ZAM Thupuak :: 16 Dec 18 (Zomi Cup 2019 zaksakna)

ZAM Thupuak :: 16 Dec 18 (Zomi Cup 2019 zaksakna)

11 December 2018 (Tuesday) ni-in ZAM Hall ah Zomi Genvai Kipawlna – Malaysia (ZSM) kum cin meeting kibawl thei hi. Pawlpi siate leh Khua makai te hong kihel thei uh a, meeting kipat ma in itna annkuang um khopna zong kinei hi. Hun gelna sa om mah bangin sun 12:00 lian ciangin hun kem Rev. Thomas Thang Suan Piang in hun hong makaih to pah a kihel thei teng tawh “Nang Tawh Nai Zaw Nuam Ing” cih la Sm Nua Nuam in hong makaih in hun kipan to hi.

A zom ah Sia Simon Pau Khua Muan Lal thungetna tawh hun te kipan to hi. Aban ah ZAM lutangpi Sia Kap Za Khup (Khuppi) in thukong hon na leh vai muakna hong nei a, pawlpi siate, khua makaite maitang lah na hong nei hi. Tua ban ah “Malaysia leitang tungah kipawl khawm in na I sepkhop ciangin vai lianpi te tung ah zong kigual zo hi. Tua a hih manin mai lam ah zong khut kilen in mapangin semkhawm toto lai ding hi hang. I pankhop sa na te tungah zong lungdam na lianpi kong pulak hi” ci-in hong gen khia hi.

A ban zom in 2018 Zomi Idol Malaysia ah Second Runner Up hong ngah ahi Khawm Pau in lasak na hong nei in tua khit ciangin ZSM lutangpi Rev. Gin Khan En in ZSM tawh kisai in thugen na hong nei hi. ZSM pen biakna siate makaih na mah tawh a kipan khia hi ci-in 2018 kum December 11 ni ciangciang misi 21 bang kinei a, Malaysia ah Zomi te luang 300 bang a bei lawh ta I hi hi.

Hih bangin misi khat I neih ciangin han leitang I tansak zawh na dingin mimal 300 in member lutman RM20 hong kihel ciang bek in a cing zo a hih manin mailam ah zong a beisa hun te mah bangin pangkhawm in sem khawm ni. Malaysia leitang tungah I mipih te sihna tawh I kipelh theih nang zong thungetna ah phawk in thungen khawm ni ci-in hong gen a, ZSM thukhun puahphatna zong hong pulak khia hi.

Tua khit ciangin 2018 Zomi Idol Malaysia First Runner Up Sawbua Mung in lasak na hong nei hi. A zom ah Sia Joseph Tuan Sawm Tuangin sum sazian pulakna leh nasep zia te pulakna hong nei hi. Hong pai mimal tungah zong sum sazian te kihawm khia hi.

Tua khit ciangin 2018 Zomi Idol winner Siamnu in lasak na hong nei leuleu a, lasak khit ciangin Sia Cin Hau Tuang makaih na tawh Malaysia om Zomi bup adingin thunget khopna kinei hi.

Rev. Ngin Khat Thang leh Ps Daniel Vum Khan Mung te makaih na tawh 2019 ading ZSM palai te apna leh thupha piakna kinei hi.

Palaite thupha piakna khit ciangin “Topa tawh tonkhawm” cih la kisa a, tua khitciangin Rev. Thang Do Khen thupha piakna tawh hun te kizo thei hi.

2019 ZSM LAIBU KINGAH TA HI

Malaysia zomi Genvai Kipawlna (ZSM) 2019 a ding ki lut thei ta a, ZSM laibu te zong kila thei ta hi. ZSM lut man mi khat ciang kum khat ai RM 20 hi a, hih na lutna hang tawh ahamsa a dong tuak I mipih te a panpih, a dah akap hun ah a khitui anulsak na hi gige hi. Hih ZSM ah member na lutna in nang ading apia na hikei a, panpihna akisamte apanpihna hizaw hi. 2018 sungin zong tu ciang ciang Zomi pih te luang (20) bang lei ah I tuh theih na in nang leh kei I pankhopna ahih bang mah in mailam ah zong mapang khawm lai dingin zong kong zawn phapha uhhi.

2019 ZSM PALAI TE

• President : Rev. Gin Khan En
• Vice President : Sia Gin Go Mang
• Secretary : Sia Kap Za Khup
• Assistant Secretary (1): Thang Lam Cin
• Assistant Secretary (2): Sia Hau Cin Nang
• Treasurer : Joseph Tuan Sawm Tuang
• Accountant : Thang Phian Mung
• Auditor : Dongh Za Thawn

ZOMI NAM NI MAPANKHOP DING ZOTNA LEH THEIH SAKNA

Malaysia a om Zomi ten kumsim a i bawl den i minam ni sawtloin hong tung ding hita hi. Abeisa kumte mah bang in tukum zong thupitak leh picing takin bawl theih nadingin 12 November 2018 in ZAM zumpi ah kimuh Khop na kinei hi. 2019 zong nopcitak leh picingtak a i bawl zawh na’ng sum leh pai tampi hong kisamding a hih man in muanna leh lametna lianpi tawh Zomi Nam Ni Committee in anuai a bangin ma i pankhopding kong zawn uhhi. Zomi Nam Ni adingin sum leh paai tampi mah kisam a Ih pan khop ngeina bangmah in tutung zong Khua ki pawl nate panin RM 200 leh biakna Pawlpite panin RM 300 tawh mapang khawm dingin I kizawn hi.

ZOMI NAM NI ADING PANPIH NA HONG PIA TE

• 1. Dal Sian Hung RM300
• 2. Lalta Khua Kipawlna RM200
• 3. Mualpi Innkuan Malaysia RM200
• 4. MLPP pawlpi RM300
• 5. Lezang Khua Kipawlna RM100
• 6. Malaysia Ngalzang Innkuan RM100
• 7. Phunom Khua Kipawlna RM200
• 8. Kansau Khua Kipawlna RM150
• 9. Anlangh Khua Kipawlna RM200

ZOMI CUP 2019 A DING ZAKSAKNA

Zomi Nam Ni muakna in kumsim ih neih zel ahi Zomi Cup hun hong tung ding hi ta hi. Zomi Cup lut man pen RM800 leh Deposit RM400 hi ding hi. Min sazian piak nunung ni ding pen 13 January 2019 (Sunday) hi ding a, 14 January 2018 ni-in Group khenna kinei pah ding hi. Kimawlding hun pen February 5-8, 2019 sungin ki mawl dingin kikhentat hi. Amun ding tawh kisai leh vai tuamtuamte Team makaite tawh kimuh khop hun ah hong kipulak khia ding hi.

Zomi Cup Committee

• President – Pa Pan Khai
• Vice President (1) – Sia Thuah Kim
• Vice President (2) – Sia Khuppi
• Secretary – Thang Lam Cin
• Assistant Secretary – Thangpi
• Member – Sia Tuangpuu
• – Sia Go Mang
• – Sia Mungpi

DAHPIHNA PULAKNA

Tungzang khuami Pu On Khan Dal in sunglam damloh na tawh Tungshin Hospital pan in 08 December 2018 ni-in hong nusia a, 12 December 2018 ni in Subang Lutheran Garden han ah kivui thei hi. Pu On Khan Dal hong nusiatna hangin adah akap a innkuan pih te tawh kibangin ZAM/ZSM pan in dahpih na I pulak khia hi.

Elizabeth Vung Deih Kim in Cancer natna tawh University Hospital- PJ pan in 10 December 2018 ni-in hong nusia a, 13 December 2018 ni in Sungai Buloh hanmual ah kivui thei hi. Sanggam nu hong nusiatna hangin a dah a kap a innkuan pih te tawh kibangin ZAM/ZSM pan in dahpihna I pulak khia hi.

ZOMI OWNTUNE

Zomi Owntune pen December 11(Tuesday) ni pan in vai tuamtuam hangin December 24(Monday) ni Sun 1pm ah kikhinto ahih manin la kidem nuamte in min kipia thei lai hi.

December 23(Sunday)ni nitak 5pm in ZCF Bethany ah la taih na kinei to lai ding hi.

24(Monday) ni in Malaysia aa om Zomi a kua mapeuh zong nong kihelkimciat nangun kong zawn uh hi.(Lutman FREE)

• Contact- Maa Mang :0179351504
• Dal Siam :0182853771
• Sm Nua Nuam :0183673724
• Grab/Mycar : Bethany ZCF

KIDAWM CIAT NI

Malaysia gam sungah a hun zui in khuahun luanzia te lungngai kawm-in ih om ih khawl dan te kidawm ciat ni. A diakdiak in tulaitak in Malaysia gamsungah buai cipcipna te hangin vai nawngkai tawh ih kituak khak loh dingin ki dawm ciatni. Tua ban ah Ih omna Malaysia gam sungah ih pelh theih loh kimat kihenna nisim mah in om den den ahihmanin kidawm ciat ni. Hih bangkimat kihen nate ah ei mimal mahmah ih kidawp loh leh ih gamtatna a val lua te hangin a kiman zong ki tam mahmah den hi. Tua ahih manin omdan khawldan leh vak dan ih siam ding ih kizasak phapha hi.

Tua dan in mat leh hen khat na tuak ciangin na muan khat hoihtakin ko pah inla midang tampi contact kawi kawi kei zaw in. Na card tawi tunga min pen na khua makaite, pawlpi siate ahih kei leh na lawmit te theisak hamtangin. Mi pawlkhatin a card tunga min pen a tuam pi khat in pia thei zelzel uh a, tua dan mite ih kan nop ciangin muh ham mahmah thei hi. Ahih theih leh ih min taktak mah tawh ih card te bawl hamtang zaw leng kimat kihenna te ah ih kikan dan, ih kizon dan hong lemtuam mahmah hi. Zu leh sa nakhamkhit ciangin zong vak khia sese nawnloin inn ah tawldam takin om sawm zaw hamtangin.

ZEC CHERAS SANG PAN TANGKO NA

ZEC-Cheras ah sangkah nuam sangnaupang te January 02, 03, 04 2019 nite ah sun 12:00 pan nitak nai 6:00 sungin sang kiap thei ding hi. January 09 2019 ni in sang kihong kik ding hi. Contact : Sm Nuam 017 283 4101

ZEC-TALALLA LEH ZEC-MAHARAJALELA SANG PAN ZAKSAK NA

ZEC-Talalla leh ZEC-Maharajalela sangah a kah nuam sangnaupang te in 03,04 January 2019 nite ah sang kiap thei ding a, 10 January 2019 ni pan in sang ah kilut thei ding hi. Hih sang vai tawh kisai in telbeh nop a om leh Contact : Sia Pau – 016 359 2048 Sia Mung – 018 662 5141

TUKAL SUNG THONG LAM BUAIPIH

1. Cing Gin Nuam (Tuithang) Kajang thongah kiveh

2. Cha Aung (Paletwa) Kajang thongah kiveh

3. Phe Aung (Paletwa) Kajang thongah kiveh

4. Ram Liana (Sawbua) Jinjang lock up ah kikan pih

5. Nem Pum Khai (Ngalzang) MyRC tawh kiman PJ Makahmah pan hong suakta

6. Nang Dot Mang (Tuitanzang) Tanah Merah Camp ah kiveh

7. Gin Lian Sing (Tuitanzang) Tanah Merah Camp ah kiveh

8. Vung Suan Hau (Tamu) Tanah Merah Camp ah kiveh

9. Ngin Sian Kim (Pangsak) Rantau Panjang Lockup ah kimu thei

10. Luan Lun Cing (Pangsak)Rantau Panjang Lockup ah kimu thei

11. Khual Lun Cing (Pangsak) Rantau Panjang Lockup ah kimu thei

12. Kap Sian Mung (Pangsak)Rantua Panjang Lockup ah kimu thei

13. Tung San Sian (Pangsak) Rantau Panjang Lockup ah kimu thei

14. Thawng Tha (Bungtlang) Rantau Panjang Lockup ah kimu thei.

KIMAT KIHEN NA TUAK LEH

Zomi te sungah kimat kihenna na tuak zenzen leh hih phone no. te ah na hopih pah in. Nang a dingin a kiging sa in om den ding uh hi. Sia Tuang Pu : 016 254 4093, Sia Go Mang : 018 202 1216

NASEP LAM TAWH KISAI

ZOMI nasep neilote in nasep tuamtuam om hi. A lunglut leh dot nop aneite in Sia Khuppi— 016 3838 014, 011 3563 2059

ZATO LAM TAWH KISAI-in vai khat naneih leh Contact : Sia Mungpi 018 3122 957

LUNGDAM KOHNA

ZAM zum leh nasepna te adingin mapan khopna hong piate tungah lungdamna lianpi kong pulak khia uhhi. Zomite itna veina taktawh ih zumpi adingin hibangin mapang khawmin nong dinpihnate hang mah uh tawh tuni ciangdong a kikalsuan toto zo a hihi. Mailam ah zong apiakhiazo semsem dingin TOPA’N thupha hong pia henla, a zahtampi in hong thukkik tahen. 1. Khup Khan Pau (Tuizang) RM20 2. Gin Lo Piang (Haupi) RM50