Thupha themno tawh na minam na tawisang theihi ~ Tdkhen

Thupha themno tawh na minam na tawisang theihi ~ Tdkhen

Galpi nih(2)na hun lai-in, Lushei papi khat, Ruallung khua tuntoh ma, Rulchawm khua sak deuhah, ciangkang tungah sum Rs 5 a na zepzep hi. Leilakah a siatsuk ciangin kip thei phalo ahih manin, a na buai keei hi. Tua laitak hun pen gambuai’ laitak ahih manin, Mangkang galkapte leh India galkapte hong pai uh hi.

A makaipa Maj Sap in, “Lawm, bangcia hihbanga hih na hia” ci-in a dotleh, papi pa in, “A neite in a kan’kik uh ciangin a muh baih nading” ci-in a dawng hi. Tua thu in Mangkang galkapte’ lungsim khoih phamahmah ahih manin, galpi ven khit ciangin Tadensa(News)sungah a kisuahkhia hi. Tua hangin Mangkangte in Mizote ettheih lawhin, hamphatna zong tampi a ngah lawh uh hi. (Gamdang, Namdang lakah a om, Khangnote aw, na Gam, na Nam in nang hong gal’-etet hi)

KICING SAK PHOTNI

1. Makaite in a kipsaksa khat, gen nawi kikkik lo-in, kicing sak photni.

2. Meeting sungah a tamzaw tawh kikhensatsa khat, lutangpi i hita zongin, kicing sak photni.

3. Madawk dinga i seh khat, kicing takeileh, kicing sak photni.

4. A kizasaksa thu khat, laih kawikawi lo-in, kicing sak photni.

5. Hong kici takeileh, lungsim kisuanna i neih khat, kicing sak photni.

6. Ih seplai khat, ka hun(time)a bei ding hita lel, ci-in lopthop hih tuanlo-in, kicing sak photni.

7. Ih neulai kamciam’ khat, i ciam’nate in mangngilh khin taleh, dak’kikin, kicing sak photni.

8. Ih nial’ zawhloh ding khat, do keikai lo a, khahlelin, kicing sak photni.

9. Hun poimawh i neih laitak hiphial taleh, honglut hun khat, kicing sak photni.

10.Ei’ deihna bulphuh lo-in, Pasian’deihna hungaihin, kicing sak photni.

KISA KHIAL THEI

• 1. A natna a gengen lo mi khat peuh, a thadah kisa khial thei.
• 2.A kiniamkhiat khat peuh, a niam mah kisa khial thei.
• 3. A dawng theilo khat peuh, a mawh mah kisa khial thei.
• 4. Ei’ zia lo khat peuh, a cinglo kisa khial thei.
• 5. A lungduai mi khat peuh, thumanlo dong a thuakzo ding kisa khial thei.
• 6. Mi a nek-ngaihte, a duhlo mah kisa khial thei.
• 7. Zin anthuk ding, “Ka gil vahta” a cih leh, a vah mah kisa khial thei.
• 8. Hehpihna pen a ngeina kisa khial thei.
• 9. A nuinui khat peuh, a lungkham ngeilo ding kisa khial thei.
• 10. Mizawng khat peuh, a theihna zong a zawng pah ding kisa khial thei. Tdkhen