Vai tung a thuneihna

Vai tung a thuneihna

Tulaitak Kawlgam a om Zomite a tamzaw i dinmun hang a i hamphatna zangsiam hile hang Minam nasepna ah ki-thahat mahmah thei ding hi.

Kawlgam a om Zomi tampitak pen innkuan sung pan khat le nih zon’sa, thalawhsa, muhsa leh gamdang tung sanggamte tungpan huhna tawh ki nungta, ki khuasa theilai ahihman in i hamphatna lian mahmah ahi hi.

A khangto khinsa gam khempeuh ah tuabang in ki-nungta theilo hi. Cidam ahih nak leh khut nei khempeuh in na sep kul hi. A tamzaw mi’ nasem kihi hi. I nasepna vai ki buaipih mahmah ciat a, vaidang thupi a om phial zong in nasep vai nusia in kisem theilo, kivaan theilo hi. I nasep vai tung ah thuneihna kinei lo, i nasep vai in ei’ tung ah thu ong neizaw suak hi.

Kawlgam ah Kumpi nasem leh company nasem pawlkhat zong tuabang mah hiding hi. Vai thupi ahi phial zong in nasepna vai tung ah thuneihna a neilo ahihnak leh utbang in, utkhempeuh, uthun in suakta tak kisem theilo hi.

Ahi zong in, tulian laitak Kawlgam ah a om Zomite a tamzaw i vai tung a thuneite ihi hi. Vai thupi i sak a om ciang, vaidang khempeuh nusia lel in ki-vaihawm thei hi. Mailam ah i gam leh mimal khantohna tawh kizui in i vai tung a i thuneihna ong kiam hiaihiai ding hi.

Tua, vai tung a thuneihna i neih lai, tuhun in i minam vai nasepna ding in a phungpi, a khuampi phuhzawh ding hunhoih pen hun ahi hi.

I vai tung ah thuneihna i neih nawnloh hun ong tung ding hi. Pau Khat Suan

Bang thupi nasa hiam?

Mite in a thupi ngaihsut thute leh a thupi bawl nate, amaute ading in a thupi hipah a, ahi zong in tua thu leh nate in a thupi ngaihsut, a thupi bawl mite’ dinmun ong lakkik hi.

Pilna zongte leh mipilte in pilna thupi pen sa a, sum zongte in sum mah thupi pen sa uh hi. Thanuamte in nasep hanciam uh a, thadahte in baihlam a mawkngah thupi sa uh hi.

Mihingte in thupi i sak pen mah ki-ngaihsunsun hi. Tua in i lungsim ong zo pen a, i lungsim in i gamtatna leh i pau i ham ong zo pen hi.

Gamtat luhek bek hilo, pau le ham in i hihna onglak ahi hi. Pau Khat Suan