US gamsung luttheihloding Muslim gamlak ah Malaysia kihello

US gamsung luttheihloding Muslim gamlak ah Malaysia kihello

Malaysia gampen ihtheihsa mahbangin in Muslim gamkhat ahihi. Ahi zongin Malaysia gampen US gamsung alut theiloding in aki khakciplak ah kihello hi ci’n Malaysia gamsung aom US Embassy in tuni in gencianna nei uhhi. US President Donald Trump ii Executive Order sungah Muslim gam 7 panin US luttheihloding cih “Travel Ban” nei ahih manin, Malaysia gamzong akihel kisa in gammi te patau mahmah uhhi.

Kuala Lumpur khuapisung aom US Embassy in agenna ah Malaysia gammi te’n US Visa ahing aneihnakleh US gamsung luttheih hi ci’n genkhia uhhi. “Executive Order” pen aki pulaksa mahbangin kikhello a, ahi zongin tua Executive Order sungah Malaysia gampen kihello hi ci’n kiciantak in gencianna nei uhhi.

Hihbang in lunghimawhna akineihna pen John F. Kennedy International Airport ah akiman gamdangmi te lakah Malaysian zong khat kihel ahih manin, Malaysia gammi te lunghimawh in Embassy te kiangah dotna anei uh ahihi.

New York Airport ahzong zanni in leitung muntuamtuam gam 20 panin khualzinmi 71 Immigration te’n kemcip uh cih kiza a, tualak ah Malaysia gammi zong kihel kici hi. Tuabang in akikemcip Detained tepen Laptops khawng kilaksak in, Terror Group ahi Islamic State te bangcimuh cih dotnakhawng kinei hi.

Tuavai tetawh kisai pen US Embassy in Information akician in genkhiatna neilo uhhi. Ahi zongin nungkal Friday ni in President Trump in Executive Order letmat thuhna neikhin a, US Refugee Resettlement Program zong ni 120 sung khawlbawlding, Suspend ding cih kihel hi.

Tuaban ah Muslim gam 7 acihcih Iraq, Syria, Iran, Sudan, Libya, Somalia, Yemen gamte panin US gamsung luttheih nading Visa zong piaknawnlohding pulakkhia a, atawmpenpen ni 90 sung peuhmah khakcipding cihi.

Tuabangin President Trump in khalna aneihpen Americans pawlkhatte hehmahmah uh a, US gamsung aom Airports tuamtuam ah lungphona neikawikawi uhhi.

More: Muslim gam 7 pan gambel te lutsaklohding vai alangpang

Malaysia’s Pakatan Harapan Opposition kici te’nzong Kuala Lumpur khuasung aom US Embassy mai ah hongtungding Friday ni ciangin lungphona neihding vaihawm uh cih kiza a, Donald Trump ii “Immigration Ban” vaitawh kisai lungkim lohna pulaksawm uh cih Malaymail Online pan kiza hi. ZD Sawltak #zomidaily