United Nations Organization (UNO) tangthu leh kilamhzia tom

United Nations Organization (UNO) tangthu leh kilamhzia tom

Leitung galpi (2) sungin nitumna lam gam thahatte ( England, France, , Soviet Union, USA) in galpi aven ciangin leitungah kilemna om nading leh leitung gam tuamtuamte’ kipawlkhop theih nang kipawlna khat phutkhiat ding lunggulhna hong neitek uhhi. Tua bang gamlian makaipi makaite’ lunggulhna hangin November,1943 tak teh United States of America President/makaipi Roosevelt, England Prime Minister Churchill leh Soviet Union President/makaipi Joseph Stalin te in leitung gambup kilemna avaihawm ding kipawlna khat apiankhiat nading tangkona hong nei uhhi. Tua khit 1944 kum tak ciangin USA gam khuapi Washington, Dumbarton Oaks cih mun ah United States Of America, England, Soviet Union leh China taangmi makaite in United Nations Organization ( UNO) kipawlna ding thukhun leh kivaipuak dingte ahampi ( draft) hong bawlkhia uhhi. Tua UNO thukhun leh kivaipuakdan zia-le-tong akicing pen leitung gam (51) ii taangmi te in USA gam San Francisco Conference ah thukimna na nei uhhi. Tua tungtawnin October 24, 1945 tak teh United Nations Organization ( UNO) hong piangkhia ta hi.

Tua UNO kipawlna phualpi pen USA gam, New York khuapi ah kikoih pah hi. 1950 kumin UNO kipawlna ah aluut asuakta gam (60) pha pah aa, 1980 kum tak teh gam ( 154) pha pah hi. 1999 kum leuleu ciangin kipawlna ah aluutthak gam (188) phato leuleu-in asawtnailo September 10, 2002 teh UNO kipawlna pawlluut gam (191) bang pha ta hi.

United Nations Organization ( UNO) Ngimna Leh Tupna Bulpite

• (1) Leitung kilemna leh bitna kepcing zawh nading,
• (2) Leitung gamkhat leh gamkhat kizopna ahoih semsem nang mapang khawm ding,
• (3) Leitung sumbawlna lam, nuntak khuasakzia leh ngeina tuamtuam buainate ah kipanpih leh nasepkhop theih nading,
• (4) Kipawlna (UNO) ngimna leh tupnate alawhcing/tangtun theih nang kipawlna pawllut gam khempeuh in khut kilen sepkhop nading cihte ahihi.

United Nations Organization ( UNO) Kilamhzia

UNO kipawlna sungah thuneihna akee lian nam (6) om hi. Tuate in;

• (1) Kipawlna pawlluut gam khempeuh ahuam khawmpi ( General Assembly)
• (2) Leitung bitna leh daihna tawh kisai ( Security Council)
• (3) Kipawlna pawllut leitungbup thukhun tawh kisai vai ( International Court of Justice)
• (4) Sumlei sumzuak leh Nuntak khuasakna lam ( Economic and Social Council)
• (5) Leitung gamkhat leh gamkhat kizahtak leh kigamkeekloh ding vaisaina lam ( Trusteeship Council)
• (6) Kipawlna thuvanpi zum ( Secretariat) cihte hi.

Kipawlna pawllut gam khempeuh ahuam khawmpi (General Assembly) in ahih leh kum (1) teh (1) vei khawmpi neiden-in UNO pawllut gam khempeuh pan taangmi kahthei tek aa gamkhat in meetang/vote (1) ciat nei hi. Thu tuamtuamte/athupi lualote UNO kipawlnaluut/member gamte ii atamzaw thukimna 51% tawh thukhensatna kinei-in leitung gamvai leh athupidiakte taangmi gamte’ meetang/vote sehthum suah sehnih tawh vaihaksate kikhensat hi. Hih kumsim (1) veita kibawl khawmpi (General Assembly) pen UNO member khempeuh ii lungsim deihna lahkhiatna phualpi ahih ban ah hih khawmpi thukimpihna pen thupi pha mahmah hi.

Leitung bitna leh daihna tawh kisai (Security Council) ahih leh UNO ii ahiang khempeuh lakah thuneihna alian pen ahihi. Taangmi gam ( Member States -15) pha hi. Atawntung taangmi ( Permanent Security Council Members Gam -5) leh kipawlna pawlluut gam khempeuh ahuam khawmpi ( General Assembly) ii sehtheih gam (Rotation gam – 10) hi aa, tua gamte’ thuneih hun pen kum (2) ahihi. Security Council ah atawntung taangmi leh thuneihna kuitung anei gamte pen China, USA, Soviet Union/Russia Federation, France, England gamte hi. Security Council in leitung thuhaksa tuamtuam leh vaikin thupi tuamtuam akhensat ciangin Security Council member (15) gam khat ciat in kum (1) teh meetang/vote tang (1) tek neiciat uhhi. Ahih hangin Permanent Security Council Member gam (5) te lak ah gamkhat pepeuh in bel kuitung/tuamdang thuneihna (Veto Power) tawh thukimna leh khensatsa thute nolhtheih/hemkhia ziauziau thei lel hi. Security Council ii vaipuak leh mawhpuak bulpi ahih leh UNO member gam khempeuh kilemna leh bitna kepcing nading ahihi.

Leitungbup thukhen zumpi (International Court of Justice) ah thukhenmang (Judges -15) kihel hi. Tua thukhenmangte pen Security Council leh General Assembly pan taangmite in suaktatak atuamin teeltheihna/sehna neithei uhhi. Thukhenmangte’ nasep theihna kumciangtan ahih leh kum (9) hi. UNO kipawlna sungah aluut gamte’ kikal ah buaina tuamtuam a om leh hih International Court of Justice sungah thukitun-in thukhenmangte in thusitna neithei uhhi. Khensatna vaihaksate ahih leh Security Council tungah puak sawm uhhi.

Sumlei sumzuakna leh nuntak khuasakna lam ( Economic and Social Council) ah taangmi tanu (54) pha hi. Tua taangmi tanute pen General Assembly in teel/sehto aa aciangtan hun pen kum (3) sung hi. Hih Economic and Social Council ii vaipuak leh nasep bulpi in leitung sumlei sumzuakna lam, nuntak khuasakna lam, ngeina lam, cidamna lam, khantohna vai tuamtuam ah panlakna ahihi. Hih Economic and Social Council amazan muibut theih nading anuai aa ahiang/akee tuamtuamte ( Specialized Agencies) kiphut beh hi.

• (a) Leitungbup nasemte’vai puahna/zuunna ding – International Labour Organization
• (b) Neek-le-dawn leh lokhawh sing puakna lam – Food and Agriculture Organization)
• (c) Nate/pilna thu tuantuam kanna leh khanglui vante kepna lam – United Nations Educational Scientific and Cultural Organization)
• (d) Dongtuak Panpihna leh Khantohna/kilamh kikna Vaisaina – International Bank For Reconstruction and Development Or World Bank)
• (e) Leitungbup sumzat tuamtuamte bitna/zuunna lam – International Monetary Fund
• (f) Leitung cidamna lam zuunna lam – World Health Organization cihte Economic and Social Council ah kihel-in hih kipawlna ah zongh Zomi Innkuan USA, Inc in 2014 pan pawlmi hihna ngah aa taangmi tampitak khawmpi kah paisak khinta hi.

Leitung gamkhat leh gamkhat kisimmawh lohna/ gam kikeek loh nang ngimna ( Trusteeship Council) ahih leh leitung galpi (2) lai gallel gamte in aneih suahtakna piak ding acingtaaknailo in UNO aciapteh gam tuamtuamte etcikna leh vaisai ding vai ahihi. Tua bang Trusteeship Council in alep leh kepcing gamte’ vai pen kumsimin UNO General Assembly ah thupulaakna (Report) nei den uh hi.

Tanu thuvanpi zum ( Secratariat) ii thuzeekpi pen tanu thusapi (Secretary – General) ahihi. Tanu thusapi ahih leh Security Council member gam (15) te’ thukimpihna tawh General Assembly in teel/seh hi. Tanu thusapi/ Secretary General in ahih leh UNO nasepna leh leitungbup vaithupi tuamtuamte General Assembly ah thupulaakna (Report) apiak kul den hi. Leitung kilemna/daihna leh bitna anawngkaisak thei thute Security Council ah zasak/puak behto hi. Leitung daihna/kilemna leh bitna ading tanu thusapi ( UNO Secretary General) in guptuam maitang et paihtuam omlo adin tang kul ahihi.

United Bations Akiphutcil Pan Tuni Dong Tanuthusapi ( Secretary General) Asem Ngeite

• (1) Glad Jebb ( United Kingdom,1945 -1946)
• (2) Trygve Lie ( Norway,1946 – 1952)
• (3) Dag Hammarskjold ( Sweden,1953 – 1961)
• (4) U Thant ( Myanmar,1961 -1972)
• (5) Kurt Waldheim ( Austria,1972 -1981)
• (6) Javier Perez de Cuellar ( Peru,1982 -1991)
• (7) Boutros Ghali ( Egppt,19992 -1996)
• (8) Kofi Annan ( Ghana,1997 -2007)
• (9) Ban Ki Moon ( South Korea, 2007 – 2016)
• (10) Antonio Guteress ( Portugal, 2017 -?) ahi uhhi.

P .S : UNO Head Quarters pen New York, USA ah om aa, Geneva (Switzerland) leh Vienna (Austria) ah zongh zumkhen tuamtuam kikoih hi. Agelh : Bob Tuangpi (00232019) Ref : Wikipedia