Takkheh Zomi (Part 2) ~ David Tuang

Takkheh Zomi (Part 2) ~ David Tuang

Itna tawh ma ciang suan khawm leeng :: Zogam leh Zomi it lua hi zaw maw,deihsak lua hizaw maw,ahih kei leh aki mudah hi zaw maw, bang hang ahi zaw tam, khat leh khat kitawngtawng,kiselsel-in,kiko ekh-ekh a,Pasian’ nasemte khawng ut bangbangin i cih suk giapgiapte pawl pen khantoh vai hetlo hi.

Zogam Zomi ka it hi, i cih leh i mipihte it in, hehpih a, thu i ngetsaksak ding kisam hi. Tua banah,gam leh minam vai-ah mite’n bang bangin hong simmawh in,hong neu bawl mah ta leh kitottot, ki selsel lam tawh do lo zaw-in, kiniamkhiatna leh itna takpi tawh i puaksiam ding leh i thuak siam ding kisam mahmah hi.

“Gam leh minam it luat manin,midang,namdangte gal bangin mu-a,langpan’in muhdahna pen,Pasian’ deihna hi tuan lo hi.” “Itna nei-in,a kiniamkhiat mite’ lam lamah, Pasian pang den zaw hamtang hi.”

Zomi i hih manin,Zomite bek it ding cih hi lo hi. Namdangte zong i it ding kisam hi. Ei leh ei bek ki-it ding leh ei hong itte bek it ding cihte pawl pen Pasian’ deihna hi lo a, thu-um mite gamtatzia ding zong hi lo hi. Mi khempeuh it-in,mi khempeuh tawh kilem ding pen Pasian’ deihna hi-a,thu-um mite’ vaipuak khat zong ahi hi.

Mail sungte ah Zomi it lua kisa-in, Chin cih min limlim leh Chin mi kici limlimte muhdah lawh keei-in,langpan pah keei cih dan khawng ka muh zelzel ciangin zong itna maan taktak i neih loh lamtak kilang kasa mahmah hi. Hi bang ka cih ciangin,maute gum in, amaute’ lamah apang cih hi lo zaw in, mi khempeuh tungah itna nei-in, kilem pih leeng cih thu i deihna hi zaw hi(Hih thu na san’ theih kei leh naa khat na kisam lai hi).

Ki muhdahna, ki hazatna, ki langpan’na leh angsung thu bek theihna cihte in,khantoh nading nakpi takin dal a, i minam sia sakin, i gam leh i leitang ii cidamna mahmah zong susia hi. Tua ahih manin,Zomi sung bek hi lo, kua minam (Mang vom, mangkang, kawl, kala, sen, etc…) cih kisai loin, mi khempeuh tungah itna, hehpih theihna, thukhualna, lungduaina leh deihsakna cihte i neih/zat zawh nadingin i kisin ding ahi hi.

Hi bangin hoihna lamah kisin tohtohna in, i lungsim,i kha leh i pumpi adingin zong damna zatui hoih pen hi pah a,i lungsim,i kha leh i pumpi mahmah hong cidam leh i gam leh i minam zong cidam in,a khangto ding hi zaw hi.

Hong kipumkhatsak thei lo,thusia lasia leh hoih lohna khempeuh Zogam Zomi (mimal khat ciat)sung panin, paai khia-in,kipumkhatna leh Pasian’ deihna tawh kipawl hoihna khempeuh i gam, i minam leh i mimal nuntakna sung mahmah-ah mun i lasak ngiat ding hi. Zogam leh Zomite’ sungah kipumkhatna leh khantohna lianpi a om theih nadingin,a thupi bel leh a lian bel, “ITNA,” bulphuh penin nei-davidtuangin,tua itna tawh ma ciang i suan khawm ding hi.

“ITNA” i cih ciangin,i mipihte bek ading hi lo a,mi khempeuh a huam kima i cihna ahi hi. Tua itna om loin,i gam leh i minam sungah khantohna leh lawhcin’na daupaina cihte om thei ngei lo ding hi. Itna khahkhia-in, itna mah masa sak phot limlim leeng, kua kua-in, bang bangin hong ci ta zongin,a tawpna-ah, namdangte in zong hong zahtak in,minam lian khat in, Zomite hong ciamteh thei/nuam pan ding uh hi.

“Itna maan taktak leh kiniamkhiatna maan pen,a guallel a bat hun a om hangin,cik mah hunin,guallel ngei lo hi.”

“Ki-it,kilem, kihehpih, kizahtak, kitelsiam, ki maisak, a hoih lam tawh kithukkik cihte in, kipumkhatna piangsak a, tua dung zui-in, khantohna lianpi hong om ding hi.” Takkheh Zomi Kalthak khat suan leuleu dih ni. David Tuang