Thawhkik na Thuthuk: Mihing Pumpi Thokikding ~ Rev. Fr. Damian Dal

Thawhkik na Thuthuk: Mihing Pumpi Thokikding ~ Rev. Fr. Damian Dal

Thawhkikna thu hangin mihingte tangthu kikhel hi. Nazareth khuami ahi Jesu Topa in sihna zo in, apumpi mahmah tawh hansungpan hong thawhkikna thu hangin, Pasian in amabawlsa mihing te pumpi mahmah zong a Tapa mahbangin thosakkik dinghi (bodily resurrection) cih thuthak hong hilh in, lungdamna thu hongtangko hi.

(i) Singlamteh tung kithat in, hankhuk sungah akivui Jesu luang omnawnlo (empty tomb):

Hih in banglungdamna thu hongtheisak a, bangci bang lungdamna thu hongpuak ahi hiam? Jesu Topa in sitakpi hi. Kivui takpi hi. Ahizong in, mihing ahihna paaikhia lo in, amihing pumpi mahmah in mithanna vangliatna tawh hong thokik ahihi. Hihthu hangin, amah a upmi khempeuhte in zong, hun nunungni ciangin, i pumpi mahmah tawh thokikding hi cih, akigen theilo lungdamna thu hongpuak ahihi. Topa thawhkikna hangin, eite zong i pumpi mahmah tawh thokikding (bodily resurrection) ihih na thu bangzahin lungdamhuai ahihiam cih thu athak in hongphawksak hi. Eite kivuina hankhuk te ah i luanghawm te omnawn lo dinga, lei asuak eite pumpi, Leivui panin mihing honga hongbawl Pasian in, leivui pan mah in eite pumpi hong thosakkik ding ahihi.

Tua in thawhkikna taktak ahihi. Honpa Jesu hanga Pa Pasian hongpiak thawhkikna in, ama piansak, ama bawlsa pumpi leh kha kigawm mihing pen pumpi leh kha kigawmmah in, abit in, acingin athosakkik dinghi cihthu ahihi. Pasian in mihing abawl in, kha leh pumpi kigawm in na bawl a, tua kha leh pumpi kigawm a anungta mi pen, mihing ahihi bek hi (Pian 2: 7). Kha bek mihing hilo in, pumpi bek zong mihing ahi kei hi.

Pumpi leh kha kigawma anungta mi in, mihing ahihi. Pasian in atapa neihsun hongpiak dongin itna lakkhia a, honghotkhiat pen, mihing ahihi. Kha bek hi lo, pumpi bek hi loin, kha leh pumpi kigawm mihing a gumkhia ahihi. Hih thu hangin, “kha” bek hingsak in, pumpi thosakkik lo hi leh, sihna ii zawh mihing pumpi atholo ahih manin, mihing thawhkikna omlo hi. Hih thuhangin, Topa hongpai kik ni mateng thawhkikna kicing (resurrection) omlo hi.

(ii) Kha bek athokikding hilo in, Christ hongpai kikni ciangin i pumpi mahmah tawh Christ mah bangin athokik ding ihih nathu Paul in hong hilh in ah:

“Ahi zongin a thuman taktak cilehang, a sisa mite zong hingkik takpi dinghi cih a kitel theihna dingin sihna panin Christ kihingkiksak khinzo hi. Banghanghiamcih leh mikhat hangin sihna a ommah bangin mikhathang mahin misite zong hin’kikna omhi. (…) Ahi zongin tua hin’kikna pen ama huntawh kizui-in a banbanin hidinghi. Amasa penin Christ hi a, Christ hongpaikik ciangin ama pawlte khempeuh hingkik dinghi” (1Cor 15: 20-23).

Christ hongpai kikni ciangin, ama pawl te, amah a umte khempeuh hingkikding hi, ci ahih manin, Topa mahbangin, apumpi uhtawh hingkik ding, thokik dinghi cih thu ahihi. Kha bek nungta paisuak ding cihna hilo in, i pumpi leh i kha kigawm kikdinga, Jesu Topa in apumpi leh akha kigawm in hongthawhkik mahbangin, amah a ummi te zong amahbang mah in i thokik dinghi cihna ahihi. Ahi zongin tua athokik pumpi in, athokik Topa vangliatna tawh akituam, akikhel pumpi hi dinga, asiathei pumpi hinawn lo in, asiathei nawnlo pumpi in kikhel ding ahihi.

“Peengkul nunung hong gin’ ciangin mitphiat kikal sungin i kikheel dinghi. Banghanghiamcih leh peengkul hong gin’ ciangin misite a sithei nawnlo dingin hongtho ding a, i vekpi-in i kikheel dinghi. A muatthei pumpi pen a muattheilo pumpi-in hong kikheel ding a, a sithei pumpi pen a sitheilo pumpi-in hong kikheel dinghi. A muatthei pen a muattheilo hongsuakin, a sithei pen a sitheilo hongsuah ciangin LaiSiangtho thu hongtung taktak dinghi. LaiSiangtho in, ‘Sihna maimangin gualzawhna in khuplet hi.Sihna aw, na gualzawhna koi-ah om a, midangte nasuksiat zawh nading nathahatna koi-ah om ahi hiam?’ naci hi” (1 Cor 15: 52-55). Rev. Fr Damian Dal (Leuven, Belgium)