Thailand pan Refugee te Kawlgam ki ciahsakta

Thailand pan Refugee te Kawlgam ki ciahsakta

Thai gamsung aom Refugee gambel te tuni Tuesday (25 October) ni akipan Kawlgam ah ciahsakding in kipanta uh cihthu Reuters te’n genkhia uhhi. Thai leh Myanmar gamgi kikal aom Refugee te aciahtheih nading in United Nations te makai in ageel uh hi a, Thai kumpi leh Myanmar kumpi tungpan in ciahsaktheih nading in phalna Endorsement piakhinta uh ci’n UNHCR inzong genkhia hi.

Tuni Tuesday ni in Ratchaburi Province sung aom Refugee Camp khatpan in gambel innkuan khat UNHCR leh kumpi thunei te vaihawmna tawh ciahkhiat kipanta a, amau innkuan pen aciahkhia masapen hipah hi. Zingciang Wednesday ni inzong Tak Province sung aom Nupo Refugee Camp panin innkuan pawlkhat ciahkhialaiding uh hi ci’n UNHCR Senior Field Coordinator asemlaitak ahi Iain Hall in genkhia hi.

Thai leh Myanmar gamgi kikal ah Refugee Camp pen mun 9 ah om a, tuate panin Refugee mi tulsawm tampitak omlai uhhi.

Hihvai tawh kisai Reuters te’n UNHCR Senior Field Coordinator Iain Hall kiangah Telephone tawh dotna nei uhhi. Iain Hall pen Thai khuapi Bangkok panin Tai 304 bang aki gamlatna aom Mae Sot ah aom hi a, Reuters tekiang ah agenna ah “This particular movement is a milestone” ci’n genkhia hi. Hihbang in Myanmar Refugee te aciahtheih nading in avaihawm saktheih uhpen mualsuangpi khat in ciamteh hihtuak hi.

Ama genbehna ah Kawlgam panin kumpi thunei te Refugee Camp ah hongzin uh a, hih Refugee tepen ko gammi te mah hi ci’n theihpihna lai CI “Certificates of Identification” hongpiaksak uh cihi. Hihbang in aciahding te pen amau ii kizawhna tawh aciahding uh hi a, amau ii thu Information tezong suaktatak in amau khentatna tawh apiakban ah Kawlgam ciahle uh amau adingin bangmah nawngkaina omloding acih manun aki vaihawmsak cihi.

Thai gamsung ah Refugee Camp mun 9 ah aom hi a, tuate ah Refugee leh cimawh in abel mi akigawm in mi 103,000 bang omlai cihi. Pawlkhat pen Refugee Camp sungah aomzawh uh kum 30 bang valkhin a, atamzawtham, 80% bangpen Karen minam te ahi uhhi.

Kawlgam ah tulaitak “Myanmar’s Ministry of Social Welfare, Relief and Resettlements” ah SEnior Official asem ahi Ko Ko Naing in agenna ah Kawlgam pen gampualam panin hongciahnuam te adawnding in kaki gingkhinta uh ci’n genkhia hi.

Thai Government inzong amau gamsung aom Refugee Camp teng khakcip sawmta cihzong kiza hi. ZD Sawltak #zomidaily