UNHCR Education Department te leh Head Teacher te Online pan Meeting nuamtak ki neithei

UNHCR Education Department te leh Head Teacher te Online pan Meeting nuamtak ki neithei

ZAM Pan in veng tuamtuam ah om ZEC Sang pan Sang Siapi teng zong meeting kah thei uh hi. Hih online meeting neihna ah UNHCR EDU lutang pi (Mss Mimi) in hong makaih in, CBP pan in Dr Sushella in abeisa Community Base Protection Team nasepvai genna kician tak in hong nei masa hi. Pilsinna sangvai tawh kisai in UNHCR zumpi in thupi ngaihsut mahmah uh ahih manin UN zumpi pan in zong limtak in panmun laakna leh kizopzia ding tawh kisai gelphat na kizo to ta ahihna thu hong gen cian uhhi.

UNHCR zumpi panin Education/pilsinna sang vai tawh kisai hong vanpih ding in committee nih in kikhen a, a khatna ah mi 3 om in, a nihna ah mi 12 pha hi, hih 12 te zong khen 3 kisuah in a kisapna bangin panla ding leh pilsinna/education gambeel sang omna mun khempeuh hong vanzo ding in kithawi khinzo ta uh ahihna thu zong hong gencian uh hi. Hih thute hong genkhit uh ciang in Gambeel Sang siapi kempeuhte tung panin thu dotnop theih-beh nop akicingzaw in a om leh kuppih theih na ding hun hongpia in tualai a kipawlna tuamtuam pan leh Gambeel sang tuamtuam te panin dotna dawtna hun kinei hi.

Hih hunsung ah, dotna leh dawn na a kineih na sung pan in Pilsinna sangte tawh kisai in UNHCR pan in (Protection Letter) vai vive ki limdot zaw hi. UNHCR in abeisa in Protection lai a piak sang honpi khat om a, tu-in zong amun munah a kihong thak sangthak honpi mah om kik ahih manin tua te tawh kisai in Protection lai ngah theihna ding gencian na a ki neih tak ciangin UNHCR EDU lam panin amun mahmah hong pha in, limtak a kitangsam pilsinna mun leh a kitangsam vanzat te hong en cian ding uh a, lungkimhuai a sak uh leh Protection kepbit na lai hong piapan ding uh ahih na thu Zong hong gencian uh hi.

Hih Protection kepbit na lai tawh kisai in Gambeel sang ahihna hang tawh piakding bek hilo in, a omna mun leh a kiim leh pam in a phattuampih ding maw cih tawh kien cian ding hi. Hih Protection kepbit na lai a kitangsapna leh a manphatna in, kumpi thuneite khatpeuh hong pai-in buai na a om khak zenzen leh tua a kipia mun leh a sunga om sangsia leh sangnaupangte lungmuang tak in kep bit na ding hipah aa, a tungah phone no a kipia munah call in kihothei pah ding hi. Tua ahih manin Sangtawh ki sai buaina khat om in no bek in na tangphut ding uhhi lo in, UNHCR zumpi tawh kipawl in a ki phukhawm ding a hihi. Tua bang mah in Protection Unit lamte in zong kumpi thuneite leh palikte tawh nasem khawm in, a hih theih zah in vaipuak ala ding uh ahihi.

Protection vai tawh kisai volunteer sangsia semte leh UN ngah nailo sangSia te a ding in a tuam in hong ngaihsutsak theihna ding uh zong kingen hi. Abeisa in sangsiate naupang te laihilh ding in hong kipiak khiatna uh kipakta ahih manin UNHCR card zong kipia zel hi, tuabang in UNcard akipiate a kiet kawikawi tak ciangin UN Card a kipiakzawh a sawtlo in a nasepna uh Sang laihilh na nusia in amau utna ah nasem in lengkeek mang ahih na thu teltak in UN pan in kithei ahih manin tuabang in Sang Sia te UN ngah nailo te UN ki tuampiak zo nawnlo phawt ding hi ci-in ki ciantak in hong gen uh hi.

Hih meeting hun sung in gending athupi Pawl in a kinei Gambeel sang pilsinna sangte honkik ding vai tawh kisai in ih omna gam kumpi te hun etna (Calender) bang in December ni10 pan in Holiday kipan in January 3, 2022 ciang in Sang kihong kik ding cih thu hi a, March kha kum2022 a kipan sangkum thak kipan kik ding hi a, tua tawh ki zui in Gambeel Sang te ki kalsuan sawm ahih manin ih omna gam kumpi thupiak te zui thei leng hoihpen ding hi, ahi hang in a tangpi in vai tuamtuam a om leh nomau hoihsak leh alem thei bang dan in Sang hon kik theih hiding hi.

Lockdown hangin abeisa kum a kipan in sang leh kipawlna tawh a kizom pilsinnate in (protection letter) hun bei vive ahih manin kumthak 2022 January kha ma dong buaina leh haksatna a om zenzen leh UNHCR zumpi ah aman lang in hong zasak pah un, UNHCR pan in a kisam bangin hong huh in hong panpih ding ahihi. A diak in khuahun siatna hangin a beisa kumte bangin sangsiate pahtawina hun zatkhop ding kilunggulh mahmmah napi in tukum in a kinei zo lo ding hong suak ahih manin nong telsiamna ding uh hong ngen zong ka lunggilh mahmah uh hi cih kam hong vaikhak uh hi. ZAM iNFO