Vote piaciat ni ~ Rev. Dr. Tung Za Pau

Vote piaciat ni ~ Rev. Dr. Tung Za Pau

Lawmte, USA President kitel na le Myanmar kumpi makaite kitelna ah vote piak khuan a neite in pello aa vote piak ciat na ding in kong thum nuam hi.

Kumpi kitelna pen Pastor kitel na, siampi kitel nate bang hilo hi. Kumpi dingte lungsim thuk mahmah hi. Thei haksa mahmah hi. A pua lam bek en kei ni in, a sung tawng theih sawm ciat ni ei.

Vote piak ma in theihkhol ding thu pawlkhat ka gel nuam hi.

1. Gamtat na hoih a nei hiam? A. Mimal nuntakna, B. Innkuan sung nuntakna, le C. Midangte tawh kipawlna a siam hiam?
2. Pilna le siamna. A. Hih nasep tawh kisai in pilna, le siamna a nei hiam? A sin ngei hiam? B. Midangte a hawm nuam hiam? C. Aituam ngai lua mi a hi hiam?
3. Gamdang te kizopna. A. Gamdang mite in thupi a sa hiam? B. Kikhawl siam maw? C. Makai siam maw?
4. Thuman a gen hiam? A. Kampau na le nuntak na a ton khawm hiam? B. Tu nung kum 10 lai le tu ni bang kilam dang hiam? C. Kamciam pel mi maw?
5. Nasep na? A. Kumpi nasep kum bangzah sem khin hiam? B. A daupai maw? C. Income tax manman pia maw?
6. Upna. A. Nuntak na thak nei takpi maw? Jesuh Khrih a um takpi mah a hi hiam? Kineih khawng peuh om thei hi. B. Minam deidan na nei maw? C. A zawng a hau deidan mi maw, a kang le namdang mite deidan mi maw?
7. Nuntakna? A. Ki niam khiat mi maw? B. Lungsim ciimna anei maw? C. Hi takpi maw?

Huhpa Kha Siangtho in limtak aa lam hong lak mite bek vote ih piak theih nang in hih thu 7 te lung ngai kawm in, vote pia ni. Pastor pawlkhat in Church sung ah tua pa vote pia un ci in gen uhhi. Tua pen civil law in phal vetlo hi. Thu hong kibawl thei hi. Ki dawm ciat ni ei guai.

Vote pialo in om kei ta peuh un. Vote khat in a vom le a kang khentel thei hi. Kua zaw vote pia un cih ki gen lo ding hi. Nangma lungsim sung ah pilvang tak in le suakta tak in khentel in la, vote pia zaw in.

Kitel kician khit ciang in a zo peuhpeuh lungkim tak in, lungdam tak in ih saan siam na ding zong kiging sa in om pah ni ei. Tua pen pilna hi. Topa thupha. Lungdam hi. Rev. Dr. Tung Za Pau (November 01, 2020. 2:38pm EST.)