Ki hangsansak in toktol asialnek pasalkhat apumpi zawcip, Paralyze

Ki hangsansak in toktol asialnek pasalkhat apumpi zawcip, Paralyze

Australia gamsung ah pasalno khatin ki hangsansak in toktol namkhat ahi “Slug” ganhing asialin a nomvalh leh akhantawn in khutzaw khezaw dinmun tunlawh cihi. Tuapa minpen Sam Ballard kici a, tuabangin toktol anek pen kum 19 aphak hunlai ahihi. Tu’n Sam Ballard pen kum 28 phakhinta a, pumpi cidamlo Disabled dinmun ah omcip hi.

Sam Ballard in toktol anekna munpen alawmte khat ii Birthday Party khatah anek kici hi. Tuama in amahpen Sydney khuapi sungah Rugby Player khat, kimawl a uk mahmahkhat hi a, ahi zongin toktol anekzawh Wheelchair tungah tucipden dinmun tungmawk hi.

Tua anekkhak toktol pen zusa panin akilawhthei Lungworm kici Parasite namkhat kihelkha hiding in ki ummawh hi. Tuahangin toktol asialnek ciangin Quadriplegic ci’n akhut akhe avekin zawcip, Paralyze piangsak hiding kici hi.

Tua Lungworm kici natna lungno tepen zusa pumpi sungah aomthei hi a, zute te’n ek athakkhiat ciangin toktol “Snail or Slug” te’n zusa’ ek nekha in akilawh hiding kici hi.

More: Aung San Suu Kyi apumpi zaw “Paralyze” ci’n zuauthuthang ki khahkhia

Centres for Disease Control and Prevention te genna ah tua lungno Parasite angahkha atamzaw pen bangmah zatui tampi kibawlluat kullo in damkikthei uh cihi. Ahi zongin Sam Ballard pen zatui zaha akibawlbawl hangin damsiangkik cih omthei nawnlo in akhantawn in Wheelchair tungah aomcipding dinmun cimawk hi. Khatveivei aki hangsansaklua te tuahsiathei hi. Sawltak #zomidaily