Vondeih Kep Ding – 70 (Dimno’ Pa)

Dear Tawngno,
Khatvei mipa khat si in vantung i Topa kiangah ciah hi. A gallam khat ah puanpaak bekbek a silh Vantung mihonte-in, “Siangtho, Siangtho, Siangtho,” ci-in Pasian phatna la, asak za in,

“Ka Topa aw, kei zong hua mun ah hong paipih in. Ke’n zong kei mah ahong bawl Pasian min phat nuam ing,” ci-in i Topa Zeisu kiangah hong ngen hi.

I Topa Zeisu in zong hong paipih in agei hong tunkuan ciangin mipa hong utlo kik hi.

“Ka Topa aw, kei hua mun ah lutnuam keng. Den-a i omna mun mah ah hong kilehpih kik in,” hong ci hi. Acih bangin a utna mun ah hong paipih kik hi. Tua ciangin i Topa in mipa kiangah,

“Ka ta aw, bang in na lungsim hong ngawnkai sak in, banghang in Pasian phatna mun ah pai nuam ing, cina pi cin painuam lo kik na hi hiam?”

“Na lungkhamna te hong gen in. Kei mah in ka hong damsak ding hi,” hong ci hi.

Tua ciangin mipa in,“Ka Topa aw, bangmah dang hang hi kei. Kongpi angak Vantung mite in VCD khui tawi kawm in ding uhi. Ke’n tuate leina dingin sum hong keng lo hi’ng,” hong ci hi.

Hih tangthu tom liklek hoih sa ing. Agelh te-in tuhun khuahun paizia tawh kituak dingin agelh hi kha dingin um ing. Tuhun ciangin mite in biakinn pen van leina, van zuakna ding mun in zang mawk uhi. Ko kiang bangah nipi ni sim phail in video (VCD, DVD) khui zuak dingin hong tungden phial hi.

Ei hong bawl Pasian i biak nadingin i bawl biakinn pen van leina, van zuakna mun in a kizat nawn loh na ding lunggulh in. Lampi ding hong zonpih in la, na lawmte tawh zong nong kuppih nading un hong zawn ing.

Hong it,
Na pa

Columbus, OH
October 20, 2016

Facebook ah Dimno’ Pa Page non na Like sak ve vua!
https://www.facebook.com/dimnopaa