Thupha Naak Itna Hi
Hun khat lai-in, Sengam khuata khatah Yin kici nupi khat om hi. Tanu khat neiin apasal zong tawh nisim nasemin omuh hi. Ni khat, a Innmai lampi geiah puteek thum hong paiuh Yin in amuh ciangin, Puteekte hehpih ahih manin Inn sungah hong tumunla tuisa beek hong dawn un ci-in va kho hi.
Puteek thumte zong lungdamin “Hong khawl nuam mah ung, ahi zongin na pasal Innah a om hiam?” ci-in donguh hi. Yin in “tulaitak om kei nasem hong tungkik dek inteh” ci-in dawng hi. Puteekte in “Na pasal hong tun ngak nungin tua khitteh Innsung hong lut pan nung, na pasal om lopi ko puteek thum kong lut dinguh kilawm lo hi” ci uhin lampi geiah khawluh hi.
Asawt lo-in, Yin’ pasal hong tung-a, puteek thum sam dingin Yin inn pualam hong paikhiat leh puteek thumte ameluh na kikhelin Vantungmi na suakuh hi. Vantungmi khat in ka tanu aw, nong zindo ka nuamuh hi. Tua ahih manin thupha kong pia nuam ciatuh hi. Vanmi khat pen itna le kithutuahna hong pia thei Phuu ciki vanmi hi. Khat leuleu pen hauhna neihlelam hong pia thei Liu kici vanmi hi. Kei ka hih leh minthangna hong pia thei Shou kici vanmi hing ci-in vanmi khat in gen hi. “Ka tanu ko teng thum lakah kua hong deih pen na
hiam? na pasal tawh va kikum un la hong zasakkik in nong deih penpen na Innsungah hong lut ding hi” ci in sawl hi.
Nupi Yin zong lawp luain inn sungah tai pah-a, apasal va kuppih hi. “Lawm aw ken leitungah nuntak sungin hauhna neihlelam mah thupisa ing tua mah tel ni” a cih leh a pasal in “minthanna I tel buang kei de lawmlawm, leitungah mi minthangte mah hampha pen hi” ci-in anupa hong kisel, hong kitawng tadih uh hi. NulePa kitawng inn sung pan aza tanu in Innkuan sungah akisam pen itna le kithutuahna ahih lam hongphawk ahih manin “Nu aw, Pa aw, Itna kithu tuahna tel zaw lo ding I hi hiam? Hih bnagin kitawng kiselna tawh innkuan nuam ka sa kei hi” hong ci hi.
Nupate zong akhialh lamuh kiphawk thakin, Itna kithutuahna ahi Vanmi Phuu hong teluh hi. Vanmi Phuu zong innsung lam zuan dingin hong ding khia pah hi. Vanmi Phuu nungah adang vanmi nih in zong hong zui uha, Nupi nu in “vanmi Phuu bek ka tel hilo hiam? bang ci-a na vek vua hong zui ding na hi vua? Na thum vua hong pai sawm veve lah nong telsak sese vua” ci in hopih hi.
Vanmi Phuu in zong “Inn sung khatah Itna le kithutuahna aom nak leh hauhna neihlelam, minthangna cihte in zong anung zuih ngeina hi lo maw!” ci in dawngin athumun Innsungah thupha piauh hi.
Innkuan sungah itna, kithutuahna hong om limlim peuh leh tate hong khamuangin nopsa dinguh hi. Itna aomna-ah Pasian na ngawnin nopsa hi. Pasian mahmah zong itna tawh kidim Pasian ahi hi. Thupha ngah minam, Innkuan, Nupate I suah theihna dingin Itna Pasian I telmasak ding thupi mahmah hi. Itna aomna-ah thu hoih thupha khempeuhin nung zuih tawntung hi. Mate 6:33 ” Pasian gam le adikna zong masa in, Tua hipeuh leh adang nakisap nakhempeuh zong hong kipiak thuah ding hi” ci hi.
Laisim kong it Ulenau, Itna le Kithutuahna ahi Pasian I nuntakna ah, nupa sungah, Innkuan sungah minam sungah I deih masak, I tel masak hi sak ni cih tawh kihan thawn nuam hi hang. Topa’ Thupha!
Khat Thang
Comment piaknop aomleh...