Yangon Khuado thupiang khat

Yangon Khuado thupiang khat

Nung Oct 23 Yangon ah kibawl Khuado Pawipi ah mipi hall dim in a ki om lai tak hi. Tua lai tak in a nung lam kiu khat a om khangno lai pasal khat hong sibup vat hi. A nung lam a om mipi te ki umcih ngeingai in a tuukna pan kipua in hall pualam ah kituah pih hi.

Tua laitak in Khuado vaihawm Makai khat ahi Lt Col Vung Suan Thang hong tung hi. Amah pen Siavuan khat hi a, Mental Health lam ah specialist ahi hi. A cina tawmvei a et khit ciangin, va pai dildel in mawtaw nung buk sung ah hong puak Emergency Kit sung pan zatui pawl khat hong la in hong sun hi. Tawm vei khit ciang in a cina pa zong hoihtak khua hong phawk kik hi.

Siavuanpa in Cina te innkuan a ciahna ding a omna North Dagon dong ama mawtaw tawh va khak ding in hong kithawi hi. Khuado vaipuak nei makai khat a hihna tawh pusuah ding lemlo a, va kha thei lo hi. A lungnuam lo ahih man in Cina te ciahna Taxi sap ding ama mimal kiang pan sum tulsawm hong pia khia lai hi.

Khuado zong nuamtak le picing tak in kizom suak thei hi. Mipi tampi kikhopna mun te ah hi bang in lamet loh thute a piang thei thu khat hi.

Pawi vaihawm makai te ii kiginkholhna, mipi a tamzaw ii muh theihna ahi Stage tung bek tham lo, stage nuai a pualam vaite ading na ngawn ah a vaihawm siiamna uh hi thupiang tungtawn in kimumim tek hi.

Pasian in hih bang a thuvaihawm siiam bek tham lo, itna le deihsakna a nei maikai te tung ah thupha a zahtampi hong thuk sak kik ta hen.

(Hih thu gelhna nading Marn hong hawmsawn Dr. Don Sian Man tung ah Zingsol pan Lungdamna kiciamteh hi.) Zingsol