White House pan theihhuai leh tulai US thutuamtuam (August 28)

Covid-19 Update XXVi: White House Press Briefing pan atheih huai thu pawlkhat leh tulai tak US sung thu tuamtuam te: (August 28, 2020)

1) White House Briefing pan new update pawlkhat:

– President Trump in tu kha sung nasep (job) 9 million bang kibehlap in unemployment rate tampi kiam hi ci hi. Tua bek thamlo in tu sung teng stock market zong kah mahmah aa, kum tampi sungin asang pen record tung to hi ci hi. A diak diak in 401K anei mipi te aading phat tuamna tampi ngah ding hi ci hi.

– US Food and Drug Administration (FDA) in convalescent plasma pen emergency use authorization zat theih dingin ataangko khit zawh ciang Pu Trump in Covid-19 natna nei in adam khin sa te kiangah si (blood) piakkhiat tek dingin hanthawtna nei hi. Hih Covid-19 natna kibawlna (treatment) pen Covid-19 natna ngah in adam khin sa te ii si tawh tulai tak Covid-19 natna ngah in a nasia te bawl kik na in kizang uh in mitampi in noptuamna ngah uh hi ci uh hi.

– Tulai tak Laura acih hurricane huihpi US gam Texas, Louisiana, Arkansas, Missippi te ah hong lut ta aa, siatna tampi om thei ding ci uh hi. Tua tawh kizui in President Trump leh Vice-President Mike Pence te Federal Emergency Management Agency (FEMA) headquarter ah vai pai uh in tha piakna va nei uh aa, mai mipi sungin Texas leh Louisiana te ah va zin in huihpi hangaa siatna te va van ning ci in Pu Trump in gen hi.

– White House in Covid-19 test manlang tak aa bawl theih na “Rapiad Covid-19 test” akici testing bawlna150 million lei hi ci in White House press secretary Kayleigh McEnany in taangko khia hi. Hih testing bawl na pen 15 minutes sung in Covid-19 test result kithei khia ta ding hi ci hi.

– Zani tak in ni 4 sung abawl uh Republican National Convention (RNC) pi nuamtak in bawl zo ta aa, tua lai ah Republican party pan ulian mithang tampi leh President, Vice-President ten thu genna nei uh hi. President Trump in hong tung ding November election ah kidem kik nangin officially in san na va nei kik ahi hi.

2) Fourth coronavirus stimulus package update pawlkhat:

Fourth coronavirus stimulus bill tawh kisai Republicans leh Democrats te kikal thukimna tu dong ngah zo nai lo uh hi. White House leh Republicans lam pan $1 trillion proposal tawh khawl bawl phot uh aa, Democrats lam pan 3.4 trillion proposal a ngetna uh pan $ 2 trillion ah khiam suk kik uh aa, tu dong ciang kiho na kician nei kik zo nailo uh hi. Democratic National Convention (DNC) leh Republican National Convention (RNC) te kibawlna te hang in kihona te zong akisawt to to hong suak hi.

– Abeisa August 22 ni (Saturday) ni in House Democrats te vacation alakna uh pan hong ciah kik sei sai uh aa, U.S Postal Service (USPS) te huhna piakna ding $ 25 billion apha bill khat vaihawm uh in, vote khiat na kinei uh hi. Tua bill pen House ah vote 257-150 tawh zo uh hi. Ahi zong in abeisa hun te mah bangin Republicans atam zawkna senate ah lelh ding uh aa, President Trump in zong veto ding cih akithei khinsa ahi hi.

– White House chief of staff Pu Mark Meadows in ABC news tawh zani interview ah agenkhiatna ah Democrats ten gamgi huhna – boarder relief pen hong vote sak leh uh amau nget USPS bill pen ka thukim kha ding uh hi ci hi. Abeisa Sunday in in Pi Nancy Pelosi tawh kimuh ding ka hanciam aa, ahih zongin amah pen meeting kah ahih manin ka kimu thei kei uh aa, stimulus bill ding vai kiho kikna kinei zo nailo hi ci in Pu Mark in gen khia hi.

– Anu nung pen update ah Pi Nancy Pelosi leh White House chief of staff Pu Mark Meadows te asawt loin kimu kik ta ding uh aa, negotiation kipan ta ding uh hi ci in CNN in genkhia hi.

3) Coronavirus vaccine update pawlkhat:

– World Heath Organization (WHO) in Coronavirus vaccine thoh khiat zawh nangin leitungbup company 9 tawh tawh na kisem khawm aa, tulai tak vaccine trial abawl lai tak uh hi ci in August 24 ni new briefing ah genkhia uh hi. Leitungbup pan gam 80 val te zong WHO tawh hong kipawl uh aa, vaccine pen a safe thei thei leh amanlang thei thei bek thamlo in mi khempeuh ngah theih nangin aman tawm thei thei in vaihawm zawh nang kihanciam ding hi ci hi. Nung deuh in Russia te taangkoh khiat vaccine pen WHO in akan lai tak hi aa, lungmuanna om tak nai lo ahih manin gam tuamtuam in a lei ding thukimpih zo nai lo uh ahi hi.

– U.S mipil expert leh coronavirus task force member khat ahi Dr. Anthoy Fauci in coronavirus lim tak test lo pi aa, mipi sung hawmkhiat pen la huai mahmah aa, mipi te tung siatna tampi tung thei ding ahih manin kumpi thu nei te tung lim tak in ngaih sut ding leh bawl ding gen khia hi.

– President Trump in vaccine company thum ten vaccine trial final phase bawl bawl ta uh aa, asawt loin vaccine kibawl zo ta dingin kilamen hi ci hi.

4) New York state ah zato lum a niam pen tung suk ta:

Tu nipi sung New York state ah COVID-19 natna hangin Zato lum leh ICU atung mi tawm pen aa, asi zong kiam pen hi ci in Gov. Andrew Cuomo in genkhia hi. Tulai tak zato ah COVID-19 tawh zato lum mi 472 dong kiam suk ta aa, ICU atung mi 110 bek om ta ci hi. Abeisa hun in New York state pen Covid-19 natna nei leh asi atam pen state hi aa, tu in akiam pen state sungah kihel ta ahi hi.

5) Florida state ah Covid-19 natna ngah mi 600,000 val ta:

Tulai tak US ah Covid-19 natna akhang pen state khat ahi Florida state ah Covid-19 natna ngah mi 600,000 val pha ta aa, asi mi 10,000 val pha ta hi ci in Florida state health department in taangko khia hi. Zani August 25 ni in natna ngah thak 2258 pha aa, asi mi 66 pha hi. Abeisa hun te ah Florida state sung om Miami khuapi pen Covid-19 phulna mun (pandemic epicenter) in akiciam teh ahi hi.

6) University leh College te ah Covid-19 ngah thak tampi kimu:

Tulai tak US gam sung state tuamtuam ah High School sang te leh College sang te kihong kik aa, Sang pawl khat te ah sangnaupang te sung teng Covid-19 natna kilawh uh hi.

– Georgia state sungaa College sang minthang khat ahi Georgia Institute of Technology sang ah zani August 25 ni in Covid-19 natna ngah khak mi 33 kibehlap aa, tua sang pan Covid-19 natna ngah 374 pha ta hi. In-person in sangkah I om leh kidawp huai mahmah hi.

– Indiana state sungaa om University of Notre Dame ah August 24 ni in Covid-19 natna ngah thak sangnaupang 30 kibehlap aa, August ni 3 ni pan kipan tuni ciang dong natna ngah mi 471 pha ta hi ci in University of Notre Dame thu nei ten taangko hia uh hi.

– Kentucky state sungaa om University of Kentucky in August 3 pan ni 22 sung Covid-19 natna ngah sangnaupang tampi mukhia uh aa, zani in zong 49 in natna ngah (positive) in quarantine lut uh hi ci hi. Tuni ciang dong Kentucky state sungah Covid-19 natna ngah mi 44,568 pha ta hi.

– California state sungaa om University of Southern California ah sangnaupang 100 te Covid-19 natna ngah (positive) uh aa, a diak diak in sang campus housing ah aom sangnaupang te tam pen ci uh hi. Sang lam thu nei ten Covid-19 natna kilawh hong tam tek tek ding ahih manin kidawp tek ding taangko khia uh hi.

– Alabama state sungaa om University of Alabama ah sang hon zawh nipi khat sungin sangnaupang leh sang nasem mi 566 ten Covid-19 natna ngah uh hi ci in University of Alabama President Stuart R. Bell in genkhia hi.

– Iowa State University ah sang hon zawh nipi khat sung Covid-19 natna ngah mi130 om ci in Sang thu nei ten taangko khia uh hi. Sangnaupang aom zah ii 13.6% pen Covid-19 natna ngah ta uh hi ci in genkhia uh ahi.

7) FDA in convalescent plasma pen “emergency use authorization” dingin taangko khia:

US Food and Drug Administration (FDA) in convalescent plasma pen emergency use authorization zat theih dingin taangko khia uh hi. Convalescent plasma cih pen Covid-19 natna ngah in adam khin sa te ii si (blood) la khia in akibawl kik zatui nam khat hi aa, Covid-19 natna nei te akibawl kik na in kizang in mi tampi in noptuamna ngah ci uh hi. Abeisa in zong coronavirus nam te ahi MERS leh SARS te do na in zong kizang aa, Ebola pulnatna nei te tampi in zong dam na ngah uh ci uh hi. Hih zatui pen US gam sungah Siavuan ten Covid-19 nei mi 60,000 te tung pia khin ta uh aa, atam zaw in noptuamna ngah uh hi ci uh hi.

8)) New York state in Airport ah Covid-19 testing site koih ta ding:

New York state in amau state sung vanleng tawh hong tu teng khempeuh Covid-19 test bawl ding uh aa, vanleng tual (airport) khempeuh ah Covid-19 testing site bawl ta uh ci in New York Gov. Andrew Cuomo in August 24 ni in taangko khia hi. Tua bek thamlo in leilam mawtaw tawh hon glut khempeuh zong ni 14 sung self-quarantine bawl ding thu khun zong taangko khia khin uh hi.

9) K-12 Kumpi sang (public schools) te ah Covid-19 kilawhna dinmun:

– Connecticut state sungaa om Danbury public schools te ah in-person sang kihong kik aa, sangnaupang te tampi Covid-19 kilawh uh hi. Sang hon zawh nipi 2 sung sangnaupang 178 ten Covid-19 natna ngah uh ahih manin sang thu nei te in online ah sangkah kik dingin geelkhia kik uh hi.

– Mississippi state sungah high school sang te kihong kik in sangnaupang tampi Covid-19 natna kilawh gawp uh aa, sangnaupang 4000 val leh sangsia 600 val te quarantine bawl uh hi.

10) American Airlines in nasem pi tampi nasep khawlsak ding:

Covid-19 pandemic hangin leitung gambup ah agol pen Airline khat ahi American Airlines in October ni 1 in pan kipan in nasem mi 19,000 te nasep khawlsak ta ding ci in American Airlines CEO Doug Parker and President Robert Isom ten genkhia uh hi. American Airlines in US Congress leh US Kumpi kiang pan stimulus huhna sum te angah uh hangin ding zo tuanlo ci uh hi. Tulai tak American Airlines in nasem pi 133,700 nei uh aa, atawm pen nasem mi 40,000 bang khawlsak kul ding ci hi.

11) September kha ciang US ah Covid-19 hang aa asi 200,000 cing ta ding:

United States Centers for Disease Control and Prevention (CDC) in hong tung ding September 19 ni ciang US ah Covid-19 hangaa asi mi Thein nih (200,000) val pha thei ding hi ci in genkhia uh hi. John Hopkins University te taangkoh khiatna tawh kizui in tulai tak US ah Covid-19 hangin asi mi 180,000 val pha ta hi.

12) Kawlgam Covid-19 dinmun update:

– Ministry of Health and Sports of Myanmar te ii taangko khiat na tawh kizui in Kawlgam ah Covid-19 natna ngah thak kibehlap ziahziah aa, August 25-26 sung – 110; August 27 ni – 16; August 28 ni – 15 kimu khia in tuni ciang dong Kawlgam ah Covid-19 natna nei avekpi 643 pha ta hi. Tua lak ah Yangon pan 306, Rakhine state pan 242 leh Chin state pan 18 pha ta hi. August 28 ni akimu khia lak pan Yangon pan mi 5 pha ta ahih manin Yangon kiim aaom te kidawp huai mahmah hi.

– Tu aa kilawhna atam zaw pen community transmission akici gam sung, mipi sungah kilawhna hi aa, kilawhna nasia thei mahmah dingin kium mawh hi. Abeisa hunte ah Kawlgam sung kilawhna pen Gamdang pan hong ciah te kiang pan bek a kimukhia ahi hi. Mipil expert pawl khat in belh second coronavirus wave akici anih veina Covid tuihual hi kha ding hi ci uh aa, hih anih veina Covid tuihual pen akhat veina tuihual sangin sah 10 (10 times) kilawhna manlang zaw thei ding hi ci uh in tu in zong Europe gam pawlkhat ah zong hong tung tung ta hi.

– US gam ah zong “community transmission” akici gam sung, mipi sung kilawhna tawh natna kilawh gawp aa, tu in natna ngah 5.8 million bang atungto ta ahi hi. Kawlgam ah zong tu in community transmission kimukhia ta ahih manin lahuai mahmah din mun ahih manin Kawlgam sungaa om khempeuh i kidawp ciat ding leh apua pai khiat ciang Maituam (mask) thuah hamtang in 6-feet socia distancing mah i neih tang tang ding kisam mahmah hi. Topan Kawlgam sungom khempeuh hong kembit ciat ta hen.

13) Johns Hopkins University & Medicines te report na tungtawn in August 28, 2020 ciang dong Leitung ah Covid-19 natna ngah mi 24,563,380 (24 million) pha ta in asi mi 833,466 pha ta hi. US gam ah natna ngah mi 5,892,779 (5.8 million) leh asi mi 181,409 pha ta hi. Kawlgam ah natna ngah mi 643 pha ta in asi mi 6 om ta hi. Kawlgam ah tulai tak Covid-19 natna akilawh ziah ziah lai tak hi aa, US om ei Zomi te sungah zong Covid-19 anei tampi kibehlap toto lai a hih manin i om na ciat ah i kidawp ciat ding leh I innkuanpih te hoih tak I kepcing ciat nang thupi mahmah ding hi.

Note: Nung Wednesday ni nitak ZNTV pan Lia Zo Bawi hong taangkoh khiat pawlkhat zong gawmkhawm in Lai tawh asim nuam te aading “news version” tawh kong suahsak kik ahi hi. Thomas On Sian Mung (Thomas Mung Guite) Washington D.C August 28, 2020. MOMNO Media & Museum