Vondeih Kep Ding – 10
Kong it Tawngno,
Nuntakna ding zong in sak leh khang, sim leh maal kawm in kazin na panin na pa’n khat vei leh gilkial dangtak in omin, khat vei leh guahzu meeikai nuai ah belh ding nei loin ka om hi. Nisa thuak manin avom ding hi leng meihol kabang khin ding a, niliap nuai aom hangin a ngo ding hi leng zong vuuk bangin ka ngo khin ta paukhankapding hi. Gilkial in asi ding hi leng ka meel cih thadah in kaguh katang na ngawn nong mu nawn kei ding vua, anlim tuilim nek manin a thau ding hi leng zong leitung a mithau pen pa sangin ka thau zaw khin ta ding hi. Nuntak na ih cih bel Sanginn a, laisimbu sung a ih sim ziauh, Siate hong gen ziauh tawh na kibang kei mawk ei,Tawng!
Tua ma kum ( 3 ) lai pawl in kazin na pan ka tuah khak thu khat ka lungsim ah hong phul valval ahih manin na pa’n hong gen loin ka om thei 
kei hi. Mi khat thu hi. Innlam a kaom lai mah bangin nitak ki khop ahi a, home-cell ahi zongin ka hun ngah simin na dangdang te nusia in ka pai zel hi. Tua bangin kapai na ah nitak khat home-cell kikhopna panin innteek te’ ading deihsak thunget hun hong ki hong hi. Innteek lam panin Tangval pa hong ding in a huam thungetna ah hel ding hih ci bangin thu hong gen hi.“Nasep loh in sum lom ngah na ding, hih mun panin pai khia mengmeng in gam thumna ka tun baih theih na ding leh, gam thumna ka tun ciangin zi ( innkuan pih ding) ka neih pah theih na dingin Pasian kiang ah thu hong ngetsak le uh cin” ci-in hong pulak khia hi.
“Nasep loh in sum lom ngah na ding;
Gam thumna leng mengmeng na ding leh
Gam thumna tun ciang zineih theih pah na ding”
cih thute ka zak ciangin na pa ka cimul bang tho liang hi. Mihing te’ lungsim bel a huaiham mahmah ih hih lam kaphawk kik san hi.
Tawngno, tua bangdan mah in ih inn ah home-cell hong tung in innteek te’ adingin deihsak thungetna ah hel ding na’ng hong kipulak sak leh bang teng gen sawm nai a?
“Ka pa in a khualzin na gamdang panin lampi ah avakna pan’ mihau mahmah te’ mangsak, a manpha mahmah Diamond khat amuh theih na ding leh kei zong ka sang kahna ah laisim loh leh lai et loh sa-in all D. ka ngah na ding, Pasian kiang ah thu hong ngetsak un” cih khawng e leh a hoih pen tam, a kicing pen tam!
Napa’n hihtawh kisai in na ngaihsut thute thei nuam sing e?
A tawngtung a hong it,
Napa
Columbus, Oh, U.S.A.
April 29, 2013
Comment piaknop aomleh...