Vondeih Kep Ding – 18 (Pau Khan Kap)

Vondeih Kep Ding – 18

Kong it Tawngno,

Khuapih te thu, a kigen ngei khat hong gen leng: Khat pa pen Tedim pan in Zolai tawh Lai Siangtho sang manin ih khua ah hong ciah hi. Ih khua hong tun ciangin Yangon panin hong hawh suk khuapih te khat tawh kimu in, “ Yangon ah ka buaih ( Lukhu neelkai ) ngah a thang hia?” ci-in dong, kici hi.

Hih thu ka ngaihsut ciangin mi khempeuh pen a minthang nuam ahih lam phawk kha kik ing. Tua lak ah na pa zong ka kihel a, nang zong mithang nuam lo-in omlo ding hi teh! Banghang in keimah na pa pen ih khua bup in hong thei lo-in, tawm cik bek in ka min hong thei ahi tam? Banghang in gamdang ah ka omlam mi-in hong thei kha lo ahi tam? Banghang in ka ta nahih lam takpi hong phawk kha lo uh ahi tam? Banghang in mi-in ih khua takpi za ngei lo ahi tam? Bangbang in…banghang in ci-in tampi tak gual thei lai hi hang!

Banghang kici ahih manin ahang khat, a thu khat om ding hi. Tawngno, banghang in nang’ ka ta nahih lam ‘Zogam’ in hong thei lo-in, kei mah na pa zong banghang in ‘Zo leitangh’ in hong thei lo mawk hiam? Banghang in leitung in ka min hong thei lo-in, banghang in leitung ah nang, hong kitel lo mawk hiam? Ka khualzinna te kua mah’n gen kikkik lo-in, banghang in ka kammal te kua mah’n lai ah cipteh lo mawk hiam?

Na pa’n ka ngaihsut khak khat in bel, i pata in i khua leh i tui ading, i mipih te ading leh leitung ading in na hoih tampi i sep nai loh man ahih tam ci ingh! Nang e leh na bang ci ngaihsut a, paukhankapTawng? Hong gen kik in, ih pa ta in kikum khawm dih ni!

Nangmah hong it,

Napa

July 10, 2013

Columbus, Oh. USA