picinna, daupaina, lungduaina, thuakzawh hatna hong guan hi.

Tua ahih manin na tuah na thuak thu le late in nang adingin zatui sutna phim tawh kibang hi-a, na dam siang sitset nading ahih manin na mahmah taseleh thuak teta inla, sut khat tawh dam siang pah sawm lel in..

“Mi khempeuh in haksatna i tuah ding kisam hi. Banghanghiam cih leh tua haksatna in lungdam taka gualzawhna i ngah nadingin a kisam mahmah thu ahi hi.” A.P.J Abdul Kalam

Tua ahih manin i damlohna, i cinatna a dam theih nadingin kisutna zatui sutna phimte mudah loin limtak sangsiam ni. Tua zatui sutna phim hangin i sunga om natna lungnote si dinga, damna i ngah ding hi. Lungdam, Dong Mung