ZAM Thupuak :: 21 June 2015

UNHCR Representative Richard Towle tawh kimuhna

June 18, 2015 zingsang nai 9:30am pan 12:30pm ciang UNHCR Conference hall ah kipawlna makaite leh UNHCR alianpenpa Richard Towle tawh kimuh khopna ki nei hi. Amasa in kipawlna makaite kimuhkhop ding hun kicing ngahmanlo ka hih manin nong telsiam ding uh hong thum masa ingh. UNHCR Malaysia panin athuak hamsatna te pen bomb kiatkiatna, gal le sa omna Syria, Iraq, Afghanistan te tawh ki bang hi ung cih UNHCR zumpi Geneva ah gen ding hong hamsa mahmah hi.

Ahi zongin kong huh theihte kong huh ding uh a, kong huh theihloh uh zong pawl khat om ding hi. Tu tadih in huh ding a kilawm mahmah te bek ki huh, ki panpih zo hi. Tuate nangawn zong manlang takin ki huh zolo hi. 2015 ading in bel UNCHR budget bel kicing lel cih ding hi. 2016 ah bel 10% kiam ding ahih manin hong hamsa zaw ding a, ahih zongin nasepna ah hoihtak leh muibun zaw ding in kisem ding hi.

Tu laitak in bel thong sung a omte, thong pan a ngahte leh appointment ngahsa te ading a ki sepsan laitak ahi hi. Bekthamlo in huh ding aneilo meigong nupi, naupang kum cinglo nu le pa neilo te leh damlo gimte ki huh hi.

Malaysia kumpi tawh nasep khopna ah zong tu laitak a sang UN Card ahoihzaw zat ding leh UN minsanna mah ah zong hong kihel ding uh kei lunggulhna hi. Banghang hiam cih leh amau hong kihel uh hi leh na UN card tuaci cih om nawnlo ding hi.

UNHCR in gambeel/galtaai te nusia kinpih/buaipih nawnlo cih hilo in nasep dan kilaih in nuntakna ahoih lam a ki lamdang sak nasep hoih nei sak ding cihna hizaw hi.

Gambeel/galtaai mite nasep theih nading vai tawh kisai in tu laitak kumpi tungah a kiphut laitak ahi hi. Kumpi lam panin nasep theih nading phalna hong pia uh leh mi gilo a tam ding lau uh hi. Ahi zongin UN lam panin mi gilo a om theihloh na dingin amaan (photo), khutmek (finger print) la peuh le uh teh bangmah buaina omlo ding hi ci uh hi.

UNHCR in hih theih tawpin naupangte pilna sinna, cidamna, kidal kikepna leh adang tuamtuam te ki sem zom paisuak ding hi.

Australia ah gambeel/galtaai siauhna

Australia gam in kum khat in leitung mun tuamtuam panin gambeel/galtaai mi 13750 la hi. Tuate lak panin 11000 pen tembaw tawh apai gambeel/galtaai te hi uh a, 2750 pen UNHCR tungtawn a kipuak te ahi hi.

Kum simin Australia gam asiau tampi om den hi. 2013-2014 kumin 63,000 in siau in 11,000 ki sang hi. 2014 June 1 pan kipan 45,000 in siau in innkuan sanggam laiguizom teng in visa ngak in om in, SHP in 2014-2015 ading in 5,000 kisang hi.

Special Humanitarian Programme (SHP) a kici gam 2 na a om gambeel/galtaai te’n Form 842 leh 684 tungtawnin ki sapna ahi hi. Hih SHP tungtawnin kum khat in leitung mun tuamtuam panin gambeel/galtaai mimal 4500 sang uh ahih manin Malaysia a omte ading zong lametna om hi. SHP pen innkuan, sanggam laiguizom teng kisapna bek ahi hi.
SHP tungtawnin form tensa peuhmah in khat veina, nih veina lai nangah khit leh na phone hoih tak na let ding thupi mahmah ding. Na phone nambat leh adang khat peuhpeuh laihnopna na neih leh Form 1022 tungtawnin ki zasak thei hi.

Hong tung ding Australia kumpi (Fiscal Year) kum thak ah zong SHP in gambeel/galtaai te sanglai ding uh hi.

Tua ahih manin innkuan sanggam laiguizom anei te’n UNHCR tungtawnin kum tampi na ngak se sangin Form 842 tawh siau in. Form 842 tawh siauh nading ah hamsatna na neih leh ZAM zumpi panin hong ki huh den thei hi.

Theihding: 2014 a Form 842 ten sate sungpan innkuan sanggam laiguizom teng bek sangzo ahih manin a dangte pen hamsamsa uh hi.

Pate’ Ni (Father’s Day)

Kum simin June kha nipi ni thumna pen Pate’ Ni in kizang hi. Hih bang a Pate pahtawina ni hong pian-khiatna pen USA gam Washington State kung lam a ateng Sonora Dodd kici numei khat hang ahi hi. 1909 kumin Nute’ Ni kikhopna panin Dodd in Pate a dingin zong ni khat kiseh leh hoih ding cih thu ngaihsun kha hi. Ama pa pen William Jackson Smart hi a, America Civil War (America Tualgal) lai a galkap khat ahi hi. A zi in ta gukna nausuahna panin nusia ahih manin Smart in tua naungek le a u te nga nu dinmun le pa dinmun la in leitung phutpih hi. Washington State mah a lokho in a tate guk pantah to hi.

Dodd in a neulai in a pa thu ngaihsun khalo napi, a gol ciangin a pa thu nakpi in hong ngaihsun kha hi. Amau unau adingin a pa uh pen anu uh lah ahihna, a pa uh lah ahihna nakpi in hong phawk san hi. A pa itna, a pa khualna, a pa thupitna te damdamin hong phawk san hi. A pa pen June kha a suak ahih manin June kha sungin pate pahtawina ni khat kibawl thei leh cih bekbek ngaihsutin hong neita hi.

Dodd hanciamna hang in June 19, 1910 ni-in Spokane, Washington ah amasa pen Pate’ Ni kibawl hi. President Calvin Coolidge (1872-1933) om 1924 kum ciangin America gamah pate ni bawl dingin nakpi thapia hi. 1966 kum ciangin President Lyndon Johnson in USA gam bupah June kha nipi ni thumna pen Pate’ Ni a zat dingin letmah thuh ngiatin tangko hi. Tu in USA gam bekah hilo in leitung bup phialah June kha nipi ni thumna pen Pate’ Ni in kizang hi.

Tuni in na pa na ngaihsun dih in. Dodd’ pa bangin na pa in nu dinmun pa dinmun la ahi pah kei zongin nang adingin na pa sang a thupi zaw leitung ah mi tawm ding hi. Pasian na it taktak leh na pa zong it inla lungdam sak in.

Nang hangin na pa a lungdam diam? Nang hangin na pa a angtang diam? Na pa na ngaihsun kha hiam? Tuni in na pa na phawk kha hiam? Na pa na langpan khangei hiam? Mi nuamsa, mi thupi, ulian khat na suahna pen na pa hang ahi hi. Na pa phawk gige in. Nuam nasa tektek ding hi.

ZAM Palaai te buaipih diak teng

⦁ Pa Sian Suan Muang (Lailui) June 13 ni-in pen Lenggeng Camp panin hong suakta aa, damlo sa in hong ciah ahih manin Kelana Jaya Specialist ah .
⦁ Tg. Kap Za Tuang (Tungzang) leh Tg. Cin Sawm Thang (Tungzang) te June 16 ni-in Setapak ah kiman Setapak Danau Kota Balai Police pan kitan khia thei.
⦁ Pa Biak Khai leh Nu Zam Lun (Tungzang) te tanu ading June 17 ni-in JPN panin nausuak lai kilak pih.
⦁ Pa Lian Suan Muan leh Nu Thiang Than Eng te tanu June 17 ni-in Serdang zatopi ah buaipih laitak.
⦁ Pa Suang Sawm Mang leh Nu Khup Ciang te tapa Sungai Buloh zatopi ah ki buaipih laitak.
⦁ Thang Mang (Kawlpi), 17 June ni-in Setapak Clinic ah ki buaipih.
⦁ Huainu (Pyidawtha), 10 June ni-in Subang Specialist ah ki buaipih.
⦁ Mangnu (Tungzang), 11 June ni-in Ear Specialist, Chowkit ah ki buaipih.
⦁ Tual Hau Pau (Mualpi), 12 June ni-in GHKL ah ki buaipih.
⦁ Khan Khen Pau (Chiantagyi), 15 June ni-in HKL zato ah kibuaipih.
⦁ Dim Sian Muang (Pyidawtha), 18 June ni-in HKL zato ah kiveh.
⦁ Mung Muan Cin (Mauvom), Gin Lam Mung (Mauvom), Suan Khan Khai (Mauvom), Gin Tul Deng (Thalmual), Dongh (Taakkhawl), Cin Van Kim (Sezang), palaaite buaipihna tawh kitan khia thei.
⦁ Thang Thawn Tuang (Sezang), Kai Sian Khual (Sezang), Kam Khan Hang (Tauleng), Pau Khan Pum (Kapteel), Uap Sian Khual (Phunom), Gin Sian Tuang (Pyidawtha), Pau Lam Thang (Lingthuk), Thawng Sian Mung (Khianglam), Kap Khen Sing (Zonuamzang), Sang Bik (Tai 9), Thang Sian Khai (Pyidawtha), te a ki buaipih laitak.
⦁ Gin Sawm Lian (Buanli), Pau Mun Thang (Vongmual), Sian Thang (Tedim), UN ah vai ki puaksak.
⦁ Tuan Suan Mung (Tongsial), Do Sawm Lun (Kyikung), Zam Za Sing (Lailui), Embassy ah ki buaipih.
⦁ 19 June 2015 ni-in ZAM a cidamna lam nasemte Batu Arang, Rawang ah vahawh uh a, Sivuan Siamahte tawh va holim thei uh hi. Hih mun pen Ozanam Home ki ci-in AIDS natna neite kepna mun hi. ZAM in minam sungah itna, veina, lainatna leh hehpihna tawh na a sepnate thupisa mahmah uh hi.

UN tettantu (renew) te card a kilaksakna ahang

Tulaitak adiak in thong pan UN minsanna ngahte ki limsap mahmah tettantu zong tampi om uh hi. UN panin Special Verification Process (SVP) thu a kidot kik ciangin thong sung pan a agen teng leh a dot kik teh agen teng kibang nawnlo, atangthu uh zong a sau, acingin gen theilo, kawlgam ciah kik leh a lauhuai lam zong gen theilo uh ahih manin a UN Card uh pia nawnlo uh hi. Zum vai khat peuhpeuh na neih teh nang sang atheizaw te dot ding mangngilh ngei kei in.

ZAM Palaai sungpan kua tawh kizomding

UNHCR Vai & Nasep vai
⦁ Hau Suan Khai : 012 367 4665
ZSM/Genvai
⦁ Sia Kam Lian Mung : 016 995 6231
ZEC Sangvai leh vai dang tuamtuam
⦁ Khoi Tuang : 010 286 6189
Kimat kihenvai & Thongvai
⦁ Sia Joseph Tuangpu : 016 254 4093
⦁ Sia Thaa Mung : 016 646 5375
Zato vai kisapna aomleh
⦁ Sianu Ngaih Hau : 010 823 0571
⦁ Sia Kep Lian : 014 369 4897
Laigelh sakvai
⦁ Sia Francis Lamthang : 014 225 9458
ZAM Card bawlna & ZWO Ngeina puan zuakna
⦁ Sianu Cii Cing : 011 1282 8482
Tanzung (Embassy vai)
⦁ Sia Joseph Mangsen : 018 354 2927

ZAM ah nisim in TUNE Insurance ki bawl theita

Tune Insurance aleinuam khempeuh in UNHCR zum pai kulnawnlo in ZAM ah nisim in kilei theita hi.

ZAM pandahpihna

Zogam Salpha, ZRA/O Pu Thang Lian Piang (Heavy Piang) in June 16 , 2015 ni-in Imphal zatopi panin Topa kiangah hong ciahsanna hangin adah akap khempeuh tawh ki bangin ZAM zumpi panin dahpihna ih pulak hi.

Zomi Card tawite ading nasep

⦁ UNHCR-EST nasep zonsakna panin KL kiim teng moh bawlna leh ansai te a sem ding UN ngahsa mi 50 ki deih. Alunglut khempeuh in ZAM zumpi ah form hong fill up un. Nasep hun nai 8 sung. Kha khat ni 5 off. Kha sum RM900. Omna leh anpia. OT nai khat 1.5. Kumcin teh bonus om.
⦁ Kajang motor sawpna a sem ding pasal citak 3 kideih. Nasep hun 9:30am-7:30pm. Kal 1 teh 1 vei off. Khasum RM1000.
⦁ Bating packing setzung a sem ding numei 5 kideih. Nasep hun 8am-5:30pm. Nipi nisim off. OT om. Omna pia an pialo. Khasum RM900.
⦁ Klang setzung a sem ding pasal 2 kideih. Nasep hun 8:30am-6pm. Kal 1 teh 1 vei off. Omna pia an pialo. Khasum RM1000. Kizopna ding ‘ 012 367 4665

Lungdamkohna

⦁ Khual Gin (Pyidawtha) in ZAM panpihna RM50 hong pia ahih manin ki lungdam mahmah hi.
⦁ Kim Nu (Kapteel) in ZAM Thupuak bawlna ding RM50 hong pia ahih manin ki lungdam mahmah hi.
⦁ Pa Cin Ngo Kap (Heilei) te innkuan in ZAM Thupuak bawlna ding RM50 hong pia ahih manin ki lungdam mahmah hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Hih PDF File link tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…