Tedim Khuapi ah (10 Dec 2015)

Tedim Khuapi ah (10 Dec 2015)

TEDIM KHUAPI AH – Khuahun nei ih biak Pasianin a bawlsa phalbi hun
hongtungsak ta a, khua hong dam in khetulte in a nung a omte nuihsan
nuam in kithawithawi ta hi. Ka Zomipih mundang a omte hong ciah a sawm
na om uh leh puanlum hong kiging un aw.

TEDIM KHUAPI AH – Pawl tuamtuam tek pan in Zeisuh suah lungdamna thu
tangko in Music kipua in zan kivak ziahziah ta a, sun tawh zan tawh
TEDIM KHUAPI gamlum henhan den mai hi. Pawlkhatte bang sun lam ah
Lungdam bawl nading sial zong tawh, vok zong tawh kibuai ngeingai a, a
vengveng a bawl ding tawh Biakinn ah a bawl ding tawh thu kikum in
kibuai thei mahmah hi.

TEDIM KHUAPI AH – Lampi kinak keek mahmah a, Palik len nuai bang suang
cian nangawn tawh zo khin uh a, TEDIM KHUAPI hong et lawm sak mahmah
in, tun a hih leh, Kamhau tualpi nuai teng lam kikek zo in suangcian
kipan ta hi. A munmun ah vengnuai lam zong kikeek ahih manin nuailam
veng zong vakdan hong nuam mahmah hi. Lawibual Zato vengnuai lampi
zong kikeek in lamkawipi bang gol mahmah a nuam mahmah hi. Sakollam
lam kuultal kizut pen zanni tawm khat guah hong zu ahih manin buainawi
tam mahmah hi.

TEDIM KHUAPI AH – Zingciangin ZCD gualzawhna Dr Do Suan Mung sangah
bawl ding ci-in ZCD mapang phadeuhte buai mahmah uh hi. Tedim sangpi
khatna zong gamdang huhna tawh, leisek tawh Sakollam lam pan a lutna
vei leh tak teng tawm khat kium hi. Hih pen nung lam in zong kong gen
ngei na ah, ih sangpi puah ding kong zawn ngei a, ih sangpi a puahhuai
mahmah ahihna ih kiphawk sak phapha hi.

Lungdam,
tplian
0933395577