Thu ngaihsutzia: Formal Logic ~ Dr. Siambawi

Thu ngaihsutzia: Formal Logic ~ Dr. Siambawi

Ngaihsutna le Nuntakna: Na lungsim ngaihsutnate in nuntakna nak hi a, na neihsa a manphapen bangin na kep ding ahi hi. Paunak 4:23

Lokho singpuakna ah i zat ding tu le hei (tools) kisam hi. Thu khat peuhpeuh i ngaihsut ciangin zong mihingte in thungaihsutzia tuamtuam tawh kingaihsun thei hi. I thungaihsutzia tawh kizui in Thumuhzia kinei-in, tua tungtawnin i nuntak khuasakzia zong hong khelkhel hi.

Porfessor Oscar Icahzo in thungaihsutzia nam thum in na khen hi. Kum tul tampi sung mihingte khantohpicinna (civilization) lampi dung ah thungaihsutzia zong tampi hong kibehlap toto hi ci hi.

Tuate in, (a) Formal Logic (b) Dialectic (c) Trialectic ahi hi. Hih tak ah Formal Logic thungaihsutzia tawh thungaihsutdan i en ding hi. Logic kammal in deep thinking, thuthuuk ngaihsutna hi.

Formal Logic ngaihsutzia

Formal Logic tawh thuangaihsun/thumuhna ah thu khat pen “Hi” ci-in akiciapteh khit leh kikhelsak nawn lo hi. “Hoih hi” ci-in aciapteh leh atawntung in “Hoih denden” in ciamteh suak hi. “Thu khat peuhpeuh pen Ahoih laitakin ‘a hoih lo’ hi thei lo hi ci-in ngaihsun hi. Tua ban ah, Ahoih le Ahoih-lo kikal ah bangmah om sak lo hi.

Na khat i mel pen “A vom (black)” ahih leh “A kang (white)” hi thei lo. A Vom kawmin Kang thei lo. A Vom kei leh Kang ding. Tua te nih kikal ah bang mah om lo. Vom mikmek, vom pianpian, meikhu mel, kang pianpian, kang dektak, kang sitset cihdante om sak lo hi.

Formal Logic in tawh thungaihsut ciangin;

• I. The axiom of identity
• a. “A” pen “A” hi.
• II. The axiom of contradiction
• a. “A” pen “A ahilo” hi thei lo.
• III. The axiom of excluded middle
• a. “A” le “A ahilo” kikal (alai) ah bang mah om lo. “Either… or”

Formal Logic kizatna

Minvawhna in kitamzat pen hi. Min tawh i ciapteh ciangbek in thu khat pen mihingte in kampau, kammal (aw, laimal) tawh kitel thei pan hi. Gtn (a); Gamlak sung ah na tampi om a, tuate thu i gen nop ciang tua nate pen ‘suang’, ‘singkung’, ‘lui’, ‘paak’, ‘Sahang’, ‘Sakhi’ cihbang in kammal (word) tawh gen/gelh leng kithei sitset pah hi.

Tua tawh kizawitawn in Gtn (b); “Sakhi” ci a akiciamteh ganhing khat pen a tawntung in “Sakhi” mah kici suaksuak hi. Tua ngaihsutna pen behlap in, “Sakhi pen San hi” ci-in kiciamteh leh atawntung in “San” hi suak hi. Tua ahih manin, “Sakhi a pi san, a no san” in kici thei hi.

Pasian thu le LST

Pasian pen Pasian hi den hi. Apatna le a tawpna (alpha & omega) hi a Hun tawh kizui in piandan (Pasian ahihna) kikhelna om lo hi. Pasian kammal ahi Laisiangtho zong kikhel lo hi. Pasian pen hoih hi. Atawntung in hoih den hi.

Principle & Energy

Leitung ah a kimu thei lo Principle tampi om hi. Tua te pen kikhel lo hi. Cihtakna, thumaana, hahkatna kilekkimna, itna, thukhualna cihbang thute pen atawntung in thupi den hi. Hih ahoih den thute i zuih zahzah in kikhangto hi. Hih thute i pelh zahzah in kikiamsuk hi. Amau pen kikhel lo hi.

Energy bulpite ahi, Khuavak (Light), Aw (Sound), Asa (Heat), Electric, Magnetic te pen om den hi. Kibawl thak thei lo a kibawlsia, kiphiatmai thei lo hi. Energy khat pan adang khat piandan kilaih thei bek hi. Hih Energy te i zat siam ciangin phattuamna kingah a, i lehzat ciangin siatna kingah hi.

Formal Logic i kisapnate (khialhna hi lo)

(A) Atawntung, Cikmahhun le Hun, Kikhelna (Always, Never Vs Change) (Static Vs Dynamic)

Formal Logic i kisapna bulpi in “Hun” le “Kikhelna” ngaihsutna ah kihelsak lohna hi. Hun pen akibang (ahi) denden (fixed) ding ngaihsutna hi.

Akikhelkhel mihing, nate thu (dynamic) pen a kikhello (static) in muhna in Hun tawh kizui a kikhelna pen mulo ahih manin athu taktak (reality) pen ahi bangbang in mu nawn lo hi.

Tua nungzui in, i theih loh thute kingaihsun (zo/nuam) nawn lo thei hi. Alang khat ah, thuthak sin ding kisam sak nawn lo thei hi. Atawntung (always) le Cikmahhun (Never) cih kammalte kitamzat hi.

Nisim nuntakna sungah akiza thei Formal Logic pawl khat, “Topa hoih hi, a tawntung in.” “Ken nangbek mah hong it den ning. Kong itna cikmah hun in kikhel lo ding ai maw.” “Khat vei van a guk ngei leh a tawntung a guta” “Sen ahih nak leh mihau!” “Mikang khat ahih nak leh ei sang apil zaw”

“Sakhi” cih kammal i mun ah “Mi khat, innkuan khat, khua khat, Kipawlna khat, Minam khat, ….” koih in ngaihsun leng thutampi alomatangin hong nungzuih ziahziah pah ding hi. Tua i theih thute pen hun khat lai akipan tuni ciangdong i khuak sung ah icaiptehna (i kep) bangbang in ikhuak in hong lak kik ahi hi.

Tua thute pen tulaitak mahmah in ataktak ah na “Hi” nawn lo thei ding hi. Banghang hiam cihleh tua thute akitheih/akicaipteh laitak in thuman (reality) hi thei mataleh Hun le Kikhelna pen mihingte theihna, ciaptehna hong ngak lo in, na paipai, na kikhelkhel ahih man hi.

Khat veivei ciang, Kikhelna pen a om lo tawh kibang thei hi. Kikhelna pen Dialectic Logic (azangh mite) ngaihsutna ah “Na khempeuh pen akikhelkhel hi” ci-in ngaihsun hi. (Everything changes). Trialectic Logic (azangh mite) ngaihsutna ah Na khempeuh pen kikhelna hipah hi. (Everything is Change) ci-in kingaihsun hi. Bangbang ahizongin, Kikhelna pen ‘Hun’ tawh kibangin om denden a, kimuthei lo (akl) dampai lua mahmah ahih manin a kiphawk kha lo hi ci-in ngaihsut hi. (Dynamic)

(B) Nih lak ah Khat bek tel tantan na (Either…or Logic)

Formal Logic i kisapna lianpi khat ah “Akikal ah bangmah om sak lohna” pen ahi hi. (The axiom of excluded middle).

Mipa khat in Formal Logic tawh ngaihsutna akipatna akipan tua mipa in, “Amah” tawh kipan in ngaihsun hi. Amah tawh akibat kei leh (identity/min/kiciaptehna) amah aading angaihsut bangin ngaihsutsak zo nawn lo hi. “Kei” le “Kei ahi lo” te kikal ah khenna (sial/huan dai kai) in en ding hi. Nih a om nak leh khat bek a tel ding kisam hi. A kibat kei leh A kilehbulh hi cih ngaihsutzia hi. I nisim nuntakna sung ah akiza zel kammal le thu pawl khat ah;

“Nong ngai hiam? Nong ngaih kei leh bel hong muhdah hi hamtang ni teh!” ‘Kei lam’ maw ahikeileh ‘a ma’lam’ “Lawm” maw “Gal” “Thukim” maw “Thukim lo” “Hong dinpih” maw “Hong langpang” “Maan” asak kei le “A Khial” hi pah. “Ei tawh akibang lo te a lelh ciang, ei a zo” “A lawm pa akiphat leh a mah akigensia a sang”

Leitung nuntakna sung ah, nam khat bek tel ding akisam thutampi om hi. Tua mah bangin, khat bek tel tentan a kul lo thu zong tampi mah om hi. Mihing khat i hih nak leh cikmahhun za ah za (100%) ki maan ngei lo ding a, mihing khat i ngaihsutna zong za ah za a hoih, ahoih penpen cih om ngei lo hi.

Thukhupna

Leitung i akikhel ngei lo le akiptawntung in anungta Topa Pasian le ama kammal Lasiangtho bek ahi hi. Tualosiah, i tenna leitung ah kipan, mihing, na khempeuh pen Hun cih akitheizolo thu khat hangin kikhelna tawh akidim ahi hi.

Lokho singpuakna ah i zat ding tu le hei, singatna te ama mun tawh kituak a i zat theih ciang ma kitun hi. Taih-inn dawl sangtampi a lamdingte ahileh van nam tuamtuam, set nam tuamtuam tawh akilam ciangbek in dawl sangtampi innliante kilam zo thei pan hi.

I gam i minam khantohna ding i lamna ah tu le hei, seklu, setvan tuamtuam nei leng ma kitun baih zaw dinga kipzaw ding hi.

Ngaihsutzia, ngaihsutna khat peuhpeuh pen pomcip ding (akl) paikhia/pelh ding, a sang zaw/a niam zaw dan (akl) Amaan le Akhial in en leng haksa mahmah a, thukitukalh (paradox) zong tampi om hi. Akizatheihna le akisapna mun ah a kisam bangbang in akizattheihna (usefulness) tawh etkak leng kitel baih zaw ding hi.

Ngaihsutzia, nagihsutnate pen ei zat ding hi a, tuate zat i suah loh ding thupi hi. Theihtel sitset man hi lo in, ka sim khak laibute pan i gam i minam khantohna ding i hanciamna lampi ah kizattheihna om kha thei ding hi cih lametna tawh hihthute hong gelh ing. Hun pia in hih lai nong simsak manin ka lungdam. Zahtakna tawh, Tg. Sian Nun Siam, Siambawi Ref: – Trialectics by Kyaw Win (2008) | Trialectics – Logic for New Millennium by Tomislav Budak (1995)