Theihna in sepkhiatna ~ Rev. Fr. Damian Dal

Theihna in sepkhiatna ~ Rev. Fr. Damian Dal

Mihing khat ii thutheihtel na in sepkhiatna pan in kithei hi. Tua ahih manin, hsepkhiatna in theihna kilahkhiatna ahihi. Mi te in natampi te bangci sepding, bangci bawlding cih thei in amau nasepna munmun uh ah siam in, khatveivei lamdang bang i sa phial hi. Bangci sepleng bangpiang dinga, bangci bawlleng, bang kingah thei cih thu te mite in, kinpen leh zonpen in aneih uh thu ahihi. Tua thu hangin, leitungah nate asangzaw asangzaw in kibawl toto a, mite theihna zong khangsemsem ahihna thu anial thei kuamah i om tuan kei hi.

Mite in mihing pumpi vante la khia in, adang mikhat tungah bangci vawhkik, bangci kizopsak kik ding cih thu thei uha, zatolam ah nasia takin khantohna piangsak hi. Tuhun semsem ciangin, numei pasal omkhawm kullo in, mihing bawlding kipan uha, tua nasepna ah zong gualzawhna hongnei uhhi. Mi te in nuclear (atomic) bomb bawltheihnang hanciam uha, hongbawl thei takpi in, tu in gamtampi in tua bomb nei ta uhhi.

India gamin gamlianpi ahih hangin, gamneuno khat ahi Pakistan tungah sim mawh gamtat, zawhthawh kampau zangngam lo hi. Banghanghiam cihleh Pakistan in nuclear bomb aneih man ahihi. North Korea kumpi te nasepna khempeuh United States leh nitumna lam gamte in etcik in, nawngkawi sak den hi. Banghanghiam cihleh nuclear galvan abawlding alau nahang ahihi.

Mite in midangte lungkim nadingin bangci thugen ding cih thei hi. Tua ahih manin, leitungah agensiam te, gendan athei te in munngah in, akam uhtawh nungta uhhi. Tu hun semsem ciangin, asia dingkhat, thusia apiangthei thu khat, kilungkimlohna apiangsak thei thukhat zong, pausiamna, gensiamna cih theihna te zangin, thusia lasia kisumit in, kisatmit hi. Awkhum, kamkhum azangthei lo gam, khua leh munah kitotna, kisatna omden hi. Tua ahih manin, pausiamna, amun ahun leh ami tawh kituak pauzia theihna in pilna khat hi a, nasep hoih mahmah khat zong ahihi.

Leitungah theihna khangkhang ahihman in, mihingte nasepna zong ni khat sangin nikhat kisangzaw semsem hi. Tu laitak a aminthang vanhoihkhat in, mai tawmvei hunsungin, vanhoihlo pen khat hong suak hi. Mihingte theihna tawh akibawl vanthak te kidelh in, kizuan a, neihteng lamteng bei liang, ne lo dawnlo liang, innkuan sung kitaangsapna te enman loliangin, tua vante ngahnang ihan ciam tazen ta hi. Theihna kikhel in, vante zong kikhel hi. Theihna kikhel in, nasepzia tezong kikhel hi. Hih akikhel theihna leh nate nungzui in mihingte in thagui thatang sanin idelh a, lungnop hun, tawldam hun ding nangawn i ngahman kei lianghi. Tu hun semsem ciangin, mihing thum tukhawm lukituah liangmah tase leh, eima phone tektawh buai in, kuamah kiho man loliangin, zubuai sabuai in, buai hun sungah ilut ta hi.

Theihna in nasepna ah kimukhia ahih leh, hi cibang leitungah theihna tuamtuam hongkhan natawh kizui in dotna nih ihki dotden ding thupi hi.
(i) Katheih thu in kanuntak na hongpicingsak sepkhiatna hongpia taktak hiam?
(ii) Apicing nuntakna kaneihna dingin bang ka thei hiam?

Hih dotna nihte in mihingkhat adingin nakpi tak in athupi dotna ahihi. Atunga igensa te i etciangin, theihna tampi te in, eite nuntakna hongpicingsak lo ahih lam hongphawksak hi. Tua ahihman in, theihna khempeuhin eite adingin mannei khin lo a, aman nei theihna ineih ding athu ahizawk lam hongtelsak hi. Theihna khempeuh in, mihing manphatna, mihing thupi’t na, mihingte kizopna ahoihzaw, asangzaw lamah hongton pih kei leh tua theihna in siatna, sihna, hongsuak in, mihingte nuntakna hong laksak gutui dawndawn tawh i kibang thei hi. Nuclear bawltheihna nei in, kibawl hi.

Ahi zongin, tu in tua akibawl nuclear kilau in, gam khat le khat thuhoih thuman zong genngam nawnlo ta uhhi. Nu le pa lotawh mihing bawlthei uh a, ahi zongin tua akibawl mite bangci kep, bangci picing sakding thei lo in, lukham ta uhhi. Theihna in mihingte nuntakna hongpicingsak ding in Pasian in mihingte lungsim pilna hongpiak ahihi. Ahi zongin tua mihingte neih pilna pen, amau te lungkim bangin zattheihna dingin, Pasian in suahtakna zong pia hi. Suakta tak in amaute theihna leh pilna te zangsak a, amau te theihna pen asepkhiatna tungah en in thukhen ding bek ahihi.

Zungnei lo singkungin asi hi. Tui mu lo ngasa in si hi. Mongnei lo thu kikaai awk in thusia piangsak hi. Theihna in Pasian kiangpan hongpai hi a, azungtawh akizop kei leh sihna piangsak hi. Theihna in ama inn a hi, Pasian deihna sungah teektangding hi napi in, Pasian deihna sungah teektang zolo in, tua pan apai khiat ciangin, tui mulo ngasa bangin tua theihna in sihna suak hi.

Theihna khempeuh in Pasian kiangpan hong pai ahih mahbangin, Pasian kiang, Pasian sungmah ah hongciah kikding hi in, theihna khempeuh ii zung le dawn in Pasian sungah hi a, Pasian sungah zungkha in, hongpai khia theihna in Pasian kiang azuan kikding ahihi. Ahi zongin, Pasian kiang zuankiklo, Pasian deihna tawh kituak lo in, leitung deihna, leitung lungsim, leitungvai khantohna te tungah akot taitai ciangin, mongnei lo khau bangin kikaai awk in, thu nokhat zongtawh thusia piangthei hi.

Nakhat peuhpeuh thei i cih ciangin, tua nakhat peuhpeuh tawh kisai athu thei cihna ahihi. Tua ahih man in theihna in Thu hi a, Thu in Pasian ahihi (Jn 1: 1). Hih thu hangin, theihna khempeuh Pasian kiangpan hongpai thu tawh kizom ding a, THU ahi Pasian deihna leh, tua thutheihna in sepkhiatna, nuntakpihna tawh kilak khia ding ahihi. Hih thu hangin Pasian thu theihna, Pasian hongitna itheihna, Pasian hong hotkhianna itheihna cih theihna khempeuh in sepkhiatna, gamtat na tawh akilakkhia ding ahihi. Rev Fr Damian Dal (Nimdildial) Leuven, Belgium