Yangon ah kumcinglo nasemin aom numeino nih kibawlsia gawp

Yangon ah kumcinglo nasemin aom numeino nih kibawlsia gawp

Yangon, Aung Mingalar Highway Bus Station aom vanzuakna Store khatah saineinu in numei naupangno nih bawlsiagawp ahih manin Report kibawl cih Yangon Police te Facebook pan kiza hi. Tua numei naupangno nihte pen tua Store sai ah sumthalawh, nasem in aom uh ahihi.

Yangon Police te genkhiatna ah saineinu pen kum 40 aphakhin Phyu Phyu Htun kici minneikhat hi a, Report aom bangin March 13 ni in vanzuakna sai ah asitding in kipai cihi. Media tuamtuam te, Yangon Police te, Highway Bus Station thunei te zingsang 3:30am hunpawl in Store sai ah asitding in apai uhciang in numei naupangno nihte ki bawlsiagawp takpi cih mukhia uhhi.

Nasem in aom tua numeino nihte lakah khatpen kum 12 bek phapan in, Taungdwinkyi Township panin nasemding in Yangon ah apai ahihi. Adang numeino khatpen zong kum 10 bekbek phapan in, Kyaiktho Township panin Yangon ah nasemding in apai ahihi.

Tua numeino nihte pen apumpi dimphial in kibawlsiatna vive kimu kawikawi, aci asa dupgawp uhhi. Banghang in hicihiam cih akidot ciangin saineinu in sikpum tawh sat, kawnggak tawh sat, khetawh sui, meikuang lakah siktul halsa in tua asatlaitak aci asa tungah depkawikawi cihbangin bawlsiagawp cimawk hi.

Tua abawlsianu saineinu pen Yangon Police te’n manpah uh a, Human Trafficking tawhzong kizopna aomhiam cih kancianding leh akisam bangbangin thubawlding in manpah uhhi.

Union Minister for Labor, Immigration and Population U Thein Swe in agenkhiatna ah Kawlgamsung ah naupang kumcingnailo nasem Child Workers bekbekpen mi 1.2 Million bang omding cimawk hi. Tualak ah alangbang in lauhuaina, bawlsiatna tuakkhading uh cisawnsawn hi.

Tuabang Data ngahkhiatna neithei in, kibawlsia cih atheih uhleh kumpi in amanlang in honkhia mengmeng le uh hoihding hi.

More: Mandalay Region sungah innteeng nasep asemkhat kibawlsia

Nungdiak mahmah inzong Mandalay Region sungah numei innteeng in aomkhak ki bawlsiagawp cih kiza hi. Gamdang ah nasep baihlo, Boss te thuak hamsa mahmah ihcihleh Kawlgamsung zong baihtuanlo veve hileh kilawm hi. ZD Sawltak #zomidaily