Tulai Kammal Thak ~ Pu Thangboi

Tulai Kammal Thak ~ Pu Thangboi

August Ni 1 Ni in misokpa in amau’ pawlpi min pen အိမ်စောင့်အစိုးရ (Inncing kumpi) tawh alaihna thu uh hong tangko khia hi. Hih kammal tawh kisai aza ngeilo khangno pawlkhat in hong dong ahih man in atheih huai thu khat zong aihteh cihna tawh katheih dan in tawm kong gelh hi

Akhiatna & Akizatzia

အိမ်စောင့်အစိုးရ (Inncing kumpi) pen mikang lai in Caretaker Government kici hi. Kalhelh (or) kiallap kumpi cihna ahi hi. Mipiteel hilo in gambuaina hang hita leh Kumpi sung buaina hang hita leh buaina tuamtuam hang tawh kumpi khat dingzo nawnlo in hamsatna atuah ciang in kumpi thak apian theihna ding in kiallap kumpi asempakte ahi hi. Inncing Kumpi cih min himhim tawh kum tampi kumpi kisem ngeilo hi.

Kawlgam Tangthu Ah

Kawlte’ suahtakna ngah kum ahi 1948 Kum akipan tuni dong kawlgam ah Caretaker Government nihvei aomna hita hi

1958 Kum in tua hunlai a kawlgam auk Anti-Fascist People’s Freedom League (AFPFL) party sung ah buaina nakpi tak in hong om ciang in makai U Nu in akumpi hihna galkap mang Newin tungah ap hi. Newin in zong Inncing Kumpi phuan in kum 2 sung gam lutang hong sem hi.

AFPFL party sung zong Stable pawl leh Clean pawl ci’n phelnih suak in nakpi takin hong kidem uh hi

Stable pawl U Kyaw Nyein in makaih in Clean pawl U Nu in makaih hi. Kawl galkap te’n Stable pawl nakpi in panpih hi (Bogoke Tun Kyi in alaibu sung ah hih thu limgen mahmah hi)

1960 kum ciang in Inncing Kumpi’ vaihawmna tawh kitelna hong nei uh a U Nu pawl in zo hi. Ei’ kiang pan U Nu te tawh akizawl pen Pu Mang Tung Nung tepawl ahi hi

Agual lel U Kyaw Nyein tepawl in huttaw sung pan in U Nu kumpi phuk ding nakpi in ahanciam uh hang un phukzo tuanlo uh hi. U Kyaw Nyein tawh kizawl Chin state pan in 50% mah pha veve hi Atawpna teh U Kyaw Nyein te’n Newin leh Kawl galkapte cial in ukna buluh sak uh a tuni dong tua tuihual sung ah a awk kikkik ih hi hi.

Gentheih Omlo

Aung San tepawl leh tua hunlai a gam leh minam a-it mahmah kawl te in AFPFL party aphuat lai un “Kum 1000 dong kimang ding hi” acih liang uh ahi hi. Mipi in zong a it mahmah party ahi hi. Ahizong in kum tam nungta hetlo in Newin in vuicip hiau hi.

More: Tuni mun 4 ah puakkham ~ Pu Thangboi

Tulai a mipi’ it mahmah party khawng zong ong tuaci kenteh cih gentheih om tuanlo hi. Ken bel Pasian in ei’ ading asia hong gelsak hetken teh cih bel ka um tinten veve hi. Lungdam, Mung Laan Thang (Tonzang, Zogam)