Tuisiang ~ Dr. Tung Za Pau

Tuisiang ~ Dr. Tung Za Pau

1. Leitung mite nisim nuntakna ah a kisam thute, late, le nate tampi om hi. Ganhing te, singkung te kisap te tawh kibang lohi. Mipilte in mi hing bang ci pian hiam cih kaantel zolo uh hi. Bible in bel Pasian in ama lim le mel suun aa mihing a bawlna thu kician tak in gen hi. Pasian in Adam le Eve bawl aa mihing khanggui kizom suak hi. Pasian in mite hongkhual man in mihingte a bawl ma in, a kisam a hi singkung, lopate, vasa te, ngasa te, ganhing te, Ni, Khapi le Aksite bawl masa hi. Tua Pasian bawlsa te sung pan in “Tui Thu” ka gen nuam hi. Christian mite zat theih pah ding lunggul na hi.

2. Tui pen munthum ah om hi. Vantung ah tui om hi. Leitung ah tui om hi. Leisung tai 600 na ah tui om hi. Leitung aa om tui le leisung aa om tui a pha zah kibang hi. Leitung maitang ah tui pen 75% om hi. Mi pumpi sung ah tui 75% om aa, mehthuk sung ah tui 90% om hi. Suangsung ah zong tui om aa, Khapi sung ah zong tui om ding in mipil te in tuat uhhi. Mars tung ah tui a om le bel mite pai sawm ta uh hi. Elon Musk te, Amazon Pu te pawl Mars mission ding in manlah mahmah uhhi.

North America aa om Lake Superior, Lake Huron, Lake Michigan, Lake Erie, le Lake Ontario aa tuisiang pen tua cih aa kidawn thei in, leitung bup aa om tuisiang te 95% hi pah hi. Pacific ocean, Atlantic ocean, Indian ocean aa tuite ci-al lua ahih man in tua cih aa kidawn theilo hi. Tuisiang tamna muh ah Christianity tam om zaw deuh aa, tui siang tawm na mun ah thu ummi tawm zaw deuh hi. Bang hang hiam? Theih huai thu khat hi.

3. Isai. 55:1; John 7:37. “ A dangtak mi na om uh le, kei kiang ah hong pai un la tui dawn un,” cih sapna aw om hi. A dangtak mi cih pen, lunggul vanvan (burning desire), neite cihna hi. Ih Topa Jesuh in mi khempeuh tui dawn ding in hong sam hi. A painuamte pai thei aa, a utlo te amau thu hi. Mi kim in amau ngaihsut dandan aa khentat ding hi. Pasian kammal in nek le dawn thu a gen ciang in a vanzat nam 4 om hi: tui, khuaizu, lenggah zu le bawng nawi (water, honey, grape-juice, and milk) hi. Hih nam li te pen an lah hi aa, cidam na zatuizong hi pah hi.

4. Isai. 55:2, ah an ahilo nate, thute, le late thu na gen hi. An a hilo teng:

• a. Zaa tep, tuibuk, khaini, sahdah,
• b. Zu,
• c. Guih theih tuam tuam (drugs)
• d. Duh hop huaiham aa van a khol te,
• e. Zatloh pi aa neihsa a ciang venvan te,
• f. Leitung ah a kimulo tsunami mun 40 bang ah nisim in om hi. Tua mi genthei te a phawk lo mite,
• g. Kisamlo pi aa sum a mawk zatte,
• h. Kisamlo pi aa rockets, le nuclear galvan a zang te, a bawlte,
• i. Kisamlo pi pi aa Pasian letsong a zang khialte,
• j. A kiphuak tawm biakna te,
• k. A kiphuak tawm ngeina te,
• l. Zuau thu te,
• m. Ci le sa phattuam na ding te,
• n. Tawm vei sung a namtui te,
• o. Mite a lausakte,
• p. Amau le amau kiphatphat te, etc,

5. Isai 55:10f, Van pan in guah le vuuk hong zusuk aa, lei kawt sak in, nasem pa a ding gah le teh piangsak hi. Van guahtui in thusim khat nei hi. Tua pen khuaphelep tawh kisai hi. Khuaphelep (lightning) a om ciang in huih lak ah electricity a nu le a pa te gel a kitawp uhhi. Itna bawl uhhi. Tua pen 50000 degree fahrenheit pha hi. Sa lua mah mah hi. Chemical molecule formula in gel leng:

H2 + H2O + N2 = HNO3. Nitrate. Nitrate ih cih pen leihoihza (fertilizer) hi. Pasian in khuaphelep a sawl ciang in van pan in leihoihza metric ton tei tampi guahtui tawh hong zuu khawm sak aa, ankung te in nuntak na limcii ngah uhhi. Lo nasem te in sum tawh lei kul lo hi. Lei zawh ding zong hilo hi. Pasian in a khong in hong pia hi. Pasian in man ngen lo in a khong aa hong piak pen hehpihna (grace) ki ci hi.

Vanpi ging aa, khuaphelep a om nak le Pasian min ka phat hi. Topa aw, leihoihzaa tan tampi nong piak lungdam lua hi ka cici mai hi. A kimu kha lo Pasian hong hehpihna tammahmah lai hi. Na khempeuh, thu khempeuh, le la khempeuh ah Pasian hehpihna bekbek ahihi. Pasian tung ah ka lungdam hi cici mai ding hilo hiam!

6. Tui a khiatna, Pasian thu gencianna (theology) thu ngaihsun khawm leng ka ut hi. Tui a khiatna in Pasian kammal, Pasian Thu (Word) cih nopna hi. Tui a khiatna in Topa Jesuh Krih cih na hi. Tui a khiatna in Kha Siangtho cih na hi. Van pan hong zuusuk guahtui in ankungte nuntak na pia aa, gahpha a piansak mahbang in, Pasian kamsung pan hong luang PasianThu in a mawkna (in vain) suak lo aa, Pasian deihna tangtung sak hi. Pasian sawlna (missions) bang tektek in nasem hi.

Pasian sawlpa(Missionary) pen Topa Jesuh hi. Thu in mi hong suak aa eite laizang ah om hi, (John 1:14). Tu ni dong aa, Pasian thu ih gennate, ih sepna te, ih thungetna te, ih piak khiatte, lai ih hilte, ih bawlna te khat zong a mawkna suak lo hi. Tu in a gah ih muh thei nailoh hang nuntakna mei-aam a sung ah om hi. Nuntakna na kipan zo hi. Khaicii kituh khin ta hi. Lawphuai mahmah hi. Pasian muanhuai mahmah hi.

7. Tui pen bangteng ah kizang thei hiam? Tui zatna tampi om hi. Nisim in tui ki dawn hi. An huanna in kizang hi. Puansawp na in kizang hi. Kisilna ah kizang hi. Tembaw gol pipi te in vanpua uhhi. Nuclear Reactors te zong tuitha mah twh power a kingah na hihi. Tua dan mah bang in Pasian thu in ih mawhnate hong sawp siang hi. Tuuno sisan in ih mawhnate sawp siang in mai sak hi.

Kha Siangtho meikuang in ih mawhna a khengcip te kangtum hi. Thunget na tawh siansuah na ih ngah hi. Pasian thu in mipillote pilna guan, mit tawte khua mu, bil ngongte khua za, khe bai te lampai thei uhhi. Cidam lote in damna ngah uhhi. Lammang mite in innlam zuan thei uhhi. Mit pil lote in mit ciimna ngah uhhi, (Ps. 19; Ps. 119).

Pasian Thu in zomite leitung gam 35 ah hong tunpih zo aa(DR. JM Paupu), mai kum 30 bang ciang in leitung gam 100 bang ah kiteng ta ding hi. Pasian Thu in zomite USA gam ah innteek in hong om sak hi. Pasian thu in zomite minam lian aa hong bawlpha hi. Makai siam in hong bawlpha hi. Pasian Thu in zomi te nuntak na tuinaakpi a hihi. PasianThu a hi Kha Siangtho sang in a thupi zaw, a kisam zaw Kua om Hiam?

8. Tui bua leng, a sangna mun pan in a niamna lam zuan aa, tua lai mun ah khawl hi. Tui in color nei lo hi. Ih koihna van color bang in om hi. Kilaih se lohi. A limna(taste) neilo hi. Pasian Thu bang in ih nuntak ciang in Topa Jesuh mel le lim ki suun deuhdeuh aa, Topa zia le tong ki nei thei ta hi. Vangam nuntak zia ding leitung ah kisin siam ta hi. Ki niam khiat na lungsim ki nei in, nasep hanciam in, nasep dan siam in, kampau dan zong ki siam ta hi. Kha Siangtho gah nam kua te gah in, khuavak gah nam 3 te gah in, Kha Siangtho letsong pawlkhat kingah aa, talent le siamna tuamtuam Topa in hong behlap sak lai hi.

Topa in pilna hong guan in, neihsa hong hawm aa, min pha zong hong kawm lai hi. Gospel pen sum zonna ding in ngaihsun man nawn lo aa, a sumte tawh gospel tangko, a hunte, a theihna te siitlo aa zang, a nasep na ah lawp lua mahmah in, lungdam mah mah hi. Pasian itna thu gengen a hih man in itna kibeh laplap aa, hoihkimna tawh hong kizom hi. Topa itna gengen aa, Topa hoihna la in sasa aa, Topa thupi na tawh lamlam in, Topa tawh vanpau in ki hoho mai a hihman in lungkhamna le coronavirus in lawng kha theinawn lo hi. Pasian itna in puanlum bang in tuam cip aa, mi ginalo te in sukha theinawn lo hi.

Na aa kimnaglo te in suukha theilo hi. Pasian Thubu sung aa tangthu te tawh Ama nuntakna taangthu te hong kizom ta in, mite simtheih lai hong suak hi. Khuavak bang in tang lelaa aa, ci bang in al a hihman in Pasian Thu a gen nate ah zaknop kisa, a ngai mite in nuntak lawh uhhi. Ki mu nuam vaanvaan aa, kithei nuam ngingeu hi. Kha Siangtho in lathak guan in, Psalm late le vanmi te sak theihloh lathak te zong sa uhhi. Psalm 91 sung bang Sangpen Pa bel le muang a hih man in sihna, natna, siatna, mawhna te in suukhalo hi. Mite lunghi mawh hun in, Amah Zion mual bang in, Thuam Hum mualpi bang in liingvet loin Pasian mai ah ding vilvel thei hi.

Humpi nelkai bang in thuman sung ah nungta in, launa mel nei lo hi, (Pr. 28:1). Tua pen Kha Siangtho nasepna a hihi. Kiim le paamah supna, baina, launa, patauna, cihmawhna le lungkhamna a dim lai tak in, amah lungmuang tak in om hithiat bek lo in, a kisam mite kisapnate ah sum tawh, pilna tawh, thungetna tawh le, video message, youtube, online, web pan in tha pia uhhi. Tua pen Pasian maipha ngah mite zia le tong hi pah hi. Tuisiang dawnna pan aa piang thuphate hi pah hi. Upna gahte hi pah hi. Thukhualna nasepna te a hihi.

9. Pasian Thu sung ah picinna (spiritual maturity) ih ngah tak ciang in Pasian in eite tuinaak, thupha naak, nuntak na naak (oasis, cosmos) in hong piangsak hi. Rev, 22:1-6, enleng kimu thei hi. Pasian le Tuuno tokhom pan in crystal bang aa ciim tui siang hong luang zuazua aa, Khuapi lai aa lamlianpi dung ah hong luang hi. Lampi lang tuak ah nuntakna singkungte po aa, kha sim in min uhhi. Tua singteh te in leitung mite aa ding cidamna zatui a hihi.

Tualai mun ah dahna, kahna, mawhna, sihna, natna cihte om lo hi. Pasian le Tuuno vangtang a hih man in khuavak dang omlo hi. Topa Jesuh Khrih a piak khong tui a dawn mite tuikhuuk, cihtui aa hong piangsak hi. Eite sung pan in gospel tuisiang hong luang zuazua mai hi. Mite in tui dawn ding in hong pai uhhi. Buddhist te, Hindu te, Muslim te, Confucius upna neite, Jainism te, Zoroasternism te, Tao upna neite, Biakna nei lo te, Honpa a thei lo te hong pai uhhi.

Tua nuntakna tui a dawn uh ciang in amau zong Pasian tate hong suak pah uhhi. Amau zong om khong thei lo uh aa, a innkuan pihte, a lawmte hong paipih uhhi. Amau zong tui dawn uh a hih manin, tuinaak hong suak leuleu uhhi. Nuntak tawntung na ngah ta uh a hih man in ih Pasian gam hong zai semsem ta hi. Leimong dong ah Pasian gam hong suak ta hi.

10. Tua tuisiang Thu a gengen ding in Pasian in eite lei thupha le van thupha hong kawm hi. Ih zat siam le hong pia thuah thuah laiding hi. Zang phot leng hong kilawh dandan aa, nuam zungzung hi. Zang mel lo aa, leisung ah ih phum mawk le bel talent nei Pa in thupha hong pia lo bek dom lo in, hong piaksa te na ngawn a lakik thei Pa a hih na hong kilang ding hi. Zang kei leng ih thadah tektek hi. Mawl tektek hi. Hun bei, sum bei, gimna dim, thupha peuh mah om theilo hi.

Mi khempeuh painop na mun ah USA gam minthang na mun ah Pasian in eite innluah za hong pia hi. Tua ih Pa lungdam sak ding hi hang. Amah hong lungdam photphot le, Zogam paallun ding hi. USA gam zong paal lun ding hi. Pasian Thu pen nisim tui dawn bang in sim ding, kaanding, sinding, gending, hawmsawn ding hi. Hun a ngah te in commentary, Bible Dictionary, le laibu hoih tampi sim in, Pasian itna Thu lim kaan mahmah ding hi. Tua hi le, Tua Tuikhuk pen kang ngei nawn lo ding hi. Na tuikhuk a dimlet in nisim in luang ziahziah sak ta in.

Anduh tuiduh mi tulza tampi in nang hong zongzong uhhi. Nang na theihloh man hi zaw hi. Coronavirus hang mite in nuntak tawntungna tuisiang hong zong ta uhhi. Nang tung tawn in Honpa Jesuh Christ mu nuam mi tulza tampi lampi dung ah kigual in om uhhi. Cihna ding theilo mitampi te hehpihna lungsim na nei maw? Na omna tangko in. Na om lam kithei sak mengmeng in. Pasian hong teeltuam Zomi te om mawkmawk nawn kei un. Zomite tung ah Topa in tatsat lo in thupha le lapha tawh kal hong suan pih ta hen cih ka thungetna hi. Topa thupha maw. Ka lung dam hi. Rev. Dr Tung Za Pau April 05, 2020.