Thunget ngahlohna ahang ~ Pu Thangboi

Thunget ngahlohna ahang ~ Pu Thangboi

“Ngen un na nget uh leh na ngah ding uh hi” cinapi, ih ngetnget hang ih ngah loh tampi om hi. Thungetna ih ngahlohna ahang tampi om ding lak ah athupi pawlkhat:

1. “Ka lung sungah mawhna kem leng, Topa in ka thu hong ngai lo ding hi.” Late 66:18

– Hih pen angaihsut huai mahmah khat ahi hi. Bang hang a ih thunget pen angen ih hiam? Ngah hi leng bangci zat sawm ih hiam cih zong thupi mahmah hi. Athupi ah thu ih nget ma in lungsim siansak phot ding dan ahi hi.

2. Ahun tung nailo

– Ih thungette ngah pahpah leng ki ut hi. Ahizong in Pasian’ timing atuampi khat ahi hi. Abraham in kum 75 aphak lai a athunget pen kum 100 aphak teh ngah pan hi. Tua kikal sung Pasian in thu tampi hilh phot hi. Ei zong ih ngah nailoh pen lai ong nailo zong hi khathei hi hang. Kei bang 1998 kum a kanget khat 2015 kum teh ngah pan hi’ng. Ka tangval cil lai pek a kangetnget khat bang tu’n ngah dekdek pan hi’ng.

3. Pasian’ kammal leh kamciam tawh kituak ding

– Ih thungette pen Pasian’ kamciam leh Kammal tawh akituah ding thupi hi. ‘Joshua in “Ni aw na khawl lai o” ci’n thu anget teh ni khawl pah lian aih teh ei zong ngen leng ni khawl thei lai hi’ cih ziauziau pen hikhin lo hi. Joshua’ tung ah Pasian in gal hong simpih ning; na mai ah kuamah ding zolo ding; Moses ka ompih bang in hong ompih ning; hong nusia kei ning; cih khawng a kipan kamciam tampi pia hi. Tua kamciamte tawh kituak a Joshua in anget man a angah ahi hi.

– Paikhiatna 32 sung ah Moses mual tung ah a om kal a khamh bawng na bawltawm a abia Israel te Pasian in hehlua ahih man in vatmai sawm lian hi. Ahih hang Moses in Pasian’ kamciamte mah paulam leh bulphuh in thu anget ciang in Pasian in na mang mawk hi.

4. Pasian’ thu lungngaih kul

– Pasian’ kamciam leh kammal tawh kituak in thu ih nget theihna ding in Pasian’ thu mah lung ngaihngaih kul hi.

Late 1:2 sung ah; “ama nopsakna in Topa’ thu sung bek mah hi a, sun leh zanin ama thu a ngaihsunsun mi ahi hi.” ci hi. Mi nuamsate’ zia leh tong agenna hi.

– Pasian’ thu lung ngaingai leng Pasian’ hopihna kiza hi. Pasian’ hopihna khat vei ih zak bek in zong ih nuntakna hong khel zo hi. Tuhun teh LST ih sim zawh kei leh zong kingai thei ta hi. Ih lup kawm bang in hong in ngai leng tawldam mahmah hi. Lung ngaihngaih ding himai hi.

Ngaihsut ding thu dangdang om peuhmah lai sam in cin aizong atung a teng lungngai kawm in thu na ngen lecin hong ki lamdang mahmah ding hi.

Pasia in a awkhum tawh hong hopih ngiat ta hen. Amen. Mung Laan Thang, Zangkong