Who’s in, Who’s Out: UNHCR zum ah Zomi Kamphen-te

Who’s in, Who’s Out: UNHCR zum ah Zomi Kamphen-te

Pasian lamlahna tawh zani March 23, 2011 in UNHC zum ah citak tak in kamphen hong sep sak Sia Sing leh Sianu Vungpi te in USA lam cidam in zuan thei uh hi.

I. Sia Sing leh a lawmnu in ahih leh Tennessee, USA zuan ding uh hi.

Kamphen a siam ban ah bawlung suih a siam mahmah leh mipi lak ah i angtan pih kimawlsiam mahmah ahi hi.

Malaysia professional referee te in zong a pahtak mahmah leh, a muan mahmah khat ahi hi.

Minam leh gam it a, migi ahih ban ah, mi khempeuh tawh a kipawl theih ban ah a maitai den a pahtak huai mahmah khangno khat ahi hi.

Sia Sing pen UNHCR zum ah a sem ahi hi.

II. Sianu Vungpi leh Sia Mungsan ahih leh San. Antonio, Taxas, USA lam zuan ding uh hi.

Malaysia a om Zomi numei, a diakdiak khangthak lak ah Manglai leh Mangpau pen ama quality a nei lian a om ding hiam ci leng, kua hi ding cih dotna a dong masa ding pawl kahi hi.

Nun nem in, a ki niamkhiat minam it mahmah khat, nasep citak in, UNHCR hi ta leh a sepna khat peuh ah u liante, tungsiahte in a muan leh a suan mahmah khat ahi hi.

Zomi kamphen a ki dawl ding om pak lo ahih man in a gamdang pai ding bang a ki sot theih na ding in tungsiahte in kho zaw in, i minam leh gam itna mah tawh mang siam thei uh a, tu in ong leng khia zo pan suak hi.

Sianu Vungpi pen OPE leh DHS lam ah a sem ahi hi.

A kizom in Sia Mungsan (Zomi Innkuan Malaysia) ah President panmun len in Zomi te UN vai leh minam vai ah lungduai tak leh, kuhkal tak in a hanciamnate’ hang in Malaysia a om Zomi tampi in zumlam tawh kizopna ngah thei ahih man in Pasian’ ong laptoh Sianu Vungpi’ i it mahmah a lawmpa Sia Mung san zong i angtan pih hi. ZSM (Zomi Socialwelfare Malaysia) ah zong a pai dong mah citak tak in panmun len a, ZIM bek hilo Zomi kipawlna dangte leh galtai kipawlna tuamtuamte tawh kizom thei siam in minam a ding in i angtan pih makai picing khat i neih man in ki angtang mahmah hi.

Citak tak leh lungduai tak in i minam a ding, i mipi a ding in UNHCR zum sung pan in kamphenna tawh ma pang in mipite tang in hong ding thei, hong kipia thei uh ahih man in mipi’ aitang in lungdamna i pulak hi.

UNHCR ah nasep ding pen kipiakna bek tawh hi theilo a, zumlamte in amau deih qualification & criteria tawh a kituak a neite bek a lak uh ahihna tawh kizui ahi hi. Sia Sing ahi a, Sianu Vungpi hi ta leh Zomi bup a ding in a beisa kumsung ah a mapannate uh pahtawi huai mahmah a, pahtak huai mahmah hi.

Mailam a sep a bawlna tuamtuamte leh a maban ciat Topan’ thupha hong piaksak ta henla, mapai daupaina hong piak sak ta hen.
A tung a sianu leh siapa te in amau manawh ahi gam thumna hong paisan hi phot hi.

Ong manawh ahi USA ah zong i Zomi kipawlnapi tawh kizom in, nong makaih sak ding uh leh, Malaysia hi ta leh leitungbup a om i Zomi-te a ding in ma pang khawm thei toto lai ding hi hangh cih ki lamen uh hi.

III. A lungdam huai leh i angtan pih thu in ahih leh a tung a RST/ RSD Unit lam ah kamphen sem Sia Sing in hong paisan nung in, a mun ding ah Sia Kamtawng (UN Min bel a tuam hi kha ding hi) in maban hong zom thei hi. Sia Kamtawng pen i theih kim ding in, UK a om Dr. Gin Khan Khual i pianpih laigui zom ahi hi. Sia Kamtawng pen kampau tampi a thei (pau leh ham lam ah talent a nei ngiat) a pahtak huai minam it mahmah khat ahi hi.

Tu laitak in a omsa ahi sianu Cingboih, Sia Peter Khai, Sia Lian, Sia Noel cihte ahi a, Sianu Nuampi, Sia Michael Tuang leh makai dang tampi i hanciampihna leh makaihna hang in Zomi tampi in amau ngah ding kilawm hamphatna (Rights as a refugee in line with UHDR) a ki ngah thei suak hi.

Leitungbup a om Zomi-te in i omna ciat pan, eima hih theihna ciat tawh, eima bat na ciang tantan in i minam leh gam a ding ki sem ciat hi. A diakdiak in zumpi sung ah Uliante leh mipi kikal ah palai ong sepsak Sianu, Siapate tung ah lungdamna leh angtan pahtawina i pulak hi. Mailam ah a masuan ciat uh Pasian’ in ong mapi ta henla, mapai daupaina hong piaksak ta hen.

Tu lai tak a a sem laite tung ah lungdamna leh pahtawina i pia hi. U lian leh mipi kikal palai ong semte a ding in thungetna tawh ma pan pih gige den ni. I minam bup Topan’ hong lamto tektek ta henla, ama thupha tawh hong tuamcip denta hen. Lungdam, Sianpu