Welcome to Portland: Kong ngaklahta uhhi ~ Dr. Hau Za Cin

Welcome to Portland: Kong ngaklahta uhhi ~ Dr. Hau Za Cin

(A 8-veina Zomi Baptist Churches of America khoppi tunna phualpi pan ngaklahna) Portland khuapi na galmuh ciang vukmual minthang Mt. Hood dong vanleng lengto lai ding hi. Mt. Hood mit dima na muh khit ciang a tungsan pan vanleng veilam ah hong kihei diaidiai dinga, damdam in niamsuk hiaihiai in a sawtlo in Portland vanlengtual na tu ding hi.

Portland vanlengtual na tukma in kongzing hoihpipi leh singkung nim dildialte na mit dimin na encim kei dinga, Willamette luipi leh Columbia luipi te gun dung zuiin na lengsuk diaidiai ding hi. Luipi sunga ngasa lim mahmah vak damdamte na muh theih loh hangin Portland khuapi na tun ciangin na mehkuang sungah sa vitvit in hong kilui ciangin lim na sa mahmah ding hi.

America gam leilu nitumna lam a om Oregon State pen singkung tamna gam hi a, Zogam mah bangin hing dipdep hi. Lai Siangtho sunga kumpi David in Jerusalem biakinnpi a lamna dinga a zat Taamtak namte tamna gam ahih manin mualdung khempeuh leh luidung khempeuh singkung nimdildial hi. Amau minthanna zong singluang, singpek hi a, a bawhlung suite uh zong Timbers (Singluanggolte) kici liang uh hi. A khuapi gol pen Portland hi a, kumpite zumpi omna bel Salem ahi hi. Tutung khoppi tunna ding pen Portland khua hi. Canada pek pan hong luangsuk luipi minthang Columbia lui gei a om hi.

Zomite khoppi sim dingin Zogam Thak America khuapi tuamtuam pan vanleng tawh hong leng ziahziah ding uh a, Sehnel gam banga singkung po lohna mual golpipi leh cikhuk omna Salt Lake khuapite kheng in leilu nitumna lam zuanin a tawmpen nai 3 bang a len khit uh ciang hong tung pan ding uh hi. Singapore pan Zangkong pen nai 3 kiim mah kilenga, tutungin ong ZBCA 8veina khoppi siim dingte a tawmpen nai 3 peuhmah vanleng tawh leng masa in hong tung pan ding uh hi.

Gam keu singkung lopa omlohna kantan in singkungte a nim dildialna mun hong zuan ding uh ahih manin a khuahun zong vot hiuhiau ding, guahphin seuhseuh ding, ahih hang puanlum silh kullo ding, guahdal lukhu khuk kullo ding! A nop-a nuam ding himai.

Khoppi sim ding khempeuh Portland vanlengtual a tun uh ciang a vaidawn inntek pawlpi khempeuh tawh lungdam maitaia kimu in “Hong dam maw” kici ziahziah dinga, huihvot nung hiauhiau leh tuivot luang sialsial singkung nim dildial te lak ah vantung leh leitung a piangsakpa phat khawm ziahziah ding cih pen hong ngaklah huai mahmah khin ding hi.

Ka khoppi sim ngeina khat ah hong vaidawnte in “I bansah vang” hong cih ziahziah uh bang phawkkik liang ing. Nuam lei taw! Ngaklah ing… (zop lai ding) Dr. Hau Za Cin