Thawhkikna

Thawhkikna

Thupatna:  Khrisitiante’ nuntakna pen a thokik Honpa Jesu tawh nuntak khopna hi. Khazih thokik lo hi leh i upna a mawkna hi a, kote’ thuhilhna zong a mawkna ahi ci-in Sawltak Paul in na gen hi. Ahih hangin a thokik Honpa tawh kimukhalopi-in Amah tawh nuntak khopna a piang thei kei ding hi, cih thu nungzui masate phutkhakna panin kimukhia thei hi (John 21:1-14).

Tangthu Piang Tom-et kikna:  Nungzuite in a khantawnun a zuih uh Jesu singlamteh tungah hong sih peetmah ciangin a galte uh lau-in, linglawng dipkuatna tawh kidim uh hi. A upna uh leh a lametna uh zong koi-ah om cih zong thei zo nawnlo-in, Simon Peter in,“Kei nga beng dingin pai ning,” a cih leh nungzui dangte’n zong, “Ko zong kong pai ding uh…,” ci sawnsawn uh hi. Tua zan, zankhuavak nga beng napi uh, khat zong manlo uh hi. Zingsang khua hong vak teh, “Ka taneute aw, ngasa na man uh hiam?” cih dotna tawh Jesu hong kilang hi. Jesu’ thupiak bangin ngen a paih uh ciangin ngasa tampi a man uh hi. Tuipangah hong tun uh ciangin amaute tawh nekkhop dingin zing-an Jesu in na vaihawm khin zo hi.

A Thokik Zeisu Khazih Tawh Nuntakna:  Samaria numeinu tawh a kiholim mah bangin (John 4), a thokik Honpa tawh nuntak khopna pen Jerusalem khuapi, Zion mualtung cih mun thupite tawh kiciangtan ahi nawn kei hi. Khatveivei, i nuntakna pen nasepna, innkuan sung, pawlpi, aituam nuntakna cih bangin khen sinsenin i kha nuntakna pen nisim nuntakna tawh i kisaisak kha kei zaw hi. Ahih hangin Jesu nung zuihna pen tua bang nisim nuntak nasepnate panin kha thu khenkhiatna ahi kei hi. Amah a thawhkik khit mun tampi-ah kilang a, ahih hangin hisan takah ahih leh gun gei, sehnel piau tungah ahi hi, i lemet lohna penpen mun ahi hi. Pasian pen biakinn sung bek, biakpiak phatna nasia ziahziah omna bek, Nipi kikhop ciang bekin a om deuh dingin kingaihsun thei hi.

Tuate zong thupi mah hi. Ahi zongin nasem silbawl, vaikuanin i paikhiat ciangin tua in nuntakna taktak hong lakin, tua lai munah a thokik Honpa na om khin zo hi. Tua bang nuntakna nasepna mun, inn, laisinna, khattang kisakna, dahna, lungdamna, gualzawhna, etc… munah tha hong pia ding leh hong huh hong panpih dingin Amah na om khin zo hi. Tua lai munah Amah in hong tha dimsak ding, hong semsaksuak zo ding na khat tawh hong na ngak khin zo a, eite ihih leh a Thokik Pa i muh khak ding a thupi pen ahi hi. A kammal sungah thuklut in. Thungetna tungtawnin Amah tawh aituam thusim kisungtelna nei in. Amahmah leh ei ading hong sepsak theihnate hangin lamdangsa, lungdam kipak in om in.

A Thokik Pa’ Kammal Hong Lawhkhakna:  John 21 sung tawh a kibang thupiang khat pen Luke 5:1-11 sungah kimu thei hi. Tua lai mun mahah nungzuite pawlkhat mah in gualzawhna pen Topa’ thupiakna bang sepna pan hong pai ahihna thu na sin khol khin uh hi. Tua munah, Simon in zong, “Ahih hangin thu nong piak bangin ngen ka paai ding hi,” (aneu 4). Hih thupiang nih pen a kibang phial  hi a, a kilamdanna leuleu pen khat pen thawkkik ma leh, khat pen thawhkik khit aa thupiang ahihna ahi hi. Eite in nisimin a Thu sung panin Ama hong sawlna thu simin i zak theih ding, a khiatna leh eite ading hong deihsakna i tel ding kisam hi. I nuntakna ah Pasian in bang hong deih cih i tel nadingin Pasian’ kammal, a Thu sungah hun lak den kul hi. Tua kammal banga ciin’na, sepna pen a gamtang upna kici hi. Sepkhiatna om upna pen tua na hizaw hi. Pasian’ kammal sunga kamciam thuphate a lunggulh mi in a kammalte semkhia ngam ding, nuntakpih ding hi. Tua in Pasian’ kammal maan hi, cih teci panna hoih ahi hi. “Na thute in kei hong kem a, an bangin ka ne hi. Na thute kei adingin ka kipahna leh lungdamna ahi hi. Banghang hiam cih leh nangma min in kei hong kilo hi, aw, TOPA, Vanglian Pasian aw (Jer. 15:16)!

Zingtung Bevengna:   A thokik Topa tawh nuntak khopna pen Amah tawh zing-an nekkhopna tawh kipan hi. Leitung i nasepna ah sunkhua ading a kisam vitamin a om kim zing-an pha nek kul hi. I leitung si-le-sa pumpi pen thanem mahmah den zaw-in, vai dang i neih kei nak leh zingsang nangawn hun maanin i tho baih zo kei hi. Himahtaleh, meileng, vanleng, motorte tawh khual i zin ding ciangin a hun maan a tun ding i sem zo leuleu hi. Zingsangin Topa in eite hong na ngak khitna ah i kin ngaihsut zawh nang leh a sepzawh nading hehpihna ngen ciat ding hihang. Topa tawh zing-an nekkhopna- Amah tawh a kipankhia sunkhua ni manpha sungah, i ngaihsutna sangin kalsuan hoih tampi, kalsaupi i paizo zaw ding hi. “TOPA aw, zingsangin ka aw nong za a, zingsangin nangma adingin biakna bawlin kong ngak hi” (Late. 5:3).

“Hong Pai Unla, Zing-an Hong Ne Un”:   Thu haksa la haksa leh lunghimawhna tawh a kidim leitungah nasem dingin i kuankhia hi. Tua ahih manin nuntakna gualzawh nadingin Topa’ ompihna, huhna leh hong lamlahnate i kisam hi. Amah in tua haksatna teng phu-in a zogawp khin zo hi. Gentehna in mihing ahihna tawh zan niloh mah gamdaihna munah thu na ngen hi. Nungzuite in zan niloh nga bengin bangmah lawhcinna ngah ta kei le-uh zingsang khuavak dong a kuhkal zawhna uh zong ngaihsut huai hi. A zingsang ciang a thokik Zeisu hong kilang in lawhcing pah uh hi. Na hanciam, na kuhkalna a mu Pasian, na thungetna tampite kuitungin a dawn dong cikciang tung ding cih a tel Topa hi. TOPA TAWH ZING-AN- Pasian’ kammal leh thungetna tawh Topa tawh zing-an ne-in ama khephungah tu-in, amah tawh geelkhawm, ngaihsun khawm, Amah thudot ding kisam hi. Tua bangin Topa hong piak ni, i patkhiat ciangin, a kipat aa mah bangin thupha tawh nikhat khit nikhat i khum thei ding hi.

Hih munah nungzuite in zing-an ne dingin Zeisu a sap uh hilo a, Jesu in zing-an ne dingin nungzuite na zawn hi. Amah ahih lam a theih uh ciangin “Nang kua na hiam?” ci-in kuamah in a dong ngam nawn kei uh hi. A thokik Jesu tawh zing-an nekna hangin nungzuite in tua ma-a Jesu’ thugente tel thei ta uh hi. Atawp dongin Zeisu tungah citakin hangsan uh hi. Jesu ahi bangin tel thei uh hi. Ama sungah bulkipin zungthuk kha uh hi. Nungzuite’ lawhcinna bulpi pen Jesu tawh aituamin a kizopna uh hang ahi hi. Jesu in “Kei tawh lo-in bangmah na sem thei kei ding uh hi” (John 15:5b, KJV), na ci hi. Kei tawh lo-in Pasian’ na na sem thei kei ding hi, Kei tawh lo-in kumpi’ na nasem thei kei ding hi, Kei tawh lo-in sum-le-pai na bawl thei kei ding hi, Kei tawh lo-in lokho-singpua na sem thei kei ding hi, Kei tawh lo-in nuntak siangtho na nei zo kei ding hi, Kei tawh lo-in pilna na sin thei kei ding hi, Kei tawh lo-in… Kei tawh lo-in…Kei tawh lo-in, etc…bangmah na hih thei kei ding hi. I sepsep i bawlbawlna mun, koitak cih omlo-in zing-an nekhawm dingin Jesu in hong ngakna munah Amah tawh omkhawm Ni!

Thukhupna
–      A thokik Honpa, leitung pumpi a a omlai bang hinawnlo-in mun khempeuhah om thei ta hi. Ama hong ompihna liim na phawk kha ngei hiam? Nuntakna leh nasepna-ah lawhcinglo i kisa den hiam? Topa’ aw mah i ngaingai ding hi! Jesu’ thupiakna tawh ngasa tampi a kimat ciangin mi tampitakte in Galilee tuili a om ngasate kisa kha hi. Ataktak in Jesu’ kammal sunga om ngasate ahi hi.

a in Elijah in Elijah’ vangliatna thupha a zahnih a ngahna lungngai in. Elijah in khamkham taleh, Elisha in, “TOPA nungta a, nangmahmah na nuntak mah bangin, nang kong nusia ngei kei ding hi,” a ci hi (II Kum. 2:3). Nungzuite leh Elisha mah bangin, sihna pan thoto kikin, vantunga kilato Topa’ vangliatna Kha Siangtho ompihna ngah nadingin Jesu belh tinten ding kisam hi.

–     Leitunga om adang biaknapi’ a phuankhia makaite si-in thokik nawnlo hi. Nipi ni zingsang phalvak tungin Jesu kivuina han a hawmin om ahih manin galkapte leh siampite lungmang taleh, Honpa Jesu thokik khin ahih manin upna laigil tawh Jesu sunga lametna pha khempeuh a luah thei ihi hi. Nisim Jesu tawh zing-an nekkhopna tawh thawhkikna thupha nosuah denin, nang leh na innkuan sungah hong om den tahen!

By: Kham Lian Suum
Assist. Pastor, Agape Zomi Baptist Church.