UN Card neilo te gamthumna paidingciang pusuahtheihna (Exit Permit) lakvai theihding

UN Card neilo te gamthumna paidingciang pusuahtheihna (Exit Permit) lakvai theihding

Malaysia gamsung ah UN Card aneilo Chin State sungpan in galtai Refugee tam mahmah hi. UN Card aneih sese lohhangin Australia kumpi in 202 Visa tawh gamthumna apaitheih nadingin vaihawmsak uh a, Australia gamsung ah mi tampitak ki tungkhin hi.

UN Card neihzenzen lohhang in Australia gambek thamlo, USA gamsung ahzong zi leh pasal sapna ahi Visa 93, KI Visa, P3 Visa cihte tawh kipaithei a, atungkhin zong tammahmah hi. Tuamah bangin Canada, New Zealand, Europe gamtuamtuam ahzong alengthei pawlkhat omveve hi.

Malaysia gamsung pan gamthumna munkhat peuhpeuh ihlending ciangin Malaysia Immigration nawkin akilengkhia ahih manin, Exit Permit kisamsak hamtang uhhi. (gamdang zinkawikawi theihna Passport anei hileng kisamlo dinghi) Tua Exit Permit pen abeisa in Chin State sungpan galtai te ahih nakleh UN Card aneizong, aneikei zongin UNHCR zumpi panin gambelmi khat hi ci’n ciaptehna hongbawlsak uh a, tuatawh IOM panin gamthumna lenkhiattheih nadingin hong vaihawmsak uhhi.

Ahi zongin tulam ciangin UNHCR zumpi in UN Card aneilo Chin State pan galtai tepen Exit Permit baihtak in hongpianuam nawnlo uhhi. Tuaban ah Malaysia Immigration te’nzong nidang sangin Exit Permit ngahtheih nading hamsa sakzaw, liausum zong tam piasakzaw uhhi.

Exit Permit akilak ciangin Malaysia gamsung ah nalutni akipan aguklut illegal in hong ciamteh uh a, tua nalutni akipan agamsung ah na omsungteng Form phih in gelhkhiat kulsak uhhi. Malaysia nalutni, na tangthu cihte leh atuamtuam Form sungah honggelhsak uhhi. Tuazawh kalnih khitciangin liausum hong piasakding uh a, UN Card aneilo te ahihleh US alengding tepen atawmpen RM3000 bang piakkulthei hi. Tua sumpen Malaysia Immigration tungah pusuahtheih nadingin Exit Permit ngetna sumbei ahihi.

UN Card aneilo veve, Australia alengding tepen phadawm zawdeuh hi. Australia kumpi in Malaysia kumpi tungah huhna hong ngetsak ahih manin, tuciangciang UN Card neilo Australia alengding tepen RM100 tawh Exit Permit ki ngah liamliamlai hi. Ahi zongin khutpimai (Fingerprint) kimeksak hi. Exit Permit apiak uh hangin tuate pen Blacklist sazian sungah koihpah uh a, Malaysia gamsung alutkikding hamsapah leuleu hi.

Gamthumna lentheih nading Visa ngahkhin himahleh alengtheilo, a awkcip tepen Exit Permit vai hangin a awkcip zong hithei uhhi. Visa hongki piakciang in Visa laidal tungah Arrival Window ci’n tuni tuakha ma in tungding cih hongpiading uhhi. Australia alengding tepen kha 5 sungbang ziakaithei uhhi. US gam ahihleh sum napiakkhit ciangin hong vaihawmsak pahthei uhhi.

More: UNHCR vai themkhat pulakna thupi nawnkei vacihding lah ahilo

Gentehna in Australia alengding innkuan khatsung ah khatbek in UN Card tawi in, adangte’n UN Card aneihkei uhleh UN Card aneivetlo te mahtawh kibangin angak hunding pen sawtpi ngakkul veve uhhi. Tua ahih manin gamthumna paitheih nadingin lungduai takin nangak kulding cihna ahihi. Sawltak #zomidaily (Source: Chin Modern News)