Thai gamsung ah Zika Virus a ngah mi 200 omkhin

Thai gamsung ah Zika Virus a ngah mi 200 omkhin

Thai gamsung ah January kha akipan tuniciangdong Zika Virus angahkhin mi 200 bang omta ci’n Health Ministry in zanni Tuesday (September 13) ni in genkhia uhhi. Abeisa hunte ah Thai kumpi in Zika Virus vai genkhia ngeilo uh a, leitung theihding in apulakkhiat masakpenna uh ahihi.

Hihbang in leitung theihding in apulakna uhzong Health Experts te’n Zika Report vaitawh kisai siangthotak in genkhia un ci’n azaksakkhit, azingciang in a tangko khia uh kici hi.

Health Officials te genkhiatna ah hih Zika Virus vai genkhialeh agamsung ah khualzinmi kiamtuamding ahih manin Tourism Industry pen sumlut kiamding cih apatauh manun agenkhialo cimawk hi.

Abeisa kalthumsung akipan kalsim in Zika Virus angahthak mi 20 tabang ki behlapden hi ci’n Ministry of Public Health spokesman khatin Reuters te tungah genkhia hi.

Singapore gamte ahihleh agamsung ah amuhkhiatphet un August 27 ni in Zika Virus om cih tangkokhia uh a, nisim in aki behlapzah pen leitung theihpihding in genkhiapah ngam uhhi. Tuni ciangciang Singapore gamsung ah Zika Virus akilawh mi 300 bang phakhinta cihi.

Malaysia leh Philippines gamsung ahzong Zika Virus kimu cih kiza hi.

Leitung ah gamsiangtho mahmah, nidang in agamsung ah thokang zong omvetlo akici ngei Singapore gamsung na ngawn ah Zika Virus mi 300 bang kilawh ahihleh adang Asia gam tuamtuam ahzong hih Zika Virus omkha ngelngelding hi. Aomkhin pipi mitheihpihding a tangko ngamlokhawng ahi zawdiam… ZD Sawltak #zomidaily