Vaphual mul pulh nailo ~ Hau Za Cin

Vaphual mul pulh nailo ~ Hau Za Cin

“Pianpih na laizom hi’ng” cih la a phuahna ah Sia TS Khai in ‘Vaphual mul themcik pulh veh aw’ a ci nuam tawh kibang hi. Ahi zongin tua Vaphual mul po kikta a, pulh kik nailo hi. A pulh kik ding zong hilo hi. A vul, a tul ngeilo, a hing den ding hizaw hi. Kua mawhpuak hi ding hiam? Zomi aw, nang leh kei tavuan hi.

Ka pianzawh ka ngasa mat lak ah a lian bel ding ‘ban tan’ (ka khutmuk pan ka ban bul tan pha) ngakawi tawh ka mat khit ciang lungdam nuamsa lua in Dolphin tuibual hong pai nangawn ka mangngilh uh hi. Ahi zongin ka zak thu pan ka lungsim ah hong kilang la khat om a, tua in hih a nuaia la hi.

Pianpih na laizom hi’ng by TS Khai (1980’s)

Tehpih omlo tung Sianmang hong itna
Naubang ka san lungdam lo om thei ke’ng
Lung gelgel ing, Sian sinthu siam bang sin ding
Zing ka zin ciang laizomte tenna ah

Vangkhua lai ah meelma Burma-te ciin
Henkol tangin laizomte vangkhua lai ah,
Lai ah na sa’ng henkol sut ding omlo,
Guallai ah nuihciam hong lel lo aw,
Pianpih na laizom hi’ng.

Lungtak sinthu lailung ah ka gel ciang
Na sa lua ing leitang neilo Zomi
Zogam leitang pat puanbang sia hizo ta
Ka gam ka lei cia ka lel ding omlo.

A la thu pan i et leh Sia TS Khai pen Kawlgam pan India ah sangkah dingin hong zin a, kiman in, henkol sut ding omlohna ‘laizomte vangkhua lai ah’ thongkia hi. Vaphual mul pulh hi cihna hi, a takpi mah hi ahi tam? Hi thei kha inteh. Tua hun lai in Zomi a tamzaw tu hun tawh kibanglo in eima tenna khua ciat ah om in, zinsuk, zinto tamlo a, a gamla vakkhiate zong India leh Burma kikal khawngah a vakkhia ciang hilel hi.

Sial khekhap sunga Uiphuk om mah bangin i muhna toi a, i ngaihsutna tom in, i khuamuhna gamla lo hi. I hih khat peuhpeuh ‘local’ mahmah a, tawta mahmah hi. Tua manin ei khua cih dan ahilo peuh kimu theiloin, kimudah a, i mitkhamsak in kithuakzolo hi. Tua manin ei khua cihdan hilo peuhmah kigalbawl in kituam et a, ‘tun sung khat piang’ nangawn kimelma kha zen hileh kilawm hi.

Ahi zongin tua hun in damdam in hong kheng a, tuhun ciangin i laibu zong sah zawta, i khualzinna zong gamla zawta, i tenna zong kigamla zawta, i muh, i theih zong kibehlap in ZOMI zong khangto ta a, khuata lungsim (village) kinusia hiaihiai in, leitungbup a huapzo lungsim (global) kipua pianpian ta hi. Tua hang mah in Vaphual mul a pulh ding hilo a, zong pulhsak lo ding hi hang.

Vaphual mul pulh hi peuhmah leh Singngat khua ah a tung kik khin ding Tg. Mang tawh ka kihopih kha hi. Amah pen India pan in khangno laisiam hi a, USA ah vanlenghawl sin dingin hong pai hi. A siamsinna a zawh ding hunin zo theilo in awk a, haksa takin om hi cih a theih ciangin Sia Dopi (Rev. Do Sian Pau Suante), Pastor, Burmese Assembly of God Church, USA in na la in, a inn ah na kem a, tu in Tg. Mang in a maban zomkik thei ding lametna om a, hoihtak a vanlenghawl hong siam a, vanlenghawlthei (pilot) muanhuai hong hih ding kilamen hi. Sia Dopi in a genna ah, “Tg. Mang pen ka theih ngei zong hi lo, ka tanau zong hilo, ZOMI khat ahihna tawh agape itna hangin ka lak, ka khoi hi. ZOMI i hihna ka thupisimna hi” ciin hong gen hi.

Leitung bup a zeel Zomi te in hih bang leitungbup a huam lungsim lian i neih ding a kiphamawh hi takpi a (it is a must); local lungsim, tawta lungsim, lungsim neucik nei a – beh, khua, guamkhat huam ciang khawng bek lungsim neih ding hun hi nawnlo hi. Sia TS Khai te khualzinzin lai hun pen tawta lungsim, local lungsim, lungsim neunono Zomi te in i neih lai ahih leh tu hun pen lungsim lianpipi – bem ciacia i neih hun hita hi.

Tua manin i Vaphual mul zong a pulh ding hi vetlo a, a sau mahmah ding, a ham, upa mahmah ding, a khangcing ding hun hita hi.

Tg. Mang tawh phone in kei mahmah toh zong ka kiho kha a, a pianna khua Singngat, tu laitak a tenna khua uh Lamka lam ahih dan hong gen a, cina, damlo in natna theite kivelsak ahih manin Hospital na pai a, mel in ka kimu man kei uh hi. Aman hong genzelna ah, a pa neu tu laitaka Post Office ah officer lian mahmah Pa Mang Min Thang, IP&TS ahih thu hong gen ciang Shillong omlai a lawmpa Kapa hova Pa Mang zi neih ding laia a inn vuah ka va hawh khawng uh leh a kitenna uh ka kihelna khawng uh mitkha ah hong kilang a, hunlui hong phawksak kik hi. Tua lam thu tuam hi hen la. Cidama hong zawh a, India pan professional pilot licence ngah thei dinga inn lum hong tunkik ding i deihsak hi. Topa in makaih zel henla.

ZOMI te Vaphual mul a pulhsaklo te i hihna dingin nidang pek pan i pu i pa hong pattahsa lungsim lian, lungsim picing pen ei khangthakte in zong i mangngilhloh ding, i mangthangsak loh ding thupi kasa hi. Kawl lakah i teng a, Kala lakah i teng a, Mikang mivom lakah i teng ta teu zongin i ZOMI VAPHUAL lungsim a mangthang ding pammaih lua ding hi.

Kumlui in ZONET ah laiat siampen in a kitel Pu Pa Tg. Sia Taang Zomi zong lamet lohpi in Florida ah Pa Lian Pau Suante in na kem ahih manin lametlohpi in ka kimu kha uh a, lung bang lengsak zawzen hi. Ka pa khan gual phial ding himahleh amah Taang akicih mah bangin khangno bangin tangval om letlet a, tangzang mahmah hi. Ka zintun ni zingsang ka thawh ciang a khe na tuam liitluut in, computer mai ah nisuahna lam nga in na tu hithiat a, “kua na hia, na khe bangcih kha na hia…?” ka cih leh hong kigen a, a khepi cin a atsak thu leh epsom salt tawh nisim minit 20 bang a diah den a kul thu hong gen a, ‘nu ei, ka muh nopnop khat a mu kha hi mawk veng e’ ka ci kha liang hi.

Hih bangin Zomi te in Vaphual mul i zuun a, ki itna, kikhoina, kikepna, a kisamzawte huai a, itna i lah ding i pianpih ngiat hi a, Topa Zeisu hong gupna thu i theihma pek pan i neih, i zat, i kihilh tohtoh nuntakzia kilawm ZOMI te in i neih manpha mahmah khat ahi hi.

Tua manin hih banga Zo Vaphual mul a pulhsak lo, a zuun, a kemcingte hangin leitung koimun peuh ah om leng lungmuanhuai a, Zomi nih leh thum om peuh leng a kisam zawzaw kihuh in, kihuai in, kikem ding hi hang cih hong theisak ahih manin Zomi hihmah nuam lawmlawm ei. Vaphual mul a pulh ding hi kei. Dr. Hau Za Cin